Anas Urbaningrum
| Anas Urbaningrum | |
|---|---|
 | |
| Ketua Umum Parté Dhémokrat ke-3 | |
| Linggih 23 Mèi 2010 – Sapunika | |
| Kang sadurungé | Hadi Utomo |
| Kang sawisé | Taksih njabat |
| Anggota Dewan Perwakilan Rakyat saking laladan pamilian Jawa Timur VI (medal saking kalungguhan punika awit Juli 2010) | |
| Linggih 2009–2014 | |
| Anggota Komisi Pemilihan Umum | |
| Linggih 2001–2005 | |
| Rerincèn dhiri | |
| Lair | 15 Juli 1969 Blitar, Indonésia |
| Parté pulitik | 30px|Lambang Parté Dhémokrat Parté Dhémokrat |
| Sisihan | Athiyyah Laila |
| Anak | Akmal Naseery Aqeela Nawal Fathina Aqeel Najih Enayat Aisara Najma Waleefa |
| Agama | Islam |
| Sana jaringan | www.bunganas.com |
Anas Urbaningrum (lair ing Blitar, Jawa Timur, 15 Juli 1969; umur 55 taun) inggih punika salah satunggalipun pulitikus Parté Dhémokrat ingkang dados parté pamenang ing pemilu 2009.[1][2] Panjenenganipun kapilih dados ketua parté ing yuswa 40 taun, lan kalebet pangarsa parté paling enem sa-Indonésia.[1] Anas naté mimpin Divisi Otonomi Pulitik lan Laladan sadèrèngipun dados ketua fraksi Parté Dhémokrat ing DPR.[1]
Pendidikan
[besut | besut sumber]Lair ing désa Ngaglik, Srengat, Blitar, Jawa Wétan, Anas nindakaken pendidikan awit SD ngantos SMA ing Kabupatèn Blitar.[2][3] Sasampunipun lulus saking SMA, Anas nglajengaken dhateng Universitas Airlangga, Surabaya, kanthi jalur Penelusuran Minat dan Kemampuan (PMDK) ing taun 1987.[2] Ing kampus punika Anas sinau ing Jurusan Pulitik, Fakultas Ilmu Sosial lan Pulitik, ngantos lulus ing taun 1992.[2][4]
Anas nglajengaken pendidikanipun ing Program Pascasarjana Universitas Indonésia lan pikantuk gelar master ing babagan ngèlmu pulitik ing taun 2000.[4][5] Tesis pascasajananipun sampun dipundamel buku kanthi irah-irahan “Islamo-Dhémokrasi: Pemikiran Nurcholish Madjid” (Républika, 2004).[3][4]
Pendidikan Anas Urbaningrum
[besut | besut sumber]- Madrasah Tsanawiyah Negeri Kunir, Blitar
- SMA Negeri Srengat, Blitar
- S1 Sarjana Ilmu Pulitik Universitas Airlangga, 1992,
- S2 Magister Sains Ilmu Pulitik UI, 2000.
- S3 taksih dipunlaksanakaken Program Dhoktor Ilmu Pulitik di Universitas Gajah Mada, Yogyakarta.[5]
Pagesangan Pribadi lan Kulawarga
[besut | besut sumber]Anas gadhah hobby ulah raga lan maos buku.[4] Anas remen kaliyan ulah raga voli, badminton, lan bal-balan.[4] Panjenenganipun tansah mirsani tetandhingan tim nasional Indonésia.[4] Anas palakrami kaliyan Athiyyah Laila Attabik (Tia).[6] Kekalihipun kepanggih lan tepang ing HMI Yogyakarta.[6] Sapunika Anas pidalem ing laladan Duren Sawit, Jakarta Wétan, kaliyan sekawan putra-putrinipun Akmal Naseery (lair 2000), Aqeela Nawal Fathina (lair 2001), Aqeel Najih Enayat (lair 2003), lan Aisara Najma Waleefa (lair 2005).[4]
Karier
[besut | besut sumber]Karir Anas ing donyaning pulitik dipunwiwiti ing organisasi obahan mahasiswa. Panjenenganipun nggabung kaliyan Himpunan Mahasiswa Islam (HMI) ngantos dados ketua umum pengurus ageng HMI ing kongres ingkang dipunwontenaken ing Yogyakarta nalika taun 1997;[4] Minangka ketua organisasi paling ageng punika, Anas dados salah satunggalipun tiyang ingkang mangaribawani éwah-éwahan pulitik nalika jaman reformasi 1998.[4] Nalika wekdal punika Anas ugi dados anggota Tim Revisi Undang-Undang Pulitik, utawi Tim Tujuh, ingkang dados salah satunggalipun panyuwunan reformasi.[4]
Nalika pamilian umum dhémokratis taun 1999, Anas dados anggota Tim Seleksi Parté Pulitik, utawi Tim Sebelas, ingkang gadhah tugas meverifikasi kalayakan parté pulitik kanggé ndhèrèk pemilu.[4] Salajengipun Anas dados anggota komisi Pamilian Umum periodhe 2001-2005.[4]
Sasampunipun medal saking Komisi Pamilian Umum (KPU), Anas nggabung kaliyan Parté dhémokrat awit taun 2005 minangka Ketua Babagan Pulitik lan Otonomi Laladan.[4]
Karier lan Padamelanipun
[besut | besut sumber]- Ketua Umum Parté Dhémokrat Periode 2010-2015
- Ketua Fraksi Parté Dhémokrat DPR RI Periode 2009-2014
- Pimpinan Kolektif Nasional KAHMI, 2009
- Ketua Yayasan Wakaf Paramadina, 2006-sapunika
- Ketua DPP Parté Dhémokrat, 2005-sapunika
- Anggota KPU Periode 2001-2005
- Anggota Tim Seleksi Parpol Peserta pemilu 1999 (tim 11), 1999
- Anggota Tim Revisi UU Pulitik (tim 7), 1998
- Ketua Umum PB HMI Periode 1997-1999 [5]
Wekdal Reformasi 1998 lan Transisi Pulitik
[besut | besut sumber]Anas dipunpilih dados anggota tim revisi undang-undang pulitik utawi misuwur kanthi nama Tim Tujuh. Tim punika dipunpimpin déning Ryaas Rasyid kanthi anggota sanèsipun inggih punika Affan Gaffar (alm.), Andi Mallarangeng, Djohermansyah Djohan, Luthfi Mutty, lan Ramlan Surbakti. Tim punika ngasilaken paket undhang-undhang pemilu ingkang dipunsahaken DPR RI dados UU No. 2/1999 ngengingi Pulitik, UU No. 3/1999 ngengingi Pamilhan Umum, lan UU No. 4/1999 ngengingi Susunan lan Kedudukan MPR, DPR lan DPRD.[4]
Nalika nyiapaken pemilu dhémokratis ingkang kapisan nalika taun 1999, pamaréntah damel Panitia Persiapan Pembentukan Komisi Pamilian Umum ing taun 3 Fèbruari 1999 ingkang dipunngertosi kanthi nama Tim Sawelas. Tugas tim punika inggih punika meverifikasi panjangkepan syarat administari parté kanggé ndhèrèk pemilu. Anas dipunpilih minangka anggota tim ingkang dipunpimpin Nurcholish Madjid (alm.). Anggota sanèsipun inggih punika Adi Andojo Sutjipto, Adnan Buyung Nasution, Affan Gaffar (alm.), Andi Mallarangeng, Eep Saefulloh Fatah, Kastorius Sinaga, Miriam Budiardjo (alm.), Mulyana W. Kusumah, lan Rama Pratama.[4]
Sasampunipun ngawontenaken verifikasi, tim punika ngumumaken 48 Parté ingkang gadhah hak dados peserta pemilu 1999.[4]
Dados Anggota Komisi Pemilihan Umum
[besut | besut sumber]Anas dipunlantik dados anggota Komisi Pemilian umum (KPU) ing periodhe 2000-2007 déning Présidhèn Abdurrahman Wahid (alm.) ing tanggal 24 April 2001.[4] Anas dados anggota KPU sareng kaliyan Chusnul Mar’iyah, Daan Dimara, Hamid Awaludin, Imam Prasodjo, Mudji Sutrisno, Mulyana W Kusuma, Nazaruddin Syamsuddin, Ramlan Surbakti, Rusadi Kantaprawira, lan Valina Singka Subekti.[4] Tugas ageng KPU periodhe punika inggih punika nglaksanankaken pamilian présidhèn kanthi langsung ingkang kapisan ing salebetipun sajarah ingkang ugi dados bab ingkang awrat (wigati) kanggé dhémokratisasi ing Indonésia.[4] Anas medal saking KPU nalika tanggal 8 Juni 2005.[4]
Dados Anggota DPR RI
[besut | besut sumber]Anas kapilih dados anggota DPR RI ing Pemilu 2009 saking laladan pamilihan Jawa Wétan VII ingkang kapérang saking pinten-pinten laladan Kota Blitar, Kabupatèn Blitar, Kota Kediri, Kabupatèn Kediri lan Kabupatèn Tulungagung lan angsal swanten ingkang kathah piyambak, cacahipun 178.381 swanten, nglangkungi angka Wilangan Pembagi Pemilih (BPP) ingkang cacahipun 177.374 swanten.[4]
Nalika 1 Oktober 2009, Anas dipunpilih dados Ketua Fraksi Parté Dhémokrat ing DPR RI.[7] Tugas ageng ingkang kasil kanthi saé ndadosaken solid-ipun sadaya anggota Fraksi Parté Dhémokrat ing voting Kasus Bank Century.[4]
Kapilih dados Ketua Umum DPP Parté Dhémokrat
[besut | besut sumber]Minangka pamenang Pemilu 2009, kongres ka-2 Parté Dhémokrat ing Bandung ingkang dipunlaksanakaken 20-23 Mèi 2010 dados satunggaling prastawa mirunggan ing donyaning pulitik Indonésia.[7] Anas ndheklarasikaken pancalonanipun ing Jakarta ing tanggal 15 April 2010.[4] Ing salebetipun kongres palian ketua umum, Anas menang ngalahaken Andi Mallarangeng lan Marzuki Ali.[7]
Medal saking Parte Dhémokrat
[besut | besut sumber]Nalika wulan Fèbruari 2013, Anas Urbaningrum mandhap saking kalungguhan Ketua Umum Parté Dhémokrat. Panjenenganipun mandhap amargi dipuntetepaken minangka tersangka kasus dugaan korupsi proyek Hambalang déning KPK. Sanèsipun punika, Anas ugi mandhap saking kadher Parte Dhémokrat. Sanajan makaten, Anas tetep ngudi ing babagan pulitik. Panjenenganipun damel satunggaling organisasi masarakat ingkang nama Perhimpunan Perobahan Indonésia (PPI). Ormas kasebat dados wadhahing loyalis (pandherek) Anas sasampunipun medal saking Parte Dhémokrat.
Bebingah ingkang dipuntampi Anas
[besut | besut sumber]- Bintang Jasa Utama saking Présidhèn RI, taun 1999.
- Mahasiswa Teladan lan lulusan terbaik Universitas Airlangga.[5]
Kasus Korupsi
[besut | besut sumber]Dinten Jumat, 22 februari 2013, Anas Urbaningrum resmi dipundadosaken tersangka korupsi déning Komisi Pemberantasan Korupsi (KPK). Anas dipuntuduh angsal hadhiyah utawi janji ingkang wonten gayutanipun kaliyan kawenanganipun minangka anggota DPR 2009-2014.[8] Anas dipundadoaken tersangka kasus korupsi pambangunan pusat pelatian pendidikan lan sekolah ulah raga nasional Bukit Hambalang, Jawa Kilen.[9]
Cathetan suku
[besut | besut sumber]- ↑ a b c Anas Urbaningrum dipunundhuh tanggal 22 Fèbruari 2013)
- ↑ a b c d Profil/Biografi Anas Urbaningrum Archived 2013-01-11 at the Wayback Machine. dipunundhuh tanggal 22 Fèbruari 2013)
- ↑ a b [Koran Suara Merdeka edisi 23 Fèbruari 2013, Semarang Anas "Menuju Monas"] dipunwaos tanggal 23 Fèbruari 2013)
- ↑ a b c d e f g h i j k l m n o p q r s t u v w Biografi Anas Urbaningrum, Dhémokrat dipunundhuh tanggal 23 Fèbruari 2013)
- ↑ a b c d Anas Urbaningrum dipunwaos tanggal 23 Fèbruari 2013)
- ↑ a b Biografi Anas Urbaningrum" Archived 2013-02-19 at the Wayback Machine. dipunwaos tanggal 23 Fèbruari 2013)
- ↑ a b c Piawai Memilih Kata Archived 2013-02-26 at the Wayback Machine. dipunundhuh tanggal 22 Fèbruari 2013)
- ↑ Kekuasaan Anas Urbaningrum Berakhir di Dhémokrat dipunundhuh tanggal 23 Fèbruari 2013)
- ↑ KPK Persilahkan Anas Urbaningrum Ungkap Bukti Kasus Hambalang dipunundhuh tanggal 26 Fèbruari 2013)