Pita Grilk

Pita Grilk
skriuwer
persoanlike bysûnderheden
echte namme	Pita Louise Grilk
nasjonaliteit	Nederlânsk
berne	21 july 1905
berteplak	Skiermûntseach (Skiermûntseach)
stoarn	16 maaie 1980
stjerplak	Ljouwert (Fryslân)
etnisiteit	Frysk
wurk
taal	Skiermûntseagersk
sjenre	poëzij
perioade	2e helte 20e iuw
bekendste   wurk(en)	De Lytje Pole
jierren aktyf	1961 – 1980
offisjele webside
n.f.t.

Pita Grilk (folút: Pita Louise Grilk; Skiermûntseach, 21 july 1905 – Ljouwert, 16 maaie 1980) wie in Frysk dichteresse, dy't poëzij skreau yn har memmetaal, it Skiermûntseagerske dialekt.

Gedicht fan Pita Grilk op it strân fan Skiermûntseach, in ûnderdiel fan 'e Taalrûte dêre.

Libben

Grilk wie in dochter fan in Skiermûntseachske seekaptein by de keapfardij, Louw Grilk, en dy syn frou Pietje Schaafsma. Tegearre mei har suster Janet studearre hja oan in konservatoarium. Nei harren oplieding fêstigen de susters harren yn 1929 yn Ljouwert, dêr't Pita piano- en oargelles joech en har suster sjong- en spraakles. Grilk wie ek oargeniste fan de minnistegemeente fan Grou.

As dichteresse publisearre hja fersen yn har memmetaal, it Skiermûntseagersk. Ien fan har gedichten waard yn 2010 op in stien yn 'e Taalrûte fan Skiermûntseach ferivige. Yn dat gedicht tekenet hja de sfear fan it strân fan it eilân, dêr't in minske, konfrontearre mei de ûnbidigens fan 'e eleminten, net oars kin as him neatich fiele. Ek hat Grilk meiwurke oan 'e samling folksferhalen fan dr. Ype Poortinga en oan 'e earste wurdlist fan it Skiermûntseagersk, de Wezzenlist fan it Schiermonnikoogs, út 1968, fan Douwe Fokkema sr.

Grilk stoar op 16 maaie 1980 yn 'e âldens fan 74 jier. Hja waard op 21 maaie fan dat jier begroeven op Skiermûntseach. De beide susters wiene net ûnbemiddele; de feiling fan harren ynboel brocht yn 1983 ƒ 240.000 op.

Wurk

Boeken in bibleteek Skiermûntseach

• 1961 – It Swiere Akkeurd; Lastebleu; Wyldebleu (by de Fryske Akademy, Ljouwert)
• 1961 – Swyljen; It Jonge Hets; Eeunderwoois (by de Fryske Akademy)
• 1961 – Krimpe; In Minsk Allene; Aud Welkomtús (by de Fryske Akademy)
• 1961 – De Pole en de Minsken (by de Fryske Akademy)
• 1963 – De Lytje Pole (by Utjouwerij Miedema, Ljouwert)

Boarnen, noaten en referinsjes

Boarnen, noaten en/as referinsjes:

referinsjes: boarnen: "Pita Grilk overleden", yn: de Ljouwerter Krante, 20 maaie 1980. "Dichteres Pita Grilk uit Schier overleden", yn: it Nijsblêd fan it Noarden 21 maaie 1980. "Voor jaarsreis met trieste bestemming Schiermonnikoog", yn: it Nijsblêd fan it Noarden, 2 juny 1980. "En als je de dames zag, dan zou je ze een stuiver geven", yn: de Ljouwerter Krante, 25 febrewaris 1983. "Bijna kwart miljoen geboden voor inboedel van zusters Grilk", yn: de Ljouwerter Krante, 4 maart 1983.