Tirfurv ew shap aswonadow a enep an tir (ha terweythyow gweli an mor). Ma anjei ow hwarvos en lies sort a vynsow, tredh nebes metrow dhe gansow a gilometrow.

Klassa tirfurvow

Possybyl ew dhe glassa tirfurvow en niver a for'ow. Udn vor' ew herwydh an kerhydnedh lebma thew furvyes, po an ehen a garrek a ell delenwel myns ha shap an tirfurvow, po y deller herwydh processys tektonek.

Kerhydnedh

Tirfurvow arvorek

(rag moy a vanylyon, y hweller an folen, tirfurvow arvorek)

Tirfurvow arvorek ew gwres gen ober an todnow, owth usya, treusperthi ha godhasa stoffow.

Tirfurvow arvorek usyansek

Pedntir, kabmas, sawen ha stack ew ensamplow a dirfurvow war an kost gwres gen usyans.

Tiredh Donostia en Gwlas Baskek, ow tiskwedha kabmasow ha pednow tir
Sawan ryb treth Pednvownder, Selevan
Fogow ogas dhe Dhintagell

Tirfurvow arvorek godhasansek

Woja usyans, an mor a dreusberth tewes hag erel ha's godhasa, ow furvya trethow ha tavasow tewes.

Morlydn an Logh, Kernow
Tombolo en Nihon
Groynys en Kataloni
Kuspow treth
Keynow treth en Estoni

Tirfurvow ryver

(rag moy a vanylyon, y hweller an folen tirfurvow ryver)

Processys a usyans ha godhasans haval dhe dirfurvow arvorek a hwer gen ryvers.

Tirfurvow ryver usyansek

Tirfurvow usyansek tipek ew dowrlam, kownans ha kowbollow.

Kowboll meur en Stat Evrek Nowydh
Dowrlam Russel en Tasmania, Ostrali, ow tiskwedhes level an garrek galish
Kownans en-dadn Dowrlam Victoria, tredh Zambi ha Zimbabwe

Tirfurvow ryver godhasansek

E'n keth for', an ryver a dreusberth ha godhasa tewes ha leys war an fennva. Tirfurvow tipek ew livplen, delta ha heyl.

Livplen ha run an Dowr Dyfi yn Kembra
Delta Dowr Ganga en Eynda
Tobmen ryb Castle Dyke, Konteth Lincoln
Dowr Heyl, Kernow

Tirfurvow rewlivek

(rag moy a vanylyon, y hweller an folen tirfurvow rewlivek)

Rewlivow ha lienyow rew a ell usya ha godhasa mynsow meur a stoff.

Tirfurvow rewlivek usyansek

Ma rewlivow owth usya kobmow, nansow U, kribow ha kern.

Nans Lauterbrunnen, Swistir
Horn margh an Wodhva dhort Moel Siabod
Sharp Edge, Blencathra, Pow an Lydnyn

Tirfurvow rewlivek godhasansek

Rewtinyow, brodnegi ha marianow ew tirfurvow godhasansek tipek kawsys gen rewlivow.

Als arvorek a rewtinyow, Dinas Dinlle, Kembra
Brodnek en Wordhen north
Pednmarian meur en Alpow Frynk

Tirfurvow frosrewlivek

(rag moy a vanylyon, y hweller an folen frosrewlivans)

Ewedh, kemyskans a brocessys ryver ha rewliv a gaws tirfurvow frosrewlivek, pekar ha pollow kalter, leskargvaow hag ryvers plethys.

Leskargva ha ryver plethys
Leskargva Skeiðarárjökull, Rewenys
Poll kalter en Greunland

Tirfurvow amalrewlivek

(rag moy a vanylyon, y hweller an folen amalrewlivans)

Tirfurvow amalrewlivek a hwer en telleryow a-ugh rewlivow (nunatakow) po ogas dhe rewlivow. Processys pekar ha ober rewi-teudhi a askor tirfurvow pekar ha radel, klusvaow ha dor patronyow.

Klusva war bedn menedh en Pow an Lydnow
Dor patronys en Alaska
Radel en Sgotlond

Tirfurvow eolek

(rag moy a vanylyon, y hweller an folen tirfurvow eolek)

Ober an gwens a ell usya, treusperthi ha godhasa tewes ewedh.

Tirfurvow eolek usyansek

Ober an gwens, ow hwytha tewes erbydn enep karrek a ell gul niver a dirfurvow, pekar ha meyn skavel gronek, ventifaktow ha yardangow.

Men usys gen an gwens
Ventifakt (men trihornek shapys gen ober an gwens), Difeythtir Mohave, Kaliforni
Yardangow e'n Difeythtir Qaidam, China
Hager-awel polter en Teksas, 1935

Tirfurvow eolek godhasansek

An gwens a guntel tewes rag gul breow gelwys tewydnow. Ma lies sort ha shap anodhans.

Tewyn barghan
Skeusen loren a dewydnow seyf
Tewyn steren ha pans dihwethans

Tirfurvow tektonek

(rag moy a vanylyon, y hweller an folen tirfurvow tektonek)

Gwayans an plattys tektonek a wra tirfurvow meur ha bian, ow krog war aga theller komparek dhe emlow dyffrans.

Tirfurvow emlow derevyek

Dew blat a wra gwaya a-les. Hebm a furv menedhyow tan basalt a-hes keynow kres an mor bras, keffrys ha nansow fols ha tell tanvorel.

Bewheans a furvyans keyn kres an mor bras
Nans fols en Rewenys
Tell tanvorel hidrothermel
Enys volkanek war geyn kres an Mor Bras Atlantek
Lydn Tanganyika en Nans Fols Afrika est

Tirfurvow emlow kisus

Pan wra dew blat gwaya an eyl tro'ha y gila, furvyes ew kadonow menedhyow pekar ha'n Andes, stratoloskvenydhyow tan ha kleudhyow islonkel.

Kadon menedhyow an Andes
Kleudh islonkel Puerto Rico
Stratoloskvenydh Cotopaxi

Tirfurvow emlow gwithyasel

A-hes emlow gwithyasel, nag ew kresten nowydh gwres po distruys. En le hedna, an eyl tu a way hevelys dh'y gila. Ledrow serth, pollow fowt gen kors imm-an-amm a hwer.

Fowt San Andreas, Kaliforni
Lydn San Andreas, ensampel a boll fowt
Kleger fowt kawsys gen dorgrys

Karrygi

Ma dhe ehednow dyffrans a garrek gnasow dyffrans. Hebm ew skila tirwedhow dyffrans, ow kregi war an vor' dell vo usyes po tewedys.

Men growan

Ma men growan ow tewedha en blockys pedrek. Hebm a furv karnow, pur aswonys en Kernow ha Pow Densher. Tirfurvow haval, bes en tiredhow trovadnek, ew kopjes ha bornhardts.

Karn an Keuswask
Kopje en Zimbabwe
Bornhardt en Ostrali, Uluru

Krey

Karrek dellek ew krey, etho na ell goverow frosa war enep an tir. E'n termyn woja Oos an Rew, an tir o rewys etho dowr teudh a usyas nansow, thew segh lebmyn. Krey a furv ledrow serth, hag usyes ew avel alsyow gen an mor.

Alsyow Gwydn Dover
Devil's Dyke, Sussex, ensampel a dirwedh krey

Kalgh

Kalgh a furv sett a dirfurvow arbednek drefen y vos tewedhys en es gen dowr. Karst ew hanow an tirwedh ma. Ma anjei ow komprehendya fogowyow, lenkdell ha daspednfentednyow.

Gogow kalgh - Gaping Gill en north Pow an Sowson
Kownans Cheddar Gorge
Daspednfenten ryver

Gwylar

Udn furv arbednek a galgh kevys e'n mor ew gwylar. Ev a hwer avel kribow en tiredhow trovadnek.

Krib a wylar en Israel
Rann a Varr-grib Meur Ostrali
Skeusen dandhowr a grib

Dorles

Possybyl ew dhe glassa tirfurvow herwydh aga teller war enep an nor. En telleryow Alpek ha pedneghlek (Arktik hag Antarktik), tirfurvow rewlivel hag amalrewlivel ew kebmyn. Gwarthevys ew dorlesow temprek gen tirfurvow ryver. Gwelys ew tirfurvow eolek en difeythtiryow an is-trovadnow. Ma tewedha krev e'n trovadnow owth askorra gweresow down ha tirfurvow men growan.

Tirfurvow war blanettys erel

A-dhia an 1960ow, ma dhe lies tavell efanvos vysytyes planettys erel. En varthys, possybyl o dhe weles tirfurvow pur haval dhe'n re na gwelys war an nor. Diskudhys ew ensamplow a dirfurvow ryver ha tewydnow war an planet Meurth, tirfurvow rewlivel war Blouton, lydnow war an loor Titan, menedhyow tan war Io ha Gwener. Udn process pur gebmyn war blanettys erel nag ew mar gembyn war an Nor drefen bos ayrgelgh dhe ev ew kowdelli.