Ven

Ven
Instantia de: insula
Coordinatas: 55°54'21"N, 12°41'42"E
Area: 7,5 km²
Altitude: 39 m
Paises: Svedia
ID VIAF: [235690098]
ID GeoNames: [2663383]
Commons: Ven (Oresund)

Ven es situate in le stricto Öresund

Ven es un parve insula svedese situate in le stricto Öresund inter Svedia e Danmark. Le distantia a Svedia es 4,5 km e a Danmark 8,5 km. Le insula pertine al communa Landskrona in le provincia Scania in le sud de Svedia. Illo es 4,5 km longe e 2,5 km large e le area es solmente 7,5 km². Illo ha circa 350 habitantes. Ven es cognoscite pro le costa multo scarpate appellate “Backafall”. Le gentilhomine e scientista danese Tycho Brahe edificava in le seculo 16 su castello Uranienborg e su observatorio Stjerneborg in le centro del insula. Le ecclesia de Sancte Ibb bellemente situate sur le limine del scarpa anque es ben cognoscite.

Tourismo

Location de 1500 bicyclettas.

Ven es multo popular pro excursiones a bicycletta, e quando il face belle tempore durante le estate, centenas de bicyclistas arriva cata die. Ab Svedia on pote prender un ferry-boat in Landskrona tote le anno [1] ma in le estate il anque ha connexiones ab Copenhagen in Danmark. [2] Archived 2006-06-29 at the Wayback Machine Un billet de retorno ab Landskrona costa 80 SEK (2006). Le viage dura vinti minutas. Le costo de locar un bicycletta es 60 SEK (2006). (Transportar su proprie bicycletta sur le ferry-boat costa 70 SEK.) Il es possibile bicyclar circum tote le insula, circa 12 km, sur parve vias e sentieros, sin autos, in un paisage multo belle. Ubique cresce multe flores e le vista verso Svedia e Danmark es impressionante.

Geographia

Le insula es un plateau que se altia usque a 39 metros super le mar. Iste summitate manca de nomine ma illo es situate non distante del capo al sud. Le paisage es fertile gratias al climate multo benigne. Le solo consiste de argilla morenic e es ben conveniente pro agricultura. Hic uvas es cultivate desde alcun annnos e on pote con successo cultivar tritico dur (Triticum durum). Le insula es un del locos situate le plus al nord in Europa ubi on pote cultivar iste cereal que es usate pro pasta. Pasta de Ven es fabricate sur le insula e naturalmente on pote comprar lo in botecas.

Natura

Malva alcea

Ubique sur le collinas il ha multe flores e un flor, Malva alcea, es specialmente connectite al insula gratias al canto amate “Flicka från Backafall”. Illo flora in julio ma p.f. observa que iste flor es protegite per leges de protection del natura e il non es permittite colliger lo. Le texto del canto es scribite per Gabriel Jönsson e le musica es componite per Gunnar Turesson. Il non ha silvas de coniferas sur Ven ma multe arbores foliose que a vices da un umbra agradabile pro le bicyclistas.

Historia

Durante le epocha glacial le insula non existeva como insula ma esseva un parte de un isthmo(=lingua de terra inter duo cursos de aqua) que unificava Scania e le insula Själland de Danmark. Quando le glacie disgelava, le aqua del Baltico augmentava e le pression sur le isthmo augmentava usque le isthmo rumpeva. Restos de iste isthmo existe hodie in le collinas de Glumslöv in Scania e in Klampenborg in Danmark. Ven anque esseva un parte de iste isthmos.

Ven pertineva a Danmark usque a 1658, Pace de Roskilde. Le svedeses exigeva que anque Ven sia includite in le tractato de pace a causa de timor que le daneses alteremente volerea fortificar le insula. Alora le nomine esseva Hven e illo sempre habeva essite considerate como un parte de Själland. Ma le daneses habeva decidite alcun annos antea, in 1654, que Hven debeva pertiner al provincia de Helsingborg (Scania in Svedia) in vice del provincia de Hilleröd (Själland in Danmark) lo que le svedeses considerava como un certificato que Hven nunc debeva esser considerate como un parte de Svedia.

Mappa de Hven 1663

Le svedeses planava fortificar le insula con 2000 soldatos conjunctemente con artilleria ma le planos remaneva sur le tabuliero de designo. Le daneses occupava le insula durante ”Skånska kriget” (Le Guerra Scanic) (1676-79) ma post le guerra illo de novo esseva svedese. Postea le disveloppamento ha essite plus calme malgrado que periodos de forte presentia militar ha occurite durante le Guerras de Napoleon e le Secunde Guerra Mundial. Durante le annos 1930 circa 1300 personas viveva sur le insula, lo que probabilemente esseva le record. Hodie solmente circa 350 personas vive ibi tote le anno ma multe personas ha residentias estive ibi.

Edificios

Kyrkbacken con le ecclesia de Sancte Ibb

Ill ha duo ecclesias sur le insula, Allhelgonakyrkan (Le ecclesia de Omne Sanctos) e le Ecclesia de Sancte Ibb. Le Ecclesia de Omne Sanctos hodie es un museo del memoria de Tycho Brahe. Illo es situate in le medio del insula presso Uranienborg que esseva le domo de Brahe durante le annos 1576-1596. Le palatio esseva edificate durante le annos 1576-1580. In ille tempore tote le insula esseva le proprietate del gentilhomine Tycho Brahe. Hodie remane solmente muros basse. Il anque remane restos del observatorio Stjärneborg (le Castello del Stellas) que esseva situate partialmente sub le sol e on pote entrar ibi. Le ecclesia de Sancte Ibb esseva edificate in le annos 1200 e es situate sur le limine del scarpa al costa west con un vista magnific. Illo es un del plus populares del pais pro maritages.

Tycho Brahe

Tycho Brahe

Tycho Brahe (Scania le 14 de decembre 1546 – Praga le 24 de octobre 1601) esseva un astronomo danese importante, considerate como le fundator del astronomia observante moderne. Sur Ven, ille establiva le castello de Uranienborg, con un observatorio astronomic e un laboratorio alchimistic, e etiam un imprimeria de libros, un jardin con herbas medical, e Stjerneborg, un observatorio astronomic subterranee.

Orthographia

Wikimedia Commons ha files multimedia de: Ven

Post le reforma orthographic svedese in 1906 multe parolas svedese como hvad, hvem perdeva le h initial. Ma a Hven esseva permittite conservar lo usque a 1958 quando le autoritates decideva cancellar lo malgrado le protestos del inhabitantes. Anque hodie multe personas pote esser irritate quando on oblida scriber Hven ma p.ex. le posta fortunatemente accepta ambe orthographias.