Melbourne
| Melbourne | |
|---|---|
 | |
| Land | Australia |
| Federal state | Victoria |
| Altore | 31m súper li mare |
| Area | 9 993 km² |
| Habitantes | 4 917 750 (2021) |
| Densitá de habitantes | 492,119 per km² |
Melbourne es un cité in Australia. It es li cité capital del federal state Victoria in li sud-ost de Australia. It es un costal cité, situat al nord e ost del bay Port Phillip, along li fluvie Yarra River. Su area metropolari extende al peninsul Mornington in li sud, li montania Dandenong al ost, e li montania Macedon al nord, ocupante 9 993km2 in total.
Ye 2021, hayat 4 778 716 habitantes in li area metropolari de Melbourne. It es li duesim max grand cité de Australia, detra Sydney.
Durante adminim 40 000 annus, li area sur quel Melbourne es situat ha esset li hem de popules indigeni. Li nationes Kulin es li traditional nationes del area, ex quel Melbourne ocupa landes del Wurundjeri (in li nord), Bunurong (in li sud) e Wathaurong (in li west) popules. Melbourne es anc conosset quam Naarm in li lingues traditional de ti popules.
Li modern cité de Melbourne esset fundat in li annu 1835 de colonisatores de Van Diemen's Land (nu Tasmania). It esset nominat secun li prim-ministre del Reyatu Unit, William Lamb, li duesim Vicomto Melbourne. Reyessa Victoria proclamat it un cité in 1847, e solmen quar annus plu tard, Melbourne devenit li capital del nov colonia de Victoria, pos que to separat de Nov Sud Gallia. Aure esset decovrit in li land al nord-west de Melbourne in 1851, e li cité experit un grandissim inrichation quel transformat it ad in un del cités max grand e rich in li munde. Pos li federation de Australia in 1901, Melbourne servit quam li capital del nov state til que Canberra esset constructet e devenit li nov capital in 1927. In li annus 1930, Sydney viceat Melbourne quam li max grand cité in Australia. Támen, Melbourne hodie resta un important centre comercial, conosset anc pro su contributiones culturales, por exemple in li artes e in sport.
Sport
[modificar | redacter fonte]Melbourne es considerat li sportal capital de Australia, pro li important rol quel it ha havet in li developation de sportes in Australia, e li gran diversitá e popularitá de sportes ludet ta.
Melbourne ha esset li location de mult grand international sportal evenimentes, e continua talmen. Por exemple, in 1956 li cité tenet li Olimpic Ludes del Estive; it esset li prim vez que li Ludes hat esset éxter Europa o li Unit States de America. In 2006, Melbourne tenet li Commonwealth Ludes. Chascun annu, li Australian Open ténnis-torney eveni in Melbourne. Ti torney es inter li quar max important ténnis competitiones del munde. Hay anc un annual eveniment del motorsport-serie Formul Un.
In Melbourne, li max popular sport es li football de australian regules (in Anglesi, Australian rules football). Li max grand liga de football australian es li Australian Football Liga (AFL), quel esset fundat in 1896 quam li Victorian Football Liga (VFL), e comensat expander a altri states de Australia solmen in li 1980s. Mem nu, 9 del 18 truppes in li AFL es basat in Melbourne, e un plu es basat in li vicin cité de Geelong. Chascun annu, li Grand Final del AFL es ludet in li Melbourne Cricket Ground, un grandissim stadion con plu quam 100,000 sedes.
Cricket es anc un sport con un long historie e grand popularitá in Melbourne. Li Melbourne Cricket Club esset fundat solmen tre annus pos li colonisation del cité. Ti organisation administra li Melbourne Cricket Ground, quel es notabil pro har tenet li prim international match (in 1877) e li prim international match de un die (in 1971) in li munde; ambi matches esset ínter Australia e Anglia.
Altri sportes con quelc popularitá in Melbourne include rugby, football, basketball e netball.