Одиссея (Οδύσσεια) — му югыт пасьта тӧдса эпос. Лӧсьӧтӧма сійӧ важ Элладаын синтӧм сьылісь Гомер. Гижӧмась эпоссӧ миян эраӧдз VIII векын. Сюжетыс одзлань нуӧтӧ Илиадалісь висьтасьӧм.

Сюжет

Троясянь бӧр локтікӧ эллин геройес дыр уялӧмась паськыт саридз кузя. Уна шогыс да сьӧкытыс усис нылӧ. Меддыр ковсьӧма бертны гортас Итакаись (Ион саридзын остров) Одиссей сарлӧ — быдса дас во. «Одиссеяын» гижсьӧ сы ветлӧтлӧм йылісь.

Одиссей Полифем ордын

Кӧр некӧр вашӧтӧма ӧвсьытӧм саридз Одиссейсӧ да сылісь морттэсӧ циклоппез, ӧтік сина великаннэз, ді дорӧ. Одиссей аслас отиркӧт пырас медлёк циклопыс, Полифем, мугыркӧ.

Гортас бертӧм бӧрын Полифем адззас нійӧ аслас мугырксис. Сія сэк жӧ йӧрьяс пыранінсӧ пытшксяняс ыджытся ыджыт изӧн да кык мортсӧ сэк жӧ и сёяс. Эта бӧрын сія ланьтас. Одиссей вермис бы вийны сійӧ узикас, но сэк некинлӧ бы вӧлі осьтны Одиссейлӧ да сы отирлӧ мугыркись петанінсӧ. Асьныс нія абу вермӧмась вештыны ыджыт изсӧ и нылӧ быдӧнныслӧ ковсис бы тшыгсянь кувны пещёраас.

Ыджыт вежӧра Одиссей думайтӧма керны мӧднёж. Ашынас сія циклопсӧ юкталас винаӧн. Кӧр коддзӧм Полифемыс ланьтас, Одиссей сотчан майӧгӧн сотас сылісь ӧтка синпӧвсӧ. Циклопыс ӧддьӧн лӧгасяс и сетас кӧрткыв некинӧс не лэдзны ловйӧн сы мугыркись.

Асывнас, ассис баляэсӧ пещёрасис лэдзикӧ, Полифем сувтас самӧй пыранін дынас да пондас пешлыны киэзнас быд петісь подасӧ. Но Одиссейыс кужӧма сійӧ бӧбӧтны. Быдӧс баляэсӧ сія домалас куимӧн ӧтлаӧ, а шӧрись баляэз кынӧм увтӧ кӧрталас ӧтікӧн ассис спутниккесӧ. Ачыс сія вевттяс ассис киэсӧ вурунӧн да улісянь кутчисис ӧтік баля бердӧ. Сідз нія пышшӧмась шуштӧм мортсёйись шогья.

Тӧввез ен — Эол дынын

Кӧр Одиссей сюрӧма тӧввез ен — Эол — ді вылӧ, сійӧ бытшӧма панталасӧ. Бӧр мунікӧ Эол сетас Одиссейыслӧ мешӧк, кӧдаын вӧлісӧ домалӧмӧсь быдӧс ӧвсьытӧм лёк тӧввес. Кӧр Одиссей уяс Эолыс дынсянь, саридз вылас вӧлі ӧддьӧн лӧнь. Но лоис сідз, что аслас чужанін Итака дынӧ сибӧтчикӧ Одиссейыс ланьтіс, и сылӧн морттэс пӧрччалісӧ мешӧксӧ. Нія виччисисӧ эта мешӧкись адззыны дона берсясӧ. Мезмӧм тӧввес уннялӧмӧн петісӧ воля вылӧ и Одиссейлісь судносӧ вились вашӧтісӧ Эол ді дорӧ. Но ӧні Эолыс эз понды отсавны Одиссейыслӧ, и мӧдыслӧ ковсис одзлань уйны ӧвсьытӧм саридз кузя.

Сиренаэз

Одиссейлӧн мӧдік интереснӧй приключеннёӧн вӧлі сиренаэзкӧт сылӧн пантасьӧм. Сиренаэс вӧлісӧ джынсӧ инькаэз, джынсӧ кайез. Нія сэтшӧм басӧка сьылісӧ, что быдыс, кин мунліс сія ді дорӧт, кытӧн нія олісӧ, сувтчывліс эта остров дынӧ и сэтчинсянь бӧр эз ни мунлы. Медбы не сетчыны сиренаэс очарованнёлӧ, Одиссейыс ны ді дорӧ сибӧтчикӧ быдӧс аслас спутниккезлісь пеллезнысӧ лякис воскӧн. Асьсӧ сія тшӧктіс кӧртавны мачта бердӧ. Кӧр Одиссей кыліс сиренаэзлісь голоссӧ, сія пондіс пессьыны, мед мездӧтчыны да петны вадӧрас, но спутниккес эшӧ ёнжыка домалісӧ сійӧ. Сідз Одиссей кужис керны ӧтдруг кык дело: и кывны сиренаэзлісь голоснысӧ и не петны берегас.

Сцилла да Харибда коласын

Ӧтік местаын Одиссейлӧ коліс мунны кык лёк нечулим коласӧт: Сцилла да Xарибда коласӧт. Сциллаыс куталіс сы дынӧт уйись кораббез вылісь медбур мореходдэзӧс. А Харибда дынісь некин эз вермы пышшыны: сія ньылавліс быдсӧн корабсӧ ӧтлаын сы вылын муніссезкӧт. Сідз кыдз орддьыны энӧ чудовищеэсӧ некыдз эз туй, Одиссей кык лёксис бӧрйис учӧтжыксӧ — Сциллаӧс. Сія кӧть и сёйис квать мортӧс Одиссейыс спутниккез коласісь, но зато мукӧдыс кольччисӧ ловйӧн. А Харибдаыс быдӧннысӧ бы ньылыштіс.

Феаккез дынын

ӧтпыр кыдзкӧ буря жугдіс Одиссейлісь корабсӧ, и быдӧс спутниккес сылӧн вӧйисӧ. Одиссей кольччис ӧтнас. Уна приключеннёэз бӧрын Одиссей керис пур (плот) да бӧра уйис одзлань. Но Посейдон, кӧда преследуйтіс сійӧ циклоп Полифемӧс синтӧмсьӧтӧм понда (Полифемыс вӧлі Посейдонлӧн зон), жугдіс Одиссейлісь пурсӧ. Токӧ ӧтік саридзовӧй ен инька отсалӧмӧн Одиссей вермис уйны сылӧ тӧдтӧм ді дорӧдз да кольччыны ловйӧн. Эта ді вылын оліс сказочнӧй отир феаккез — кужись мореходдэз. Эта отирлӧн сар Алкиной ласкова панталіс Одиссейсӧ, козьналіс бур козиннэз да гортас бертӧм понда сетіс сылӧ судно.

Одиссей бертӧ горт муас

Сія кадӧ, кӧр Одиссей воюйтіс Троя увтын да странствуйтіс, сылісь иньсӧ — Пенелопаӧс корасисӧ уна жӧниккез. Нія думайтісӧ, что Одиссейыс некӧр ни оз берт, но Пенелопаыс веритіс жӧникыс бертӧмӧ и откажитліс быдӧс жӧниккесӧ. Одиссейлӧн зон Телемах, кӧда Итакаись Одиссейыс мунікӧ вӧлі эшӧ кагаӧн, быдмис вына да бытшӧм том мортӧ. Гажтӧма да лӧгӧн видзӧтіс сія айыс керкуын пируйтісъ жӧниккез буйство вылӧ. Но ӧтнас сія нем эз вермы керны унаыскӧт. ӧтпыр сія муніс кошшыны айсӧ, но нем эз вермы тӧдны сы йылісь и бертіс бӧр.

Одиссей пӧртчӧ корисьӧ

Одиссей тӧдіс сы йылісь, мый керсис сы керкуын. Этасянь сія решитіс локны гортас не аслас быльнӧй видын, а кыдз корись странник. Эта коста сы керкуын пируйтісӧ жӧниккез. Нія быднёж кешитчисӧ быдӧс кориссес вылын. Мӧд лунас Одиссей локтӧм бӧрын вӧлі Аполлонлӧн вежалун, и Пенелопа вӧзйис жӧниккеслӧ то кытшӧм испытаннё. Сія вайис Одиссейлісь ньӧввуж да висьталіс, кин пӧ жӧниккез коласісь кужас зэлӧтны ньӧввуж везсӧ да пырӧтны ньӧвнас 12 кольчо, сія и лоас сы жӧникӧн.

Жӧниккес ӧтамӧд бӧрын пондылісӧ зэлӧтны ньӧввужсӧ, но некин ны коласісь этӧ эз вермы керны.

Жӧниккезӧс вийӧм

Сэк Одиссей, сё эшӧ кыдз корись, корис, медбы и сылӧ сетісӧ пешлыны ассис вынсӧ. Жӧниккез откажитісӧ сылӧ этаын. Но Телемах, кӧдалӧ Одиссей осьтіс ассис гусяторсӧ, сетіс сылӧ ньӧввужсӧ, и Одиссей кокнита пырӧтіс быдӧс 12 кольчосо. Сыбӧрын Одиссейыс, ӧтлаын Телемахкӧт да кык веркӧт сэк жӧ вийисӧ быдӧс жӧниккесӧ. Эта бӧрын сія висьталіс Пенелопалӧ, кин сія. Сьӧкыт вӧлі Пенелопалӧ эскыны, медбы эта пӧрись, бырӧм паськӧма корисьыс вӧлі сылӧн жӧникыс. Но сыбӧрын Пенелопаыс тӧдіс сійӧ. Афина, кӧда пыр сулаліс Одиссейыс дор, керис сійӧ одзза кодь томӧн да бытшӧмӧн.

Одиссей локтӧм йылісь да жӧниккесӧ вийӧм йылісь юӧрыс чожа паськаліс омӧн Итака пасьта. Вийӧммезлӧн родняыс мунісӧ тышкасьны Одиссейкӧт да сыдор сулаліссезкӧт. Афина отсалӧмӧн вермисьнас кольччис Одиссей. Недыр мыйись Афинаыс жӧ бурӧтіс сійӧ Итака йӧзыскӧт, и нія бӧра Одиссейсӧ керисӧ асланыс сарӧн.

«Одиссея» да «Илиада»

Одиссеяыс» кыдз и «Илиадаыс» тэчӧм 24 сьыланісь. Ны коласын уна ӧткодьыс, но эм и ыджыт неӧткодь. «Илиадаын» мыччалӧма йӧзыслӧн важжык оланыс, нежели «Одиссеяын». «Илиадаын» баитсьӧ война йылісь, и сія лоӧ геройез йылісь поэмаӧн, а «Одиссеяыс» мыччалӧ мир дырни олан, и сыын унаӧсь мойдын кодь лоӧмторрез. Сія рӧмажык да быдсямажык. «Илиадаыс» да «Одиссеяыс» лоӧны мичмӧтан литературалӧн медбур гижӧттэзӧн да ӧддьӧн дона история казьмӧтаннэзӧн.