2000-er jierren

2000-er jierren

It World Trade Center yn New York stiet yn 'e brân nei de oanslaggen fan 11 septimber 2001.

<< 1990-er jrn  •  2000-er jrn  •  2010-er jrn >>

2000   •   2001   •   2002   •   2003   •   2004 2005   •   2006   •   2007   •   2008   •   2009

De 2000-er jierren, ek oantsjut as de jierren 2000, wiene in desennium fan 'e 21e iuw neffens de Gregoriaanske kalinder. Rekkenkundich sjoen begûn it op 1 jannewaris 2001 en duorre it oant en mei 31 desimber 2010, mar yn 'e regel wurdt ornearre dat it duorre fan 1 jannewaris 2000 oant en mei 31 desimber 2009. Dit desennium waard fierhinne behearske troch de terroristyske oanslaggen op 11 septimber 2001 yn New York en Washington, D.C., en de ûntjouwings dy't dêrút fuortkamen, lykas de Oarloch yn Afganistan, de Irakoarloch en de wrâldwide Oarloch tsjin it Terrorisme. Dêrnjonken kamen yn 'e 2000-er jierren foar it earst de sosjale media en it ferskynsel realitytillefyzje op. De lêste trije jier stiene boppedat sterk yn it teken fan 'e Bankekrisis, de slimste ekonomyske krisis sûnt de Grutte Depresje fan 'e 1930-er jierren.

Oersjoch

De 2000-er jierren foarmen it begjin fan ienentweintichste iuw en it trêde milennium. Wat begûn mei algemien optimisme, waard al rillegau bedoarn troch de ekonomyske depresje dy't feroarsake waard troch de dot-comkrisis. It waard noch helte minder doe't islamistyske terroristen yn 2001 de oanslaggen fan 11 septimber diene op it World Trade Center yn New York en it Pentagon yn Washington, D.C., dêr't 2.996 deaden by foelen. Doe't it Taliban-regear fan Afganistan wegere en leverje Osama bin Laden út, dy't as it brein efter de oanslaggen sjoen waard, begûnen de Feriene Steaten en harren bûnsgenoaten de Oarloch yn Afganistan, wêrby't it Taliban-rezjym al rillegau de macht ûntnommen waard. Nei dy oerwinning ûntjoech him lykwols in oanhâldende guerriljastriid fan 'e Taliban dy't harren yn it ûnherberchsume binnenlân fan Afganistan weromlutsen hiene, tsjin it troch it Westen stipe nije demokratysk keazen regear fan it lân en de Westerske troepen dy't dat regear oerein holden.

De Westerske ynfal yn Afganistan wie ek it begjin fan 'e Oarloch tsjin it Terrorisme, dy't benammen rjochte wie tsjin 'e dieders fan 'e oanslaggen op 11 septimber. De wichtichste terroristyske islamistyske organisaasje wie yn 'e 2000-er jierren al-Qaida, dat laat waard troch Osama bin Laden. De striid tsjin al-Qaida en dêrmei ferbûne groepen wie beslist net iensidich, mei't de terroristen it hiele desennium troch oanslaggen op Westerske doelen diene, wêrby't faak tsientallen en soms hûnderten minsken de dea fûnen. De slimste terroristyske oanslaggen wiene de bomoanslaggen op Baly (2002), de bomoanslaggen yn Istanbûl (2003), de bomoanslaggen yn Madrid (2004), de bomoanslaggen yn Londen (2005), de bomoanslaggen yn Amman (2005), de bomoanslaggen op de Jezidyske mienskippen (2007) yn noardlik Irak en de oanslaggen yn Bombay (2008).

Op 'e falske beskuldiging dat de Iraakske diktator Saddam Hoessein bannen ûnderhold mei al-Qaida en fanwegen de bewearing dat er massaferneatigingswapens hie, wat letter ek net wier bliek te wêzen, fierden de Feriene Steaten en harren bûnsgenoaten yn 2003 in ynvaazje fan Irak út, wêrby't it ûnmeilydsume Baätrezjym fan Saddam Hoessein ûnder fuotten helle waard. Dat bliek lykwols noch mar it begjin te wêzen fan 'e Irakoarloch, dy't it hiele fierdere desennium duorje soe, mei guerriljastriid en soms iepen oarlochfiering tsjin soennityske rebellen dy't stipe waarden troch al-Qaida en soartgelikense terroristyske organisaasjes.

De Oarloch tsjin it Terrorisme wie ekstreem kontroversjeel yn it Westen, mei't sawol binnen de Feriene Steaten as dêrbûten kanttekenings pleatst waarden oangeande de rjochtfeardiging foar dizze 'oarloch', dy't eins foar it meastepart yn it ferburgene fierd waard troch feilichheidstsjinsten. Ditte en de botte wize fan hâlden en dragen dy't it Amerikaanske regear fan George W. Bush foar de moade hie, laten ta in grut ferlies oan stipe en oansjen yn 'e wrâld foar de Feriene Steaten. Dat boaze allinnich noch mar fierder oan doe't de beskuldigings fan it besit fan massaferneatigingswapens oan it adres fan it rezjym fan Saddam Hoessein nearne op basearre blieken te wêzen, en doe't it regear-Bush it marteljen (waterboarding) fan finzennommen terroristen besocht goed te praten.

Yn 'e 2000-er jierren kamen de sosjale media op.

Oare wapene konflikten yn 'e 2000-er jierren omfiemen de oanhâldende striid yn it Midden-Easten, tusken Israel en de Arabieren. De Twadde Intifada, in folksopstân yn 'e besette Palestynske gebieten tsjin 'e Israelyske militêre oerhearsking, duorre fan 2000 oant 2005. Yn 2006 briek de Libaneeske Oarloch út tusken Israel en de sjiïtyske milysje Hezbollah. En yn 2008-2009 focht Israel de bloedige en folslein nutteleaze Gaza-oarloch út yn 'e Gaza-stripe, mei de militante Palestynske groepearring Hamas.

Yn 'e Kaukasus einige de Twadde Tsjetsjeenske Oarloch yn 2000 mei de werovering troch it Russyske leger fan 'e opstannige dielrepublyk Tsjetsjeenje, mar dêrnei briek der yn it gebiet in guerrilja-oarloch út. Yn 2008 late in Georgysk besykjen om 'e separatistyske regio Súd-Osseesje te weroverjen ta de koarte Russysk-Georgyske Oarloch, wêrby't Georgje oertsjûgjend ferslein waard. Yn Afrika kaam yn 2000 in ein oan 'e Eritreesk-Etiopyske Oarloch, yn 2002 oan 'e Sierraleöanske Boargeroarloch en yn 2003 oan 'e ektreem bloedige Twadde Kongoleeske Oarloch. Datselde jiers briek lykwols de Oarloch yn Darfoer út, dy't mank gie mei de Genoside yn Darfoer fan it Sûdaneeske regear tsjin 'e boargerbefolking fan dy westlike regio. Presidint Omar al-Basjir waard dêrfoar yn 2009 troch it Ynternasjonaal Strafhôf oanklage.

Op it mêd fan natoerrampen wie de Aziatyske Tsûnamy, dy't nei in seebeving op Twadde Krystdei 2004 de kusten fan lannen oan 'e Yndyske Oseaan trof, de grutste ramp dy't de wrâld yn lange tiid oerkommen wie. Dêrby fûnen mear as 250.000 minsken de dea, wylst teminsten 1 miljoen oaren dakleas rekken. In oare grutte natoerramp wie de orkaan Katrina, dy't yn 2005 de Amerikaanske stêd New Orleans ûnder wetter sette. Doe't it regear fan 'e Republikeinske presidint George W. Bush neitiid faalde om fluch en effektyf yn te gripen, rûn it dêrtroch slimme skea op yn 'e Amerikaanske publike opiny. Dat spile beslist mei doe't by de presidintsferkiezings fan 2008 de Demokratyske Partij wer oan 'e macht brocht waard, yn 'e persoan fan Barack Obama, de earste negroïde presidint fan 'e Feriene Steaten.

Ekonomysk sjoen wie de wichtichste feroaring yn 'e 2000-er jierren de langferwachte trochbraak fan 'e Folksrepublyk Sina, dy't hast it hiele desennium troch in ekonomyske groei fan dûbele sifers trochmakke. Yn mindere mjitte belibben ek lannen as Yndia en Brazylje in ekonomyske oplibbing. Dat flugge byheljen troch eardere ûntwikkelingslannen fan ekonomyen dy't foarhinne de wrâld dominearre hiene, late oan 'e ein fan it desennium ta it oanwaaksen fan proteksjonisme yn 'e Westerske wrâld. Fierders droech de groei fan it ynternet yn 'e 2000-er jierren sterk by oan 'e globalisearring, dy't fluggere kommunikaasje tusken ferskillende parten fan 'e wrâld mooglik makke. Ek it húsriem wurden fan mobile tillefoans en de opkomst fan 'e sosjale media spilen dêrby in rol. It lêste trêdepart fan 'e 2000-er jierren waard behearske troch in ekonomyske depresje, dy't yn it neijier fan 2007 as in kredytkrisis begûn yn 'e Feriene Steaten, en him dêrwei as in oaljeplak oer de rest fan 'e wrâld útwreide. Dy saneamde Bankekrisis wie de slimste ekonomyske krisis sûnt de Grutte Depresje fan 'e 1930-er jierren, en soe yn Jeropa tsien jier oanhâlde.

Under de Twadde Tsjetsjeenske Oarloch bedobje Russyske soldaten de liken fan fermoarde Tsjetsjenen yn in massagrêf (febrewaris 2000).

De Fjoerwurkramp yn Ynskedee.

Wichtichste foarfallen

2000

• 14 jannewaris - Op it hichtepunt fan 'e Ynternetbûl (dot-com bubble) slút de Dow Jones-yndeks op 11.722,98 punten.
• 30 jannewaris - It ferkearsfleantúch Kenya Airways-flecht 431 stoart foar de kust fan Ivoarkust del yn 'e Atlantyske Oseaan, wêrby't 169 minsken omkomme.
• 31 jannewaris - It ferkearsfleantúch Alaska Airlines-flecht 261 stoart foar de kust fan 'e Amerikaanske steat Kalifornje del yn 'e Stille Oseaan, wêrby't 88 minsken omkomme.
• 9 febrewaris-maart - By de slimste wettersneed yn Mozambyk yn 50 jier komme 800 minsken om.
• 12 maaie - Yn it Fryske Drachten ûntstiet in grutte brân by ôffalferwurker ATF, wêrby't 400 ton gemyske smoargens yn reek opgiet.
• 13 maart - Ekwador skaft de Ekwadoraanske sucre ôf en fiert de Amerikaanske dollar yn as offisjele en iennichste muntienheid.
• 22 april - Yn in oerfal dy't foar moarnsdage útfierd wurdt, helje aginten fan 'e Amerikaanske federale oerheid de 6-jierrige Elián González út it hûs fan syn omke yn Miami, mei as doel om him te werienjen mei syn heit op Kuba. Dêrmei komt in ein oan ien fan 'e bekendste en meast problematyske fâdijsaken út 'e Amerikaanske skiednis.
• maaie - De Twadde Tsjetsjeenske Oarloch einiget mei de ferovering troch Russyske troepen fan 'e opstannige dielrepublyk Tsjetsjeenje.
• 4 maaie - It earste foarkommen fan it ILOVEYOU-kompjûterfirus op 'e Filipinen, dat him dêrnei hiel fluch wrâldwiid ferspriedt.
• 4 maaie - By in ierdbeving fan 7,6 op 'e skaal fan Richter op it Yndonezyske eilân Selebes komme 46 minsken om.
• 11 maaie - De befolking fan Yndia berikt de grins fan 1 miljard.
• 13 maaie - By de Fjoerwurkramp yn Ynskedee giet in opslachplak foar fjoerwurk de loft yn, wat liedt ta in geweldige ûntploffing en in grutte brân. Der komme 23 minsken om en der wurdt foar ƒ1 miljard oan skea oanrjochte.
• 18 maaie - Chen Shui-bian, de kandidaat fan 'e Demokratysk-Progressive Partij, wurdt keazen as presidint fan Taiwan. Dêrmei komt in ein oan in heale iuw fan Guomintang-bestjoer op it eilân.
• 25 maaie - It Israelyske leger beëiniget nei 22 jier de besetting fan syn 'feilichheidssône' yn súdlik Libanon.
• 4 juny - By in ierdbeving fan 7,9 op 'e skaal fan Richter op it Yndonezyske eilân Sumatra komme 103 minsken om.
• 18 juny - De twajierrige Eritreesk-Etiopyske Oarloch einiget yn in Etiopyske oerwinning.
• 1 july - De Øresundbrêge oer de Sont tusken Denemark en Sweden wurdt iepene foar ferkear.
• 1-22 july - Yn Fryslân wurdt it festival Simmer 2000 holden, mei de Grutte Friezereüny foar Friezen om utens.
• 7 july - In foarriedige fêstlizzing fan it minsklik genoom, as ûnderdiel fan it Human Genome Project, wurdt foltôge. De prestaasje wurdt bekendmakke troch de Amerikaanske presidint Bill Clinton.
• 8 july - Yn Fryslân wurdt de Slachtemaraton foar de earste kear holden, as ûnderdiel fan it festival Simmer 2000.
• 10 july - By de ûntploffing fan in lekkende ierdoaljepiiplieding yn súdlik Nigearia komme likernôch 250 minsken om dy't fergees oan branje besykje te kommen.
• 14 july - In krêftige sinneflam feroarsaket in geomagnetyske stoarm op 'e Ierde. Dit komt letter bekend te stean as it Foarfal fan Bastilledei.
• 25 july - In Concorde, Air France-flecht 4590, stoart fuort nei it opstiigjen yn Parys del op in hotel yn Gonesse, wêrby't alle 109 ynsittenden en 4 minsken yn it hotel omkomme. Dizze fleanramp betsjut it begjin fan 'e ein foar de Concorde, it iennichste ferkearsfleantúch dat troch de lûdsbarriêre giet.
• 12 augustus - De K-141 Koersk, in Russyske dûkboat, sinkt yn 'e Barentssee, wêrby't alle 118 bemanningsleden de dea fine.
• 14 augustus - De lêste tsaar fan Ruslân, Nikolaas II, en syn húshâlding, yn 1918 fermoarde troch de bolsjewiken, wurde hillich ferklearre troch de Russysk-Otterdokse Tsjerke.
• 26 septimber - De Grykske fearboat MS Express Samina sinkt foar de kust fan it eilân Paros yn 'e Egeyske See. Fan 'e mear as 500 opfarrenden komme 80 om it libben.
• 28 septimber - Yn 'e besette Palestynske gebieten begjint de Twadde Intifada, in folksopstân tsjin 'e Israelyske oerhearsking.
• 5 oktober - By de Joegoslavyske Revolúsje wurdt yn 'e Federale Republyk Joegoslaavje de diktator Slobodan Milošević ôfset.
• 12 oktober - By de bomoanslach op de USS Cole, troch islamistyske terroristen op in Amerikaanske marineskip yn 'e haven Aden, yn Jemen, komme 19 minsken om, ynkl. 2 dieders.
• 30 oktober - De lêste dei sûnder in minsklike oanwêzichheid yn 'e romte.
• 31 oktober - Fan dizze dei ôf wurdt it Ynternasjonaal Romtestasjon (ISS) oan ien wei troch bemanne.
• 31 oktober - It ferkearsfleantúch Singapore Airlines-flecht 006 komt op 'e Ynternasjonale Lofthaven Chiang Kai Shek yn 'e Taiwaneeske haadstêd Taipei yn botsing mei boumasinery. By de ramp komme 83 minsken om.
• 3 novimber - Yn Ingelân en Wales brekt nei dagen fan swiere rein grutte wettersneed út.
• 11 novimber - By de ramp fan Kaprun komme by in brân yn in tunnel yn 'e Eastenrykske Alpen 155 skyers en snowboarders om.
• 15 desimber - It slagget en set de trêde en lêste reäktor fan 'e kearnsintrale fan Tsjernobyl út. Dêrmei falt de sintrale einlings en te'n lêsten hielendal stil.
• 25 desimber - By de saneamde Krystbrân fan Luoyang, yn in winkelsintrum yn Sina, komme 309 minsken om.

It World Trade Center yn New York fuort nei't de sudertoer rekke is troch United Airlines-flecht 175.

Osama bin Laden, it brein efter de oanslaggen fan 11 septimber 2001.

It Pentagon yn Washington, D.C. nei de oanslaggen fan 11 septimber 2001.

2001

• 1 jannewaris - By de saneamde Kafeebrân yn Foalendam komme by in hommels útbrekkende brân yn Café De Hemel yn Foalendam 14 minsken om en reitsje nochris 350 oaren ferwûne.
• 13 jannewaris - By in swiere ierdbeving yn El Salvador komme 944 minsken om.
• 15 jannewaris - Wikipedia begjint.
• 16 jannewaris - Laurent Kabila, de diktator fan 'e Demokratyske Republyk Kongo, wurdt fermoarde troch ien fan syn eigen liifwachten.
• 20 jannewaris - George W. Bush wurdt ynaugurearre as de 43e presidint fan 'e Feriene Steaten.
• 20 jannewaris - Yn 'e Filipinen einiget de ôfsettingsproseduere tsjin presidint Joseph Estrada yn 'e Twadde People Power-revolúsje, dy't syn fise-presidinte Gloria Macapagal Arroyo oan 'e macht bringt.
• 26 jannewaris - By in swiere ierdbeving yn 'e Yndiaaske dielsteat Gûdjarat komme mear as 12.000 minsken om.
• 27 jannewaris - Yn 'e autonome republyk Sansibar iepenje Tanzaniaanske feilichheidstroepen it fjoer op demonstranten dy't protestearje tsjin 'e grutskalige stimbusfraude en wiidfersprate yntimidaasje ûnder de ferkiezings fan desimber 2000. Hjirby komme 35 minsken om it libben en reitsje 600 oaren ferwûne. Neitiid ûntflechtsje in protte Sansibarezen op fiskersboaten Tanzania en sykje beskûl yn 'e buorlannen.
• 9 febrewaris - De Amerikaanske dûkboat de USS Greeneville bringt yn 'e neite fan 'e Hawaï-eilannen by fersin it Japanske fiskersskip de Ehime-Maru ta sinken.
• 12 febrewaris - De romtesonde NEAR Shoemaker lânet op 433 Eros en wurdt dêrmei it earste romteskip dat op in asteroïde lânet.
• 13 febrewaris - By in swiere ierdbeving yn El Salvador komme teminsten 400 minsken om.
• 16 febrewaris - Yn it ramt fan 'e Iraakske ûntwapeningskrisis fiere Amerikaanske en Britske bommesmiters bombardeminten út op Irak om 'e loftdoelferdigening fan dat lân út te skeakeljen.
• 22 febrewaris - Yn Ingelân wurdt yn in slachthûs by bargen tongblier fêststeld: dat is it begjin fan 'e Tongblierkrisis, dy't it Feriene Keninkryk, Nederlân en dielen fan Frankryk oant ein juny yn syn greep hâlde sil.
• 29 febrewaris - By de treinramp fan Great Heck, yn noardlik Ingelân, komme 10 minsken om en reitsje 82 oaren ferwûne.
• 2 maart - Yn Afganistan begjinne de Taliban mei de ferneatiging fan 'e monumintale Boeda's fan Bamiyan.
• 23 maart - It âlde Russyske romtestasjon Mir wurdt út syn baan om 'e Ierde helle en stoart del yn 'e Stille Súdsee by Fidzjy.
• 1 april - By it Hainan-ynsidint komt in Sineeske Shenyang J-8-strieljager yn 'e loft sa deunby in Amerikaansk radarfleantúch, dat se inoar reitsje. It radarfleantúch is twongen en meitsje in needlâning op it Sineeske eilân Hainan. De bemanning wurdt dêrnei troch de Sineeske autoriteiten fêstholden.
• 1 april - Nederlân fiert as earste lân yn 'e wrâld it homohoulik yn.
• 1 april - De eardere Joegoslavyske presidint Slobodan Milošević jout him oer oan 'e plysje om troch it ynternasjonale Joegoslaavjetribunaal yn De Haach berjochte te wurden foar oarlochsmisdieden.
• 11 april - De bemanning fan it Amerikaanske radarfleantúch dat in needlâning makke hat op it Sineeske eilân Hainan, wurdt nei hûs ta stjoerd. Dêrmei komt in ein oan it Hainan-ynsidint.
• 28 april - De Amerikaanske miljonêr Dennis Tito set mei de Russyske Sojûz TM-32 út it Kosmodroom fan Bajkonoer, yn Kazachstan, ôf nei it Ynternasjonaal Romtestasjon (ISS). Hy is de earste romtetoerist.
• 6 maaie - De Amerikaanske miljonêr Dennis Tito keart mei de Sojûz TM-31 fan it Ynternasjonaal Romtestasjon (ISS) werom nei de Ierde en beëiniget dêrmei de alderearste romtefakânsje.
• 7 maaie - Yn 'e Bosnyske stêd Banja Luka wurdt besocht en meitsje in begjin mei de weropbou fan 'e ferwuostge Ferhadija-moskee. De seremoanje, dêr't 300 Bosnyske Moslims op jierren foar útnûge binne, rint lykwols út op in fiasko as der in opskuor ûntstiet fan nasjonalistyske Bosnyske Serven dy't de Moslims mei stiennen bekûgelje en op harren yn slane.
• 24 maaie - De Sjerpa Temba Tsheri wurdt mei 16 jier de jongste persoan ea dy't de top fan 'e Mount Everest berikt hat.
• 24 maaie - By de ramp yn de Versailles-trouseal komme yn Jeruzalim 23 minsken om en reitsje 380 lju ferwûne as de trêde ferdjipping fan in gebou fan fjouwer ferdjippings ynstoart.
• 1 juny - De moard op de Nepaleeske keninklike famylje wurdt útfierd troch kroanprins Dipendra, dy't mei in mitrailleur it fjoer iepenet op syn eigen famyljeleden en dêrby 10 minsken deadet, ynkl. syn heit, kening Birendra fan Nepal. Dipendra, dy't neitiid de hân oan himsels slacht, stjert trije dagen letter yn it sikehûs oan syn selstabrochte ferwûnings.
• 1 juny - In selsmoardoanslachdogger fan 'e militante Palestynske Hamasbeweging bringt 21 minsken om by in bomoanslach op de Dolphinarium-diskoteek yn 'e Israelyske stêd Tel Aviv.
• 5-9 juny - De tropyske stoarm Allison smyt 900 mm rein út oer de Amerikaanske stêd Houston, wêrby't 22 minsken omkomme en foar mear as $5 miljard oan skea oanrjochte wurdt.
• 7 juny - De Amerikaanske presidint George W. Bush ûndertekenet de Economic Growth and Tax Relief Reconciliation Act of 2001, de earste yn in rige belestingferlegings dêr't inkeld de riken fan profitearje, de saneamde belestingferlegings fan Bush.
• 23 juny - By in swiere ierdbeving yn súdlik Perû, fan 8,4 op 'e skaal fan Richter, folge troch in ferwuostgjende tsûnamy, komme teminsten 75 minsken om en reitsje 2.687 lju ferwûne.
• 2 july - It earste kompakte keunsthert wurdt ymplantearre by de Amerikaan Robert Tools.
• 3 july - It ferkearsfleantúch Vladivostok Air-flecht 352 stoart koart foar de lâning op 'e lofthaven fan 'e Sibearyske stêd Irkûtsk del, wêrby't 145 minsken omkomme.
• 7 july - It rasse-opskuor fan Bradford brekt út yn 'e Ingelske stêd Bradford nei't leden fan it rasistyske Nasjonaal Front in man fan Súdaziatysk komôf delstekke by in bar.
• 16 july - De Russyske Federaasje en de Folksrepublyk Sina slute it Sineesk-Russysk Freonskipsferdrach.
• 20-22 july - Yn it Italjaanske Genua fynt de 27e G8-top plak. De anty-globalisearringsbeweging organisearret massale demonstraasjes dy't útrinne op in konfrontaasje mei de plysje. De demonstrant Carlo Giuliani wurdt dêrby deade troch in plysjeman. Ferskate oaren reitsje slim ferwûne by in plysje-oanfal op in skoallegebou dat troch de demonstranten as haadkertier brûkt wurdt.
• 24 july - De Tamyl Tigers fiere de oanfal op de Ynternasjonale Lofthaven Bandaranaike út yn 'e Srylankaanske stêd Kolombo. Dêrby wurdt foar $500 miljoen oan skea oanrjochte.
• 24 july - Yn Bulgarije wurdt Simeon II fan Saksen-Coburg-Gotha, dy't as bern de lêste kening fan Bulgarije wie, ynsward as de demokratysk keazen 48e premier fan it lân.
• 1 augustus - Roy Moore, in Amerikaanske rjochter fan it Heechgerjochtshôf fan Alabama, lit in plakette mei dêrop de Tsien Geboaden oanbringe yn syn heechgerjochtsgebou. Dat liedt ta in rjochtsaak wêrby't er twongen wurdt om dy plakette fuort te heljen en úteinlik ek ta syn eigen ôfsetting as rjochter.
• 9 augustus - By de bomoanslach op in Sbarro-restaurant yn Jeruzalim fiert in militante Palestyn in selsmoardoanslach út op in restaurant yn Jeruzalim, wêrby't 15 minsken omkomme en 130 lju ferwûne reitsje.
• 10 augustus - By de oanslach op in trein yn Angoala, troch de rebellebeweging UNITA yn it ramt fan 'e Angoleeske Boargeroarloch, komme 252 minsken om.
• 25 augustus - De Amerikaanske sjongster Aaliyah en ferskate meiwurkers fan har platemaatskippij komme om as harren oerladen fleantúch delstoart, koart nei it opstiigjen fan it Fleanfjild Marsh Harbour, yn 'e Bahama's.
• 3 septimber - Yn 'e Noardierske haadstêd Belfast begjinne militante protestanten yn it ramt fan it skeel oer Holy Cross in besingeling fan 'e roomske Holy Cross-basisskoalle foar famkes. De kommende 11 wiken moatte roomske âldelju harren dochters nei skoalle bringe tusken in dûbele hage fan opskuorplysje troch dy't de hûnderten skellende en flokkende protestantske demontranten op in ôfstân hâldt.
• 9 septimber - Yn noardlik Afganistan wurdt Achmed Sjah Massûd, de lieder fan 'e Noardlike Alliânsje, dy't tsjin 'e islamistyske diktatuer fan 'e Taliban fjochtet, by in oanslach fermoarde troch terroristen fan al-Qaida dy't harren foardogge as in tillefyzjeploech.
• 9 septimber - By de metanoltrageedzje fan Pärnu komme yn 'e Estyske provinsje Pärnu 68 minsken om troch metanolfergiftiging.
• 10 septimber - De Amerikaanske minister fan Definsje Donald Rumsfeld jout in taspraak oer de $2,3 biljoen yn 'e begrutting fan syn ministearje dy't weirekke is. Hy wiist de burokrasy fan it Pentagon oan as de grutste bedriging foar de Feriene Steaten.
• 11 septimber - By de oanslaggen op 11 septimber 2001 brûke islamistyske terroristen yn 'e Feriene Steaten ferkearsfleantugen as wapens troch se te kapen en yn gebouwen te fleanen. American Airlines-flecht 11 en United Airlines-flecht 175 boarje har yn 'e noarder- en sudertoer fan it World Trade Center, in kantoargebou yn New York. Beide wolkekliuwers reitsje dêrby sa slim skansearre dat se net folle letter ynstoarte. American Airlines-flecht 77 boarret him yn it Pentagon, it gebou fan it Amerikaansk Ministearje fan Definsje, yn Washington, D.C. In fjirde fleantúch, United Airlines-flecht 93, stoart del yn in fjild by Shanksville, yn Pennsylvania, as de passazjiers tsjin 'e kapers yn opstân komme. Der falle yn totaal 2.996 deaden, ynkl. 19 dieders.
• 18 septimber-12 oktober - By de myltfjoeroanfallen yn 'e Feriene Steaten, stjoere terroristen brieven mei myltfjoerspoaren oan ferskate mediabedriuwen: ABC, CBS, NBC, de New York Post en de National Enquirer. Der komme 5 minsken om en nochris 17 lju reitsje ynfektearre.
• 20 septimber - Yn in taspraak foar de beide huzen fan it Amerikaanske Kongres ropt de Amerikaanske presidint George W. Bush de "Oarloch tsjin it Terrorisme" út.
• 21 septimber - Yn 'e Frânske stêd Toulouse ûntploft it gemyfabryk AZF, wêrby't 29 minsken omkomme en mear as 2.500 lju ferwûne reitsje.
• 27 septimber - By it Bloedbad fan Zug sjit Friedrich Leibacher yn it Switserske Zug 18 minsken del, fan wa't 14 omkomme, ear't er himsels tekoart docht.
• 1 oktober - Kasjmiereeske militanten dogge in in oanslach op it parlemint fan 'e Yndiaaske steat Djammû en Kasjmier. Dêrby komme 38 minsken om.
• 2 oktober - De Switserske loftfeartmaatskippij Swissair freget beskerming tsjin bankrot oan en set alle fleantugen oan 'e grûn. Dêrtroch geane 230 plande flechten net troch en komme wrâldwiid 18.000 passazjiers fêst te sitten.
• 4 oktober - It Russyske ferkearsfleantúch Siberia Airlines-flecht 1812 stoart ûnderweis fan Novosibirsk yn Sibearje nei Tel Aviv yn Israel del boppe de Swarte See. Dêrby komme 78 minsken om.
• 7 oktober - De Feriene Steaten, it Feriene Keninkryk, Spanje, Itaalje, Kanada en Austraalje begjinne de Oarloch yn Afganistan tsjin it Taliban-rezjym dêre, dat Osama bin Laden, it brein efter de oanslaggen op 11 septimber 2001 wegeret út te leverjen.
• 8 oktober - By de ramp op de Lofthaven Linate komme yn tichte mist in Cessna-sakefleantúch en in ferkearsfleantúch fan Scandinavian Airlines mei-inoar yn botsing op in lâningsbaan op 'e Italjaanske Lofthaven Linate, by Milaan. Alle 114 ynsittenden fan beide fleantugen en 4 minsken op 'e lofthaven komme om.
• 19 oktober - It skip de SIEV X komt ûnderweis nei Krysteilân te sinken, wêrby't 353 minsken ferdrinke.
• 23 oktober - Yn Noard-Ierlân set it paramilitêre Ierske Republikeinske Leger (IRA) útein mei ûntwapening.
• 23 oktober - Apple yntrodusearret de iPod.
• 25 oktober - Microsoft yntrodusearret it kompjûterprogramma Windows XP.
• 26 oktober - De Amerikaanske presidint George W. Bush ûndertekenet de USA PATRIOT Act, dy't de feilichheidstsjinsten yn it ramt fan 'e Oarloch tsjin it Terrorisme foech jout om op alderhanne manearen ynbrek te meitsjen op 'e privacy fan boargers.
• 4 novimber - De orkaan Michelle treft Kuba en fernielt dêr de rispinge. Tûzenen minsken reitsje dakleas.
• 7 novimber - De Belgyske nasjonale loftfeartmaatskippij Sabena giet fajyt.
• 10 novimber - Swiere rein soarget yn Algerije foar ierdferskowings, wêrby't 900 minsken omkomme.
• 12 novimber - It ferkearsfleantúch American Airlines-flecht 587 stoart del yn 'e New Yorkske wyk Queens, wêrby't alle 260 ynsittenden en 5 minsken op 'e grûn omkomme.
• 12 novimber - Yn it ramt fan 'e Oarloch yn Afganistan lûke de Taliban harren nei swiere Amerikaanske bombardeminten werom út 'e Agaanske haadstêd Kabûl.
• 14 novimber - Troepen fan 'e Noardlike Alliânsje, dy't stipe wurdt troch de Feriene Steaten, kinne yn it ramt fan 'e Oarloch yn Afganistan sûnder swierrichheden de Afgaanske haadstêd Kabûl besette, dy't twa dagen earder ferlitten is troch de tebekwikende Taliban.
• 2 desimber - It Amerikaanske bedriuw Enron giet fajyt. Dit is it grutste bankrot yn 'e skiednis fan 'e Feriene Steaten.
• 13 desimber - By in terroristyske oanfal op it parlemint fan Yndia komme 12 minsken om. As Yndia it buorlân Pakistan fan mandéligens oan 'e oanslach beskuldiget, liedt dit barren ta de Yndiaask-Pakistaanske Krisis (2001-2002).
• 19 desimber - Yn it ramt fan 'e Grutte Depresje fan Argentynje (1998-2002) brekt yn 'e Argentynske haadstêd Buenos Aires de Desimberopskuor út as it regear de bankrekkens fan 'e boargers befriest.
• 22 desimber - De Afgaanske presidint Boerhannûdin Rabbani, it haad fan it regear dat ynsteld is troch de Noardlike Alliânsje, draacht syn amt oer oan Hamid Karzai, dy't presidint wurdt fan in oergongsregear dêr't ek oare groepearrings yn fertsjintwurdige binne.
• 22 desimber - De islamistyske ekstremist Richard Reid besiket it ferkearsfleantúch American Airlines-flecht 63 delstoarte te litten troch eksplosiven ûntploffe te litten dy't er ferburgen hat yn syn skoech. Dat mislearret, en hy wurdt arrestearre.
• 29 desimber - By in brân yn it winkelsintrum Mesa Redonda, yn 'e Perûviaanske haadstêd Lima, komme teminsten 291 minsken om.

De euro wurdt yn 2002 de muntienheid fan 16 Jeropeeske lannen.

De Oarloch tsjin it Terrorisme wie in direkt gefolch fan 'e oanslaggen op 11 septimber 2001.

2002

• 1 jannewaris - Yn Andorra, Belgje, Dútslân, Eastenryk, it Fatikaan, Finlân, Frankryk, Grikelân, Ierlân, Itaalje, Lúksemboarch, Monako, Nederlân, Portegal, San Marino en Spanje wurdt de euro de wettige muntienheid.
• 17 jannewaris - In fulkaanútbarsting fan 'e Nyiragongo ferdriuwt yn 'e Demokratyske Republyk Kongo nei skatting 400.000 minsken fan hûs en hurd.
• 18 jannewaris - Nei alve jier komt der in ein oan 'e Sierraleöanske Boargeroarloch as de rebellen fan it Revolúsjonêr Feriene Front (RUF) einlings definityf ferslein wurde troch regearingsroepen.
• 2 febrewaris - De Nederlânske kroanprins Willem-Alexander boasket oan 'e ArgenynseMáxima Zorreguieta.
• 6 febrewaris - De Britske keninginne Elizabeth II fiert har gouden jubileum as monarch.
• 12 febrewaris - Yn De Haach begjint foar it Joegoslaavjetribunaal de rjochtsaak tsjin Slobodan Milošević, de eardere presidint fan 'e Federale Republyk Joegoslaavje.
• 22 febrewaris - Yn Angoala komt UNITA-lieder Jonas Savimbi om by gefjochten fan syn rebelleleger mei regearingstroepen. Syn dea makket de wei frij foar in fredesakkoart dêr't de 27 jier âlde Angoleeske Boargeroarloch mei beëinige wurde kin.
• 27 maart - By it Pesachbloedbad deadet in Palestynske selsmoardoanslachdogger 30 minsken yn in hotel yn 'e Israelyske stêd Netanya. Nochris 140 persoanen reitsje ferwûne.
• 2 april-10 maaie - Israelyske troepen belegerje yn Betlehim de Bertetsjerke, dêr't Palestynske militanten beskûl socht hawwe.
• 4 april - Nei 27 jier komt der in ein oan 'e Angoleeske Boargeroarloch, as de rebellen fan 'e UNITA harren deljouwe ûnder in fredesregeling.
• 9 april - Yn 'e Britske haadstêd Londen komme tsientûzenen lju ôf op 'e begraffenis fan keninginne-mem Elizabeth Bowes-Lyon.
• 15 april - It ferkearsfleantúch Air China-flecht 129 fljocht by min waar yn 'e neite fan 'e stêd Busan, yn Súd-Koreä, tsjin in berch oan. Dêrby komme 129 minsken om.
• 6 maaie - De Nederlânske populistyske politikus Pim Fortuyn wurdt yn Hilfertsom fermoarde troch miljeu-aktivist Volkert van der Graaf.
• 20 maaie - East-Timor wurdt ûnôfhinklik fan Yndoneezje.
• 25 maaie - It ferkearsfleantúch China Airlines-flecht 611 falt yn 'e loft útinoar en stoart del yn 'e Strjitte fan Taiwan, wêrby't alle 225 ynsittenden omkomme.
• 24 juny - By de Treinramp fan Igandu, yn 'e neite fan 'e Tanzaniaanske haadstêd Dodoma, komme 281 minsken om.
• 1 july - By de loftbotsing by Überlingen komme in Tupolev Tu-154-ferkearsfleantúch en in Boeing 757-frachtfleantúch yn 'e loft mei-inoar yn botsing boppe it Dútske plak Überlingen. Alle 71 ynsittenden fan beide fleantugen komme om.
• 1 july - It Statút fan Rome wurdt fan krêft en fêstiget dêrmei it Ynternasjonaal Strafhôf.
• 9 july - De Organisaasje fan de Afrikaanske Ienheid (OAU) wurdt opdoekt. Dêrfoar yn 't plak wurdt de Afrikaanske Uny oprjochte.
• 27 july - By de ramp op de loftshow fan Sknyliv stoart in Sûchoj Sû-27-strieljager del op it publyk fan in loftshow yn 'e Oekraïne. Dêrby komme 77 minsken om en reitsje nochris 543 ferwûne, wat it ta it slimste loftshowûngelok út 'e skiednis fan 'e loftfeart makket.
• 10 septimber - Switserlân wurdt as 190e lân lid fan 'e Feriene Naasjes.
• 19 septimber - By in steatsgreep yn Ivoarkust liedt generaal Robert Guéï in militêre rebûlje wêrby't presidint Laurent Gbagbo ôfset wurdt. Dit is it begjin fan 'e Earste Ivoriaanske Boargeroarloch.
• 26 septimber - De fearboat de MS Le Joola giet te sink foar de kust fan Gambia, wêrby't teminsten 1.863 opfarrenden omkomme.
• 27 septimber - East-Timor wurdt as 191e lân lid fan 'e Feriene Naasjes.
• 12 oktober - By de bomoanslaggen op Baly, troch islamistyske terroristen op twa nachtklubs yn it toeristyske útgeanssintrum fan Kuta, op it Yndonezyske eilân Baly, komme 204 minsken om, ynkl. 2 dieders.
• 17 oktober - De Israelyske minister fan Toerisme Rehavam Ze'evi wurdt by in oanslach fermoarde troch trije leden fan it Folksfront foar de Befrijing fan Palestina (PFLP).
• 23-26 oktober - By de gizeling yn it Dûbrovkateäter wurde yn 'e Russyske haadstêd Moskou 850 teäterbesikers gizele troch Tsjetsjeenske separatisten. De Russyske autoriteiten losse it probleem op troch in ûnbekend gas yn it fentilaasjesysteem fan it Dûbrovkateäter te pompen dêr't se de gizelnimmers mei bûten bewustwêzen bringe wolle. It ynazemjen fan it gas blykt lykwols foar in oansjenlik part fan 'e gizelders fatale gefolgen te hawwen. Der komme 173 minsken om, wêrûnder 133 gizelders en alle 40 gizelnimmers.
• novimber - Yn Hongkong brekt de SARS-epidemy út, in sykte dy't him al rillegau nei oare parten fan 'e wrâld ferspriedt.
• 7 novimber - By in referindum oer soevereiniteit wiist de befolking fan 'e Britske kroankoloanje Gibraltar massaal oansluting by Spanje ôf.
• 8 novimber - De Feilichheidsried fan de Feriene Naasjes nimt unanym Resolúsje 1441 oan, wêryn't Irak yn it ramt fan 'e Iraakske Untwapeningskrisis ûnder bedriging mei slimme konsekwinsjes oproppen wurdt om syn massaferneatigingswapens op te jaan.
• 13 novimber - Irak akseptearret FN-Feilichheidsriedresolúsje 1441.

It stânbyld fan 'e Iraakske diktator Saddam Hoessein yn Bagdad wurdt delhelle nei de Amerikaanske ynvaazje fan Irak, yn 2003.

Leden fan it Sûdaneesk Befrijingsleger (de rebellen) ûnder de Oarloch yn Darfoer.

2003

• 22 jannewaris - De Amerikaanske romtefeartorganisaasje NASA ûntfangt it lêste sinjaal fan 'e romtesonde Pioneer 10, dy't him op dit stuit op in ôfstân fan goed 12 miljard km fan 'e Ierde befynt.
• 1 febrewaris - By de weromkear yn de atmosfear fan 'e Ierde, oan 'e ein fan de missy STS-107, falt de space shuttle Columbia boppe Teksas útinoar. Alle 7 astronauten oan board (6 Amerikanen en in Israeliër) komme om.
• 4 febrewaris - De Federale Republyk Joegoslaavje hâldt op te bestean. Yn it plak dêrfan wurdt it Steatebûn fan Servje en Montenegro oprjochte.
• 15 febrewaris - Oeral yn de wrâld wurde demonstraasjes holden tsjin de Amerikaanske ynvaazje fan Irak, dy't sa massaal binne, dat se as grutste anty-oarlochsdemonstraasje út 'e skiednis fan 'e wrâld opnommen wurde yn it Guiness Book of Records.
• 19 febrewaris - By de fleanramp fan Kerman stoart in militêr fleantúch fan it type Iljûsjin Il-76 del bûten de Iraanske stêd Kerman, wêrby't 275 minsken omkomme.
• 26 febrewaris - Yn Sûdaan begjint de Oarloch yn Darfoer, nei't rebellegroepen yn Darfoer it yn 'e kant sette tsjin 'e diktatuer fan presidint Omar al-Basjir yn Kartûm.
• 27 febrewaris - De Bosnysk-Servyske politika Biljana Plavšić wurdt troch it Joegoslaavjetribunaal yn De Haach ta 11 jier finzenisstraf feroardiele foar har mandéligens oan oarlochsmisdieden dy't begien binne ûnder de Bosnyske Oarloch.
• 8 maart - By in referindum oer lidmaatskip fan 'e Jeropeeske Uny stimt de mearderheid fan 'e befolking fan Malta foàr.
• 12 maart - De progressive Servyske premier Zoran Đinđić wurdt yn Belgrado by in oanslach fermoarde troch Zvezdan Jovanović, in earder lid fan 'e geheime plysje fan 'e Federale Republyk Joegoslaavje.
• 12 maart - De SARS-epidemy wreidet him út fan Hongkong nei Fjetnam. De Wrâldsûnensorganisaasje (WHO) lit in wrâldwide warskôging útgean.
• 20 maart - It begjin fan 'e Irakoarloch: de Feriene Steaten, it Feriene Keninkryk, Spanje, Austraalje en Poalen fiere mei stipe fan û.m. Koeweit, Saûdy-Araabje, Bachrein en de Feriene Arabyske Emiraten de ynvaazje fan Irak út.
• 8 maart - By in referindum oer lidmaatskip fan 'e Jeropeeske Uny en de NATO stimt de mearderheid fan de befolking fan Sloveenje yn beide gefallen foàr.
• 9 april - Amerikaanske troepen nimme nei de Slach om Bagdad yn it ramt fan 'e ynvaazje fan Irak de Iraakske haadstêd Bagdad yn. Dêrmei meitsje se in ein oan it Baätrezjym fan diktator Saddam Hoessein.
• 11-13 april - By in steatsgreep yn Fenezuëla wurdt presidint Hugo Chávez ôfset en finzen nommen. Foar him yn 't plak wurdt Pedro Carmona presidint. As de befolking fan 'e Fenezolaanske haadstêd Caracas tsjin it nije rezjym yn opstân komt en de plysje dy rebûlje om 'e nocht besiket te ûnderdrukken, wit de Presidinsjele Garde, dy't trou bleaun is oan Chávez, it Miraflorespaleis te weroverjen sûnder dat der in skot lost wurdt. It rezjym fan Carmona stoart dêrnei yn as in kaartehûs en Chávez wurdt wer presidint.
• 12 april - By in referindum oer lidmaatskip fan 'e Jeropeeske Uny stimt de mearderheid fan 'e befolking fan Hongarije foàr.
• 14 april - De fêstlizzing fan it minsklik genoom, yn it ramt fan it Human Genome Project, komt ree, wêrby't 99% fan it minsklik genoom mei in wissichheid fan 99,99% fêststeld wurdt.
• 11 maaie - By in referindum oer lidmaatskip fan 'e Jeropeeske Uny stimt de mearderheid fan 'e befolking fan Litouwen foàr.
• 12 maaie - By in rige oanslaggen troch islamistyske terroristen op in wenmienskip foar bûtenlanners yn 'e Saûdyske haadstêd Ar-Riaad komme 30 minsken om.
• 17 maaie - By in referindum oer lidmaatskip fan 'e Jeropeeske Uny stimt de mearderheid fan 'e befolking fan Slowakije foàr.
• 21 maaie - By in swiere ierdbeving yn Algerije komme 2.200 minsken om.
• 1 juny - Belgje fiert it homohoulik yn.
• 8 juny - By in referindum oer lidmaatskip fan 'e Jeropeeske Uny stimt de mearderheid fan 'e befolking fan Poalen foàr.
• 10 juny - De Kanadeeske provinsje Ontario fiert it homohoulik yn.
• 14 juny - By in referindum oer lidmaatskip fan 'e Jeropeeske Uny stimt de mearderheid fan 'e befolking fan Tsjechje foàr.
• 30 juny - De stridende partijen yn 'e Demokratyske Republyk Kongo tekenje in fredesakkoart. Dêrmei komt nei fiif jier in ein oan 'e Twadde Kongoleeske Oarloch, dy't nei skatting oan 3,8 miljoen minsken it libben koste hat.
• 5 july - De SARS-pandemy, dy't op syn hichtepunt yn 37 lannen hearske, wurdt betwongen ferklearre troch de Wrâldsûnensorganisaasje (WHO). Yn totaal binne der 8.273 minsken siik rekke, dy't dat yn 775 gefallen net oerlibbe hawwe.
• 8 july - De Kanadeeske provinsje Britsk-Kolumbia fiert it homohoulik yn.
• 24 july - Yn it ramt fan 'e Regionale Helpmissy op de Salomonseilannen stjoere ferskate lannen yn 'e Stille Súdsee, ûnder lieding fan Austraalje, troepen nei de Salomonseilannen om dêr oarder werom te bringen, nei't der geweld útbrutsen is tusken ûnderskate etnyske groepen.
• 5 augustus - By de bomoanslach op it Marriott Hotel, troch islamistyske terroristen yn 'e Yndonezyske haadstêd Djakarta, komme 12 minsken om.
• 11 augustus - De NATO nimt it befel oer fan 'e International Security Assistance Force, de fredesmacht yn Afganistan. Dit is de earste grutte militêre operaasje ea dy't de NATO bûten Jeropa útfiert.
• 18 augustus - De Twadde Liberiaanske Boargeroarloch einiget mei de oerwinning fan 'e rebellen. Der komt in ein oan 'e diktatuer fan presidint Charles Taylor, dy't yn Nigearia yn ballingskip giet.
• 20 augustus - By in bomoanslach op it haadkertier fan 'e Feriene Naasjes yn 'e Iraakske haadstêd Bagdad falle 23 deaden, ûnder wa de spesjale FN-gesant yn Irak, de Brazyljaanske diplomaat Sergio Vieira de Mello, en de koördinator fan UNICEF yn Irak, de Kanadees Christopher Klein-Beekman.
• 27 augustus - De planeet Mars stiet tichter by de Ierde as ea yn 'e lêste 60.000 jier.
• 27 augustus - De Underhannelings fan de Seis Partijen begjinne, tusken Noard-Koreä, Súd-Koreä, de Feriene Steaten, de Folksrepublyk Sina, Ruslân en Japan. It doel is om in freedsume oplossing te finen foar it Noardkoreaanske nukleêre programma.
• 10 septimber - De Sweedske minister fan Bûtenlânske Saken Anna Lindh wurdt yn in warehûs yn Stokholm deastutsten troch de Servyske nasjonalist Mijailo Mijailović.
• 14 septimber - By in referindum oer lidmaatskip fan 'e Jeropeeske Uny stimt de mearderheid fan 'e befolking fan Estlân foàr.
• 15 septimber - Yn Ciudad Perdida, yn Kolombia, ûntfiere rebellen fan it Nasjonaal Befrijingsleger (ELN) 8 bûtenlânske toeristen, dy't nei 100 dagen as resultaat fan ûnderhannelings tusken de ELN en it Kolombiaanske regear frijlitten wurde sille.
• 20 septimber - By in referindum oer lidmaatskip fan 'e Jeropeeske Uny stimt de mearderheid fan 'e befolking fan Letlân foàr.
• 5 oktober - De Israelyske loftmacht fiert op Syrysk grûngebiet it bombardemint fan Ain as-Saheb út, op wat nei bewearings fan it Israelyske regear in basis fan 'e Palestynske militante organisaasje Islamityske Djihaad wêze soe.
• 15 oktober - Sina lansearret syn earste bemanne romteskip, de Shenzou 5.
• 24 oktober - De Concorde makket syn lêste kommersjele flecht. Dêrmei komt in ein oan it tiidrek fan ferkearsfleantugen dy't flugger as it lûd geane.
• 12 novimber - By in bomoanslach op it haadkertier fan 'e Italjaanske militêre plysje yn it Iraakske Nasirijah komme 17 Italjaanske militêren en 9 Iraakske boargers om.
• 15 en 20 novimber - By de bomoanslaggen yn Istanbûl, troch islamistyske terroristen op 2 synagogen, in filiaal fan 'e HSBC-bank en it Britske konsulaat yn de Turkske stêd Istanbûl, komme 57 minsken om.
• 23 novimber - De Georgyske presidint Edûard Sjevardnadze treedt ôf nei't as gefolch fan stimbusfraude by de parlemintsferkiezings de Roazerevolúsje útbrutsen is.
• 13 desimber - De Iraakske diktator Saddam Hoessein, dy't sûnt de oerweldiging fan syn lân yn begjin april ûnderdûkt sitten hat, wurdt yn Ad-Dâr troch Amerikaanske troepen ûntdutsen en oppakt.
• 19 desimber - Lybje stimt deryn ta om alle materialen, apparatuer en plannen te ferneatigjen dy't rjochte binne op 'e ûntwikkeling fan massaferneatigingswapens.
• 23 desimber - By de gasramp fan Chuandongbei komme by in eksploazje op it Chuandongbei-ierdgasfjild, by Chongqing yn Sina, teminsten 234 minsken om.
• 26 desimber - By in swiere ierdbeving yn 'e omkriten fan 'e Iraanske stêd Bam komme mear as 40.000 minsken om.

De Mars Exploration Rover Opportunity fan 'e NASA op Mars yn 2004.

Foto's fan 'e slachtoffers fan 'e Gizelingskrisis fan Beslan, yn 'e Russyske Kaukasus.

Op Twadde Krystdei 2004 kamen mear as 250.000 minsken om by de Aziatyske Tsûnamy.

2004

• 3 jannewaris - It ferkearsfleantúch Flash Airlines-flecht 604 stoart foar de kust fan Egypte del yn 'e Reade See, wêrby't alle 148 ynsittenden omkomme.
• 4 jannewaris - It Mars Exploration Rover-projekt fan 'e Amerikaanske romtefeartorganisaasje NASA giet fan start as de Spirit as de earste fan 'e 'rovers' súksesfol it oerflak fan 'e planeet Mars berikt om dêr ûndersyk te dwaan.
• 4 febrewaris - De Amerikaan Mark Zuckerberg rjochte it sosjaal medium Facebook op.
• 26 febrewaris - De Masedoanyske presidint Boris Trajkovski komt om as syn fleantúch delstoart yn 'e neite fan 'e Bosnyske stêd Mostar.
• 29 febrewaris - By in steatsgreep yn Haïty wurdt presidint Jean-Bertrand Aristide ôfset. Neitiid wurdt in interim-regear oansteld ûnder lieding fan Gérard Latortue.
• 2 maart - By in rige bomoanslaggen op sjiïtyske moslims dy't yn 'e Iraakske stêd Karbala de Asjoerabetinking hâlde, komme mear as 140 minsken om.
• 11 maart - By inkele bomoanslaggen, troch islamistyske terroristen op in trein yn 'e Spaanske haadstêd Madrid, komme 192 minsken om.
• 19 maart - De Kanadeeske provinsje Kebek fiert it homohoulik yn.
• 22 maart - Sjeik Achmed Jassin, de oprjochter en geastlik lieder fan 'e militante Palestynske Hamas-beweging, wurdt yn 'e Gaza-stripe fermoarde troch de Israelyske Loftmacht (mei ynset fan in gefjochtshelikopter).
• 28 maart - De orkaan Catarina, de earste tropyske sykloan ea registrearre yn 'e súdlike Atlantyske Oseaan, komt yn 'e Brazyljaanske steat Santa Catarina oan lân, feroarsaket dêr 11 deaden en rjochtet grutte skea oan.
• 29 maart - Estlân, Letlân, Litouwen, Slowakije, Sloveenje, Roemeenje en Bulgarije wurde lid fan 'e NATO.
• 8 april - Under ynternasjonale druk tekenje it regear fan Sûdaan en twa rebellegroepearrings de Oerienkomst foar in Humanitêr Sjitferbod, dy't foar in skoft soargje moat yn 'e Oarloch yn Darfoer.
• 17 april - Mei raketten ôfsketten út helikopters op in konfoai fan auto's yn 'e Gaza-stripe fermoardet it Israelyske leger Abdel Azyz al-Rantisi, in foaroanman fan 'e militante Palestynske Hamas-beweging.
• 24 april - By de referinda oer it Annanplan foar de weriening fan Syprus en Noard-Syprus stimme de Syprioatyske Turken yn Noard-Syprus foàr, wylst de Syprioatyske Griken yn Syprus it plan fersmite.
• 1 maaie - Estlân, Letlân, Litouwen, Poalen, Tsjechje, Slowakije, Hongarije, Sloveenje, Malta en Syprus wurde lid fan 'e Jeropeeske Uny.
• 17 maaie - De Amerikaanske steat Massachusetts fiert it homohoulik yn.
• 28 juny - De ynternasjonale koälysje dy't Irak beset, laat fan 'e Feriene Steaten, draacht de macht yn it lân oer oan it Iraaksk Interimregear.
• 30 juny - Yn Irak begjinne de tariedings foar de rjochtsaak tsjin 'e eardere diktator Saddam Hoessein, dy't oanklage wurdt foar oarlochsmisdieden en misdieden tsjin 'e minsklikheid.
• 1 july - De ûnbemanne romtesonde Cassini-Huygens berikt de planeet Saturnus.
• 14 july - It Kanadeeske territoarium Yukon fiert it homohoulik yn.
• 22 augustus - Wapene oerfallers stelle ferskate skilderijen út it Munch Museum yn 'e Noarske haadstêd Oslo, wêrûnder De Skreau.
• 24 augustus - Nei ôfreis fan 'e Ynternasjonale Lofthaven Domodedovo, yn Moskou, eksplodearret it ferkearsfleantúch Volga-AviaExpress-flecht 1303 yn 'e loft boppe de Russyske provinsje Tûla, wêrby't alle 43 ynsittenden omkomme. Inkele minuten letter eksplodearret in oar ferkearsfleantúch, Siberia Airlines-flecht 1047, boppe de provinsje Rostov, wêrby't alle 46 ynsittenden omkomme. It regear fan Ruslân ferklearret neitiid dat de ûntploffings feroarsake binne troch froulike Tsjetsjeenske selsmoardoanslachdoggers.
• 1-3 septimber - By de Gizelingskrisis fan Beslan hâlde islamistyske terroristen yn Beslan, yn de Russyske Kaukasus, in hiele skoalle yn gizeling. As it Russyske Leger oergiet ta in bestoarming fan it skoalgebou, wurde dêrby tanks, raketten en oare swiere wapens ynset, mei as gefolch dat mear as 385 minsken omkomme, wêrûnder 186 skoalbern en 148 oare gizelders.
• 7-18 septimber - De orkaan Ivan feroarsaket yn it Karibysk Gebiet en oan 'e Amerikaanske kust fan 'e Golf fan Meksiko 124 deaden en rjochtet foar $23,3 miljard oan skea oan.
• 16 septimber - De Kanadeeske provinsje Manitoba fiert it homohoulik yn.
• 24 septimber - De Kanadeeske provinsje Nij-Skotlân fiert it homohoulik yn.
• 8 oktober - By twa bomoanslaggen yn it Egyptyske baaiplak Taba, op it Sinaï-skiereilân, komme 34 minsken om en reitsje 171 oaren ferwûne. De slachtoffers binne foar it meastepart Israelyske toeristen.
• 29 oktober - De regearingslieders fan 'e lidsteaten fan 'e Jeropeeske Uny ûndertekenje yn Rome in oerienkomst oer in takom jier yn te fieren Jeropeeske Grûnwet.
• 2 novimber - By Amerikaanske presidintsferkiezings wurdt George W. Bush werkeazen as presidint fan 'e Feriene Steaten.
• 2 novimber - De Nederlânske regisseur Theo van Gogh wurdt yn Amsterdam fermoarde troch de islamistyske terrorist Mohammed Bouyeri.
• 5 novimber - De Kanadeeske provinsje Saskatchewan fiert it homohoulik yn.
• 22 novimber - Begjin fan 'e Oranje Revolúsje yn 'e Oekraïne, nei't by presidintsferkiezings de pro-Russyske kandidaat Viktor Janûkovitsj mei gebrûk fan stimbusfraude de pro-Westerske kandidaat Viktor Jûsjtsjenko ferslein hat.
• 14 desimber - Yn Frankryk wurdt it Millau-fiadukt oer de Delling fan 'e Tarn iepene, de heechste brêge fan 'e wrâld.
• 21 desimber - By in bomoanslach op 'e Amerikaanske basis Marez, by de Iraakske stêd Mosûl, komme 22 minsken om.
• 21 desimber - De Kanadeeske provinsje Nijfûnlân en Labrador fiert it homohoulik yn.
• 26 desimber - Nei in seebeving fan 9,3 op 'e skaal fan Richter wurde de kusten fan 'e Yndyske Oseaan troffen troch de Aziatyske Tsûnamy. Benammen noardlik Sumatra, yn Yndoneezje, en fierders Tailân, Maleizje, Birma, Sry Lanka, de Maldiven, Yndia en Bangladesj wurde slim troffen, hoewol't sels yn Somaalje noch deaden falle. Yn totaal komme der 230.000 oant 280.000 minsken om yn 14 ferskillende lannen.
• 30 desimber - By de brân yn de República Cromañón-nachtklub yn 'e Argentynske haadstêd Buenos Aires, komme 194 minsken om.
• 31 desimber - Yn 'e Taiwaneeske haadstêd Taipei wurdt Taipei 101 iepene, de heechste wolkekliuwer fan 'e wrâld, mei in hichte fan 510 m.

Yn 2005 komt de Amerikaanske stêd New Orleans grutdiels ûnder wetter te stean troch tadwaan fan 'e orkaan Katrina.

In Darfoereesk flechtlingekamp yn Tsjaad.

2005

• 5 jannewaris - Earis, de grutste dwerchplaneet yn it Sinnestelsel, wurdt ûntdutsen troch in team fan astronomen ûnder lieding fan Michael E. Brown.
• 7 jannewaris - By de treinramp fan Crevalcore komme yn Itaalje 17 minsken om.
• 14 jannewaris - De romtesonde Huygens lânet op Titan, de grutste moanne fan 'e planeet Saturnus.
• 20 jannewaris - George W. Bush wurdt foar syn twadde termyn ynaugurearre as presidint fan 'e Feriene Steaten.
• 8 febrewaris - Yn 'e troch Israel besette Palestynske gebieten komt de Twadde Intifada, in folksopstân tsjin 'e Israelyske oerhearsking, ta in ein.
• 14 febrewaris - Rafyk Hariri, de eardere premier fan Libanon, wurdt by in bomoanslach yn Beirût fermoarde. Behalven hysels komme ek 16 oare minsken om.
• 10 febrewaris - Noard-Koreä makket, by wize fan beskerming tsjin wat it beskôget as de oanhâldende agresje fan 'e Feriene Steaten, bekend dat it nukleêre wapens hat.
• 16 febrewaris - It Kyoto-protokol, in wrâldwiid ferdrach dat klimaatferoaring tsjingean moat, wurdt fan krêft.
• 24 maart - By de Tulperevolúsje yn Kirgyzje wurdt presidint Askar Akajev, dy't diktatoriale nigings fertoande, nei massale demonstraasjes fan 'e befolking ôfset en nei it bûtenlân ferdreaun.
• 28 maart - By in swiere ierdbeving fan 8,6 op 'e skaal fan Richter op it grutte Yndonezyske eilân Sumatra komme 1.314 minsken om en reitsje 1.146 oaren ferwûne. Benammen it lytsere eilân Nias, foar de Sumatraanske westkust, is swier troffen.
• 2 april - Nei in pontifikaat fan mear as in fearnsiuw komt yn Rome paus Jehannes Paulus II te ferstjerren.
• 9 april - De Britske kroanprins Charles wertrout mei de skieden Camilla Parker Bowles, mei wa't er al jierren in relaasje ûnderhâldt. Camilla kriget de titel 'hartoginne fan Cornwall' om har te ûnderskieden fan Charles syn earste frou, Diana, prinsesse fan Wales.
• 19 april - Kardinaal Joseph Ratzinger wurdt keazen as opfolger fan 'e ferstoarne paus Jehannes Paulus II. Hy komt op 'e Hillige Stoel ûnder de namme fan Benediktus XVI.
• 23 april - It earste filmke wurdt opladen op 'e fideowebside YouTube.
• 26 april - De lêste Syryske troepen lûke har werom út Libanon, wêrmei't nei 29 jier in ein komt oan 'e Syryske besetting fan Libanon.
• 13 maaie - By it Bloedbad fan Andijon wurde teminsten 200 minsken fermoarde as troepen fan it Oezbeekske Ministearje fan Binnenlânske Saken yn 'e stêd Andijon it fjoer iepenje op freedsume demonstranten.
• 29 maaie - By it referindum oer de Jeropeeske Grûnwet yn Frankryk stimt 54,7% fan 'e befolking tsjin.
• 1 juny - By it referindum oer de Jeropeeske Grûnwet yn Nederlân stimt 61,5% fan 'e befolking tsjin.
• 23 juny - De Kanadeeske provinsje Nij-Breunswyk fiert it homohoulik yn.
• 27 juny - Yn 'e rjochtsaak McCreary County v. American Civil Liberties Union docht it Amerikaansk Heechgerjochtshôf de útspraak dat in boerd oan 'e wand mei dêrop de Tsien Geboaden yn it gerjochtsgebou fan Pulaski County (Kentucky) yngiet tsjin 'e skieding fan tsjerke en steat yn 'e Feriene Steaten, en dat it boerd dêrom fuorthelle wurde moat.
• 3 july - Spanje fiert it homohoulik yn.
• 7 july - By bomoanslaggen yn Londen, troch islamistyske terroristen op it iepenbier ferfier yn 'e Britske haadstêd Londen, komme 56 minsken om, ynkl. 4 dieders.
• 7-11 july - De orkaan Dennis feroarsaket yn it Karibysk Gebiet en de súdeastlike Feriene Steaten 88 deaden en rjochtet foar $3,7 miljard oan skea oan.
• 20 july - Kanada fiert (lanlik) it homohoulik yn.
• 23 july - By in rige bomoanslaggen yn it Egyptyske baaiplak Sjarm al-Sjeich komme mear as 80 minsken om.
• 28 july - It Ierske Republikeinske Leger ferklearret de wapene kampanje fan 'e paramilitêre beweging, dy't sûnt 1969 oan 'e gong is, foar beëinige, en oarderet alle sellen om harren wapens yn te leverjen.
• 14 augustus - Underweis fan Syprus nei Atene fljocht it ferkearsfleantúch Helios Airways-flecht 522 tsjin in berch oan benoarden it Grykske plak Maraton. Alle 121 ynsittenden komme om.
• 16 augustus - It ferkearsfleantúch West Caribbean Airways-flecht 708 stoart del yn in ôfhandige krite fan Fenezuëla, wêrby't 160 minsken omkomme.
• 23 augustus - Under it saneamde Unilaterale Weromlûkingsplan ûntrommet Israel alle Joadske kolonistedoarpen yn 'e Gaza-stripe en inkele yn it Westjordaanlân (yn totaal 25).
• 24-30 augustus - De orkaan Katrina feroarsaket op 'e Bahama's en Kuba en yn 'e Amerikaanske steaten Floarida, Louisiana, Mississippy en Alabama 1.836 deaden en rjochtet foar $108 miljard oan skea oan. Dêrmei is it de djoerste natoerramp út 'e skiednis fan 'e Feriene Steaten. De measte stjergefallen en skea fine plak as by New Orleans de diken trochbrekke en de stêd derûnder strûpt.
  • 29 augustus - De orkaan Katrina komt by New Orleans oan lân yn 'e Feriene Steaten en set de stêd splis.
• 31 augustus - By de brêgeramp yn Bagdad komme yn 'e Iraakske haadstêd Bagdad 953 minsken om trochdat se ûnder de foet rûn wurde as der panyk útbrekt op 'e Al-Aäimma-brêge oer de rivier de Tigris.
• 7 septimber - De alderearste presidintsferkiezings yn Egypte dêr't mear partijen oan meidogge, wurde ûntsierd troch stimbusfraude, begien troch it rezjym fan 'e sittende presidint Hosni Mûbarak.
• 15-25 septimber - De orkaan Rita feroarsaket op 'e Turks- en Kaikoseilannen, de Bahama's, Hispanjoala en Kuba en yn 'e Amerikaanske steaten Floarida, Teksas en Louisiana teminsten 125 deaden en rjochtet foar $12 miljard oan skea oan.
• 12 septimber - It Israelyske leger lûkt him hielendal werom út 'e Gaza-stripe nei't alle Joadske delsettings dêre ûntromme en ferneatige binne.
• 19 septimber - Noard-Koreä stimt deryn ta om op te hâlden mei de ûntwikkeling fan nukleêre wapens yn ruil foar ynternasjonale help en gearwurking.
• 20 septimber - As de Deenske krante Jyllands-Posten kwetsende spotprinten fan 'e profeet Mohammed ôfdrukt, liedt dat ta grutte lulkens en in gewelddiedige opskuor yn 'e islamityske wrâld.
• 1 oktober - By de bomoanslaggen op Baly, troch islamistyske terroristen op doelen yn it baaiplak Kuta, op it Yndonezyske eilân Baly, komme 23 minsken om, ynkl. 3 dieders.
• 8 oktober - By in swiere ierdbeving fan 7,6 op 'e skaal fan Richter yn Pakistaansk-Kasjmier komme mear as 86.000 minsken om en reitsje ferskate miljoenen dakleas.
• 19 oktober - Yn Irak begjint de rjochtsaak tsjin 'e eardere diktator Saddam Hoessein, dy't oanklage wurdt foar oarlochsmisdieden en misdieden tsjin 'e minsklikheid.
• 18-26 oktober - De orkaan Wilma feroarsaket op 'e Kaaimaneilannen, it Jûkatan-skiereilân fan Meksiko en Kuba en yn 'e Amerikaanske steat Floarida teminsten 87 deaden en rjochtet foar $29,4 miljard oan skea oan.
• 9 novimber - By bomoanslaggen yn Amman, troch islamistyske terroristen op trije hotels yn 'e Jordaanske haadstêd Amman, komme 63 minsken om, ynkl. 3 dieders.
• 30 novimber - Yn Frankryk fiere sjirurgen de earste gesichtstransplantaasje út by in minske.
• 18 desimber - Yn Tsjaad brekt in boargeroarloch út nei't ferskate rebellegroepen, mei stipe fan it regear fan Sûdaan, de Tsjadyske haadstêd N'Djamena oanfalle.
• 31 desimber - Foar it earst sûnt 1998 wurdt oan 'e ein fan it jier in skrikkelsekonde tafoege.

Montenegrinen fiere feest nei't in mearderheid fan 'e befolking by in referindum foar ûnôfhinklikheid stimt hat.

It Taiske leger fiert yn 2006 in steatsgreep út tsjin 'e demokratysk keazen premier Thaksin Shinawatra.

2006

• 1 jannewaris - Ruslân snijt de levering fan ierdgas oan 'e Oekraïne ôf yn ferbân mei in skeel oer de priis.
• 12 jannewaris - By in ramp op 'e lêste dei fan 'e hadj nei Mekka brekt ûnder it ritueel fan it Stiennigjen fan de Duvel yn Mina panyk út ûnder de grutte mannichte pylgers, mei as gefolch dat in soad lju ûnder de foet rûn wurde. Dêrby komme teminsten 362 minsken om.
• 19 jannewaris - De Amerikaanske romtefeartorganisaasje NASA lansearret de romtesonde New Horizons. Dit is it begjin fan in reis nei de planeet Pluto, wêrfoar't de sonde njoggen jier ûnderweis wêze sil.
• 25 jannewaris - The Walt Disney Company keapet foar $7,4 miljard konkurrint Pixar Animation Studios op fan eigner Lucasfilm.
• 3 febrewaris - De Egyptyske fearboat de MS al-Salaam Boccaccio 98 sinkt yn 'e Reade See, foar de kust fan Saûdy-Araabje. Dêrby komme mear as 1.000 minsken te ferdrinken.
• 17 febrewaris - By in ûnbidige ierdferskowing op it Filipynske eilân Leyte komme 1.126 minsken om.
• 15 maart - Mei grutte mearderheid stimt de Algemiene Gearkomste fan de Feriene Naasjes foar in útstel foar de oprjochting fan in Minskerjochteried fan de Feriene Naasjes.
• 21 maaie - By it Montenegrynsk ûnôfhinklikheidsreferindum stimt 55,5% fan 'e befolking foar de ûnôfhinklikheid fan Montenegro.
• 27 maaie - By in ierdbeving fan 6,4 op 'e skaal fan Richter komme yn 'e neite fan Djokjakarta, op it Yndonezyske eilân Java, mear as 5.700 minsken om en reitsje mear as 37.000 lju ferwûne.
• 3 juny - Montenegro wurdt ûnôfhinklik fan it Steatebûn fan Servje en Montenegro.
• 5 juny - It Steatebûn fan Servje en Montenegro hâldt op te bestean; wat der noch oer is fan it lân wurdt ûnôfhinklik as de Republyk Servje.
• 28 juny - Yn reäksje op raketten dy't de militante Palestynske Hamas-beweging fan 'e Gaza-stripe út ôfsketten hat op Israel, begjint it Israelyske leger in offinsyf yn 'e Gaza-stripe.
• 28 juny - De Amerikaanske Striidkrêften foltôgje harren weromlûking fan it grûngebiet fan NATO-bûnsgenoat Iislân, wêrmei't de Iislânske Ferdigeningsmacht ophâldt te bestean.
• 6 july - De berchpas Nathu La, yn 'e Himalaya, dy't ûnder de Sineesk-Yndiaaske Oarloch ôfsletten waard, wurdt nei 44 jier weriepene foar ferkear.
• 11 july - By in rige bomoanslaggen op treinen yn 'e Yndiaaske stêd Bombay komme mear as 200 minsken om.
• 12 july-14 augustus - Yn 'e Libaneeske Oarloch giet Israel yn súdlik Libanon de striid oan mei de sjiïtyske Hezbollah-milysje. De oarloch einiget yn in ympasse.
• 22 augustus - It ferkearsfleantúch Pulkovo Aviation Enterprise-flecht 612 stoart del yn 'e Oekraïne, deunby de grins mei Ruslân, wêrby't alle 170 ynsittenden omkomme.
• 24 augustus - Nei oanlieding fan 'e ûntdekking, yn jannewaris 2005, fan 'e dwerchplaneet Earis, dy't grutter is as de planeet Pluto, nimt de 26e Algemiene Gearkomste fan 'e Ynternasjonale Astronomyske Uny in nije definysje fan it begryp 'planeet' oan. Dêrtroch rekket Pluto nei mear as 70 jier syn status fan planeet kwyt en wurdt weromset ta dwerchplaneet.
• 19 septimber - By in steatsgreep yn Tailân wurdt de demokratysk keazen premier Thasin Shinawatra (wylst er om utens is) ôfset troch it leger, dat mei blykbere goedkarring fan kening Bhumibol in militêre diktatuer ynsteld ûnder lieding fan luitenant-generaal Sonthi Boonyaratglin.
• 29 septimber - By in loftbotsing komt it ferkearsfleantúch Gol Transportes Aéreos-flecht 1907 boppe it Brazyljaanske Amazônegebiet yn 'e loft yn botsing mei in Embraer Legacy 600-sakefleantúch. It ferkearsfleantúch stoart del en alle 154 ynsittenden komme om; de Embraer makket in needlâning op in militêr fleanfjild en de 7 minsken oan board komme mei de skrik frij.
• 13 oktober - De Súdkoreaanske diplomaat Ban Ki-moon wurdt keazen as opfolger fan Kofi Annan as siktaris-generaal fan 'e Feriene Naasjes.
• 5 novimber - Yn Irak wurdt de eardere diktator Saddam Hoessein troch it Alderheechste Iraakske Strafhôf ta de deastraf feroardiele foar oarlochsmisdieden en misdieden tsjin 'e minsklikheid.
• 12 novimber - Súd-Osseesje, dat him yn 'e 1990-er jierren losmakke hat fan Georgje en sûnt in de facto ûnôfhinklike steat is sûnder ynternasjonale erkenning, hâldt in referindum oer syn status, wêrby't de befolking yn oerweldigjende mearderheid foar ûnôfhinklikheid stimt.
• 23 novimber - By in rige oanslaggen mei autobommen en mortierbesjittings yn Sadr City, in sjiïtyske wyk fan 'e Iraakske haadstêd Bagdad, komme teminsten 215 minsken om en reitsje nochris 257 oaren ferwûne.
• 30 novimber - Súd-Afrika fiert it homohoulik yn.
• 30 novimber - De tyfoan Durian (ek bekend as Reming) feroarsaket op 'e Filipinen teminsten 1.200 deaden.
• 5 desimber - By in steatsgreep yn Fidzjy grypt de kriichsmacht, ûnder lieding fan kommandeur Frank Bainimarama, de macht.
• 11 desimber - De Meksikaanske presidint Felipe Calderón set it leger yn foar de bestriding fan drugskartels yn 'e steat Michoacán. Dit is it begjin fan 'e Meksikaanske Drugsoarloch.
• 24 desimber - Etioopje jout foar it earst ta dat it troepen ynset hat yn 'e Somalyske Boargeroarloch.
• 26 desimber - By de ûntploffing fan in ierdoaljepiiplieding yn 'e Nigeriaanske stêd Lagos komme teminsten 200 minsken om.
• 30 desimber - Yn in stoarm op 'e Javasee sinkt de Yndonezyske fearboat MS Senopati Nusantara, wêrby't 400 oant 500 fan 'e 628 opfarrenden ferdrinke.

Ingelsen steane yn Birmingham yn 'e rige foar de bank om harren jild op te nimmen: de Bankekrisis, de grutste ekonomyske krisis sûnt de Grutte Depresje, begûn yn 2007.

De Jeropeeske Uny nimt it Ferdrach fan Lissabon oan, wêrmei't de ôfwizing fan 'e Jeropeeske Grûnwet troch de befolkings fan Frankryk en Nederlân omsyld wurdt.

De Pakistaanske premier Benazir Bhutto komt yn desimber 2007 om by in oanslach op har libben.

2007

• 1 jannewaris - Roemeenje en Bulgarije wurde lid fan 'e Jeropeeske Uny.
• 1 jannewaris - Sloveenje fiert de euro yn as muntienheid.
• 1 jannewaris - It ferkearsfleantúch Adam Air-flecht 574 stoart yn Yndoneezje yn in stoarm del, wêrby't alle 102 ynsittenden omkomme.
• 8 jannewaris - Omreden fan it Russysk-Wytrussyske enerzjyskeel snijt Ruslân de befoarrieding mei ierdoalje oan Wyt-Ruslân ôf. Dat hat as bykommend gefolch dat ek Poalen, Dútslân en de Oekraïne gjin oalje mear krije, om't de piipliedings dêrhinne troch Wyt-Ruslân rinne.
• 9 jannewaris - Steve Jobs, de algemien direkteur fan Apple, presintearret yn San Francisco de iPhone, de earste smartphone.
• 11 jannewaris - Ruslân ferfettet de levering fan ierdoalje oan Wyt-Ruslân, en dêrmei ek oan 'e Oekraïne, Poalen en Dútslân.
• 15 jannewaris - Under druk fan 'e demokrasybeweging fan 2006 docht yn Nepal kening Gayendra ôfstân fan 'e troan. De monargy wurdt dêrnei ôfskaft.
• 3 febrewaris - By in bomoanslach op in merk yn 'e Iraakske haadstêd Bagdad komme teminsten 135 minsken om en reitsje 339 oaren ferwûne.
• 23 maart-4 april - Britsk marinepersoniel wurdt troch de Iraanske marine finzen nommen yn wetters dêr't sawol Irak as Iraan oanspraak op meitsje. Hja wurde nei 12 dagen frijlitten.
• 2 april - By in ierdbeving fan 8,1 op 'e skaal fan Richter en de tsûnamy dy't dêrtroch feroarsake wurd, komme op 'e Salomonseilannen 52 minsken om.
• 16 april - By it Bloedbad op Virginia Tech sjit de geastlik steurde studint Seung-Hui Cho 32 minsken dea en ferwûnet er 17 oaren op 'e kampus fan 'e Amerikaanske universiteit Virginia Tech.
• 18 april - By in rige bomoanslaggen yn 'e Iraakske haadstêd Bagdad komme krapoan 200 minsken om.
• 26-27 april - Yn 'e Estyske haadstêd Tallinn en oare grutte stêden yn it lân fynt de Brûnzen Nacht plak, wêrby't leden fan 'e etnysk Russyske minderheid yn Estlân in opskuor feroarsaakje by wize fan protest tsjin it ferpleatsen fan 'e saneamde Brûnzen Soldaat, in Sovjet-monumint foar de Twadde Wrâldoarloch.
• 17 maaie - De Russysk-Otterdokse Tsjerke fan it Patriargaat fan Moskou en de Russysk-Otterdokse Tsjerke om Utens werienje har nei in skisma fan 80 jier.
• 28 maaie - Nepal wurdt in sosjalistyske republyk.
• juny - De Palestynske organisaasje Hamas ferjaget yn it ramt fan it konflikt tusken Fatah en Hamas de rivalisearjende Fatah-beweging en grypt alle macht yn 'e Gaza-stripe. Neitiid leit Fatah yn it Westjordaanlân it near op it oanhingjen fan Hamas. De Palestynske Autoriteit rekket dêrmei yn 'e praktyk ferdield yn twa aparte minysteatsjes.
• 28 juny-3 septimber - By oanhâldende boskbrannen yn Grikelân, dy't útbrekke ûnder de Jeropeeske hjitteweach fan dizze simmer, giet 2.711 km² lân yn flammen op en komme 84 minsken om.
• 29 juny - De iPhone, de earste smartphone, komt yn 'e Feriene Steaten beskikber foar ferkeap.
• 17 july - It ferkearsfleantúch TAM Airlines-flecht 3054 glidet op 'e Brazyljaanske Lofthaven Congonhas-São Paulo fan 'e lâningsbaan en ramt in warehûs, wêrby't 199 minsken omkomme.
• 24 july - Nei acht en in heal jier yn it tichthús sitten te hawwen, wurde yn Lybje fiif Bulgaarske ferpleechkundigen frijlitten. Dêrmei komt in ein oan 'e saneamde Libyske HIV-rjochtsaak.
• 9 augustus - De Frânske bank BNP Paribas leit it near op 'e ferkeap fan belangen yn riskante hypoteken troch trije Britske ynvestearringsfûnsen. Dit is it ierste begjin fan 'e Bankekrisis.
• 14 augustus - By de bomoanslaggen op 'e Jezidyske mienskippen, troch islamistyske terroristen te Katanija en Djaziera yn noardlik Irak, komme 796 minsken om.
• 15 augustus - Yn Birma brekt de Saffraanrevolúsje út, wêrby't boedistyske mûntsen (yn saffraankleurige pijen) foarop geane yn 'e protesten tsjin 'e militêre diktatuer dy't it lân regearret.
• 15 augustus - By in swiere ierdbeving fan 8.0 op 'e skaal fan Richter komme yn Perû teminsten 519 minsken om en reitsje mear as 1.300 oaren ferwûne.
• 6 septimber - De loftmacht fan Israel fiert in oanfal út yn Syrje op wat neffens Israelyske bewearings in nukleêre reäktor wêze soe.
• 13 septimber - De Algemiene Gearkomste fan de Feriene Naasjes nimt de Ferklearring oangeande de Rjochten fan Lânseigen Folken (DRIP) oan.
• 6 novimber - By in bomoanslach troch in selsmoardterrorist yn 'e Afgaanske stêd Mazar-i-Sjarif komme teminsten 50 minsken om, ûnder wa 6 leden fan it Afgaanske parlemint.
• 16 novimber - De sykloan Sidr komt oan lân yn Bangladesj. Dêrby fine mooglik wol 15.000 minsken de dea.
• 5 desimber - By in sjitpartij yn it winkelsintrum Westroads Mall, yn 'e Amerikaanske stêd Omaha (Nebraska), falle 8 deaden en 4 ferwûnen.
• 13 desimber - De lidsteaten fan 'e Jeropeeske Uny ûndertekenje it Ferdrach fan Lissabon. Dat is de Jeropeeske Grûnwet út 2004 ûnder in oare namme. Op dizze wize wurdt de ôfwizing fan dy grûnwet by referindum troch de befolkings fan Frankryk en Nederlân negearre.
• 27 desimber - Benazir Bhutto, de eardere premier fan Pakistan, wurdt by in bomoanslach yn Rawalpindi fermoarde. Behalven har komme ek teminsten 80 oare minsken om it libben.
• 27 desimber - Der brekt in grutte opskuo] út yn 'e Keniaanske stêd Mombasa as Mwai Kibaki útroppen wurdt ta winner fan 'e troch ûngeregeldheden ûntsierde Keniaanske ferkiezings. Dit is it begjin fan 'e Keniaanske Ferkiezingskrisis (2007-2008).
• sûnder datum - Mauretaanje is it lêste lân op 'e wrâld dat slavernij by wet strafber stelt.

In demonstraasje yn 'e Servyske haadstêd Belgrado tsjin 'e ûnôfhinklikheid fan Kosovo, dy't op 17 febrewaris 2008 útroppen waard.

Barack Obama wint yn 2008 as earste swarte man de Amerikaanske presidints-ferkiezings. Op dizze foto wurdt er (yn jannewaris 2009) ynaugurearre as presidint fan 'e Feriene Steaten.

2008

• 1 jannewaris - Syprus en Malta fiere de euro yn as muntienheid.
• 21 jannewaris - Effektebeurzen oer de hiele wrâld stoarte yn it ramt fan 'e Bankekrisis yn, út eangst foar in resesje yn 'e Feriene Steaten.
• 4 febrewaris - Iraan lansearret syn earste ûnbemanne raket yn 'e romte.
• 13 febrewaris - Yn Austraalje biedt premier Kevin Rudd út namme fan it regear formeel syn ûntskuldigings oan foar de Stellen Generaasjes, de Aborizjinal-bern dy't út rasistyske motiven by harren âlden weihelle waarden om troch blanken of yn weeshuzen grutbrocht te wurden.
• 17 febrewaris - Kosovo ropt de ûnôfhinklikheid út, en wurdt erkend troch in grut part fan 'e Westerske en islamityske wrâld. Servje wegeret dat te akseptearjen en hâldt deroan fêst dat it gebiet in yntegraal ûnderdiel fan Servje útmakket.
• 2 maart - Nei in ynfal fan Kolombiaanske troepen op it grûngebiet fan Ekwador, dy't rjochte wie tsjin 'e guerriljastriders fan 'e FARC, rinne de spannings tusken Kolombia en syn buorlannen heech op. Ekwador en Fenezuëla stjoere troepen nei de Kolombiaanske grinzen.
• 24 maart - Yn Bûtan wurde de alderearste ferkiezings holden nei de ynfiering fan in grûnwet en de omfoarming fan it lân fan in absolute monargy nei in demokrasy mei in mearpartijestelsel.
• 25 maart - By de ynvaazje fan Anzjûan falt it Komoreeske leger, stipe troch troepen fan 'e Afrikaanske Uny, it opstannige eilân Anzjûan binnen. It regear fan 'e rebellen wurdt ôfset en it eilân komt wer ûnder Komoreesk bestjoer.
• 3 maaie - De sykloan Nargis treft de kust fan Birma ekstreem hurd. De stoarm soarget dêr foar mear as 138.000 deaden en rjochtet foar $10 miljard oan skea oan.
• 2 maaie - De fulkaan de Chaitén, yn Sily, begjint foar it earst sûnt likernôch 1640 mei in rige útbarstings.
• 12 maaie - By in swiere ierdbeving yn 'e Sineeske provinsje Sichuan komme likernôch 87.000 minsken om.
• 23 maaie - De Andeaanske Mienskip en Mercosur geane op yn 'e nije Uny fan Súdamerikaanske Naasjes.
• 28 maaie - It parlemint fan Nepal stimt mei oerweldigjende mearderheid foar de ôfskaffing fan 'e 240 jier âlde monargy en foar de ynstelling fan in republyk.
• 16 juny - De Amerikaanske steat Kalifornje fiert it homohoulik yn.
• 30 maaie - Yn 'e Ierske haadstêd Dublin wurdt de ynternasjonale Konvinsje oangeande Klustermunysjes oannommen.
• 11 juny - Yn Kanada biedt premier Stephen Harper út namme fan it Kanadeeske regear formeel syn ûntskuldigings oan 'e Yndianen oan foar it Kanadeeske Yndiaanske kostskoallesysteem, dat desennia lang lânseigen bern oan 'e soarch fan harren âlden ûntskuorde om op ynternaten grutbrocht te wurden, mei as doel om harren har eigen taal, godstsjinst en kultuer te ûntnimmen.
• 12 juny - By in referindum wiist 53,4% fan 'e befolking fan Ierlân it Ferdrach fan Lissabon fan 'e Jeropeeske Uny ôf.
• 14 juny-14 septimber - Yn it Spaanske Saragossa wurdt de wrâldtentoanstelling Expo 2008 holden.
• 21 juny - De tyfoan Fengshen lit op syn trochgong oer de Filipynske Fisaya-eilannen it skip de MS Princess of the Stars sinke, wêrby't mear as 800 opfarrenden ferdrinke.
• 2 july - De Kolombiaanske politika Íngrid Betancourt en 14 oare gizelders wurde troch de Kolombiaanske troepen rêden út finzenskip fan 'e rebellebeweging FARC.
• 21 july - Yn 'e Servyske haadstêd Belgrado wurdt de eardere Bosnysk-Servyske lieder Radovan Karadžić arrestearre, dy't 12 jier ûnderdûkt sitten hat. Hy wurdt socht troch it Joegoslaavjetribunaal op oanklacht fan oarlochsmisdieden en misdieden tsjin 'e minsklikheid.
• 1 augustus - By de ramp op de K2 komme yn Pakistan op ien dei 11 berchbeklimmers fan ynternasjonale ekspedysjes om op 'e K2, de op ien nei heechste berch fan 'e wrâld.
• 6 augustus - By in steatsgreep yn Mauretaanje wurdt presidint Sidi Oeld Sjeich Abdallahi ôfset troch it leger.
• 7 augustus - It Georgyske leger falt it de facto ûnôfhinklike Súd-Osseesje binnen, dat him yn 1991 fan Georgje ôfskaat hat. Russyske troepen komme de Súdosseten te help en de Russysk-Georgyske Oarloch brekt út.
• 12 augustus - Yn it ramt fan 'e Russysk-Georgyske Oarloch moat Georgje de striid opjaan nei't de Russen it lân mei help fan 'e Súdosseten en de Abgazen in swiere nederlaach tabrocht hawwe.
• 18 augustus - As gefolch fan 'e politike krisis yn Pakistan, dy't ûntstien is nei de moard op Benazir Bhutto, moat presidint Pervez Musharraf ôftrede.
• 20 augustus - It ferkearsfleantúch Spanair-flecht 5022 stoart yn Spanje del op 'e Lofthaven Madrid-Barajas, wêrby't 154 minsken omkomme.
• 26-29 augustus - By de oanslaggen yn Bombay, troch islamistyske terroristen op ferskate doelen (wêrûnder The Taj Mahal Palace Hotel) yn 'e Yndiaaske stêd Bombay, komme 175 minsken om.
• 26 augustus-4 septimber - De orkaan Gustav feroarsaket op Hispanjoala, Jamaika, de Kaaimaneilannen en Kuba en yn it suden fan 'e Amerikaanske steat Louisiana teminsten 153 deaden en rjochtet foar $6,6 miljard oan skea oan.
• 26 augustus - Abgaazje en Súd-Osseesje, de facto selsstannige steatsjes dy't har oan it begjin fan 'e jierren '90 losmakke hawwe fan Georgje, wurde formeel troch Ruslân as ûnôfhinklike lannen erkend.
• 6-13 septimber - De orkaan Ike feroarsaket op 'e Turks- en Kaikoseilannen, de Bahama's, Hispanjoala en Kuba en yn it súdeasten fan 'e Amerikaanske steat Teksas teminsten 195 deaden en rjochtet foar $37,5 miljard oan skea oan.
• 14 septimber - De Amerikaanske bank Lehman Brothers giet fajyt as gefolch fan 'e Bankekrisis. It is it grutste fajisemint ea.
• 20 septimber - By in bomoanslach op it Marriott Hotel yn 'e Pakistaanske haadstêd Islamabad komme teminsten 54 minsken om en reitsje nochris 266 ferwûne.
• 28 septimber - De Falcon 1 fan it bedriuw SpaceX berikt as earste kommersjeel ûntwikkele romtefear in baan om 'e Ierde.
• 29 septimber - Op 'e Effektebeurs fan New York stoart de Dow Jones-yndeks yn it ramt fan 'e Bankekrisis 777,68 punten omleech (it grutste ferlies ea op ien dei). Dat bart nei de fajisseminten fan 'e Amerikaanske banken Lehman Brothers en Washington Mutual.
• 3 oktober - Yn it ramt fan 'e Bankekrisis ûndertekenet de Amerikaanske presidint George W. Bush de op 'e nij besjoene Emergency Economic Stabilization Act, wêrmei't it Troubled Asset Relief Program ûntstiet. Dat is in pot fan $700 miljard om wifkjende banken op te keapjen.
• 5 novimber - De rjochter ferklearret de ynfiering fan it homohoulik yn 'e Amerikaanske steat Kalifornje ûnjildich.
• 1 novimber - De Bitcoin, de earste digitale kryptofaluta, wurdt yntrodusearre.
• 4 novimber - De Demokratyske kandidaat Barack Obama ferslacht by de Amerikaanske presidintsferkiezings syn Republikeinske tsjinstanner John McCain en wurdt keazen as de earste swarte presidint fan 'e Feriene Steaten.
• 12 novimber - De Amerikaanske steat Konettikut fiert it homohoulik yn.
• 26-29 novimber - Leden fan 'e terroristyske beweging Lasjkar-e-Taiba fiere in fjouwer dagen duorjende rige oanslaggen út yn 'e Yndiaaske stêd Bombay, wêrby't 164 minsken omkomme.
• 10 desimber - Sark, ien fan 'e Kanaaleilannen en in ôfhinklik gebiet fan it Feriene Keninkryk, hâldt syn alderearste demokratyske ferkiezings en wurdt dêrmei it alderlêste part fan Jeropa dat it feodale stelsel ôfskaft.
• 23 desimber - By in steatsgreep yn Guinee wurdt koart nei it ferstjerren fan presidint Lansana Conté it regear fan it lân ôfset troch it leger.
• 27 desimber - It oanhâldende Belis fan de Gaza-stripe troch Israel lokket raketbesjittings fan Israelyske stêden út troch Hamas en oare militante Palestynske groepearrings. Yn reäksje dêrop fiert it Israelyske leger in langduorjende ynvaazje fan 'e Gaza-stripe út.
• 31 desimber - Oan 'e ein fan it jier wurdt in skikkelsekonde tafoege. De lêste kear dat dat barde, wie yn 2005.

Passazjiers fan 'e metro yn Meksiko-Stêd drage mûlkapkes y.f.m. de útbraak fan 'e bargegryp, yn april 2009.

In demonstraasje yn Teheran ûnder de Iraanske ferkiezings-protesten fan 2009.

2009

• 1 jannewaris - Noarwegen fiert it homohoulik yn.
• 1 jannewaris - Slowakije fiert de euro yn as muntienheid
• 1 jannewaris - By de brân yn de Santika Club, in nachtklub yn 'e Taiske haadstêd Bangkok, komme 66 minsken om.
• 15 jannewaris - It Amerikaanske ferkearsfleantúch US Airways-flecht 1549 komt boppe New York-Stêd koart nei it opstiigjen yn botsing mei in flecht guozzen. De piloaten meitsje in súksesfolle needlâning op 'e rivier de Hudson en alle 155 ynsittenden komme mei de skrik frij.
• 18 jannewaris - De bloedige Gaza-oarloch tusken Israel en de militante Palestynske Hamas-beweging einiget yn in wapenstilstân.
• 20 jannewaris - Yn Iislân begjinne de protesten tsjin 'e Iislânske Bankekrisis.
• 20 jannewaris - Barack Obama wurdt ynaugurearre as de 44e presidint fan 'e Feriene Steaten. Hy is de earste swarte persoan dy't dat amt beklaait.
• 21 jannewaris - Israel lûkt syn troepen werom út 'e Gaza-stripe. Dêrtroch komt de status quo ante werom. De bloedige Gaza-oarloch hat gjin resultaten opsmiten.
• 26 jannewaris - Op Iislân stoart it nasjonale banksysteem yn as gefolch fan 'e Iislânske Bankekrisis (2008-2011). Premier Geir Haarde treedt ôf.
• 1 febrewaris - De ôftreden premier Geir Haarde fan Iislân wurdt opfolge troch Jóhanna Sigurðurdóttir, dy't dêrmei de earste regearingslieder fan 'e wrâld wurdt dy't iepentlik lesbysk is.
• 1 febrewaris - Kirill fan Moskou folget syn ferstoarne foargonger Aleksej II op as patriarch fan 'e Russysk-Otterdokse Tsjerke.
• 7 febrewaris-14 maart - By de boskbrannen fan Swarte Sneon, de deadlikste boskbrannen út 'e skiednis fan Austraalje, komme yn 'e Australyske steat Fiktoaria 173 minsken om. Fierders reitsje mear as 500 lju ferwûne en likernôch 7.500 persoanen dakleas.
• 12 febrewaris - It Amerikaanske ferkearsfleantúch Colgan Air-flecht 3407 stoart koart foar de lâning yn Buffalo (New York) del op in wenwyk, wêrby't 50 minsken omkomme.
• 25 febrewaris - De saneamde Poldercrash yn Nederlân: Turkish Airlines-flecht 1951, mei 7 bemanningsleden en 128 passazjiers oan board, stoart del op in ikker deunby Skiphol. Der komme 9 minsken om.
• 26 febrewaris - De eardere Servyske presidint Milan Milutinović wurdt troch it Joegoslaavjetribunaal yn De Haach frijsprutsen fan oarlochsmisdieden ûnder de Kosovo-oarloch.
• 2 maart - João Bernardo Vieira, de presidint fan Guinee-Bissau, wurdt fermoarde by in wapene oanfal op syn residinsje yn Bissau.
• 4 maart - It Ynternasjonaal Strafhôf yn De Haach lit in arrestaasjebefel útgean foar de Sûdaneeske presidint Omar al-Basjir, dy't oanklage wurdt foar oarlochsmisdieden en misdieden tsjin 'e minsklikheid yn 'e Oarloch yn Darfoer. Dit is de earste kear dat der in arrestaasjebefel útfurdige wurdt tsjin in sittend steatshaad.
• 17 maart - Nei in moanne fan ûnrêst wurdt op Madagaskar by in steatsgreep presidint Marc Ravalomanana ôfset.
• 1 april - Albaanje en Kroaasje wurde lid fan 'e NATO.
• 6 april - By in ierdbeving fan 6,3 op 'e skaal fan Richter yn 'e neite fan 'e Italjaanske stêd L'Aquila komme 308 minsken om en reitsje nochris goed 1.500 oaren ferwûne. Tsientûzenen minsken wurde dakleas.
• 27 april - De Amerikaanske steat Iowa fiert it homohoulik yn.
• 30 april - Op Keninginnedei yn Nederlân riidt Karst Tates mei syn auto yn Apeldoarn yn op it publyk yn in fergees besykjen om in oanslach te dwaan op 'e bus mei de Nederlânske keninklike famylje. By dizze oanslach op Keninginnedei komme 8 minsken om, ynkl. Tates sels.
• 1 maaie - Sweden fiert it homohoulik yn.
• 18 maaie - De Srylankaanske Boargeroarloch einiget mei de finale nederlaach fan 'e opstannige Tamyl Tigers (LTTE) en de Srylankaanske Genoside fan regearingstroepen tsjin 'e Tamyl-befolking.
• 31 maaie - De Amerikaanske pro-abortusaktivist George Tiller wurdt by in oanslach yn Wichita (Kansas) fermoarde troch de fûnemintalistysk-kristlike anty-abortusaktivist Scott Roeder.
• 1 juny - It ferkearsfleantúch Air France-flecht 447 stoart ûnderweis fan Rio de Janeiro nei Parys del yn 'e súdlike Atlantyske Oseaan as de piloaten disoriïntearre reitsje. Alle 228 ynsittende komme om.
• 11 juny - De útbraak fan 'e bargegryp kriget fan 'e Wrâldsûnensorganisaasje (WHO) de status fan pandemy. Dizze sykte sil yn 214 lannen en territoaria it libben kostje oan teminsten 18.138 minsken.
• 13 juny - It begjin fan 'e Iraanske ferkiezingsprotesten soarget foar massale demonstraasjes yn 'e Iraanske haadstêd Teheran en oare grutte stêden, nei't de progressive presidintskandidaat Mir-Hossein Mûsavi mei stimbusfraude fan 'e oerwinning ôfholden is troch it sittende regear fan it lân. Der falle ferskate deaden ûnder de demonstranten as de autoriteiten hurd yngripe, en úteinlik bliede de protesten yn febrewaris 2010 dea sûnder wat bedijd te hawwen.
• 28 juny - By in steatsgreep yn Hondoeras wurdt de demokratysk keazen presidint Manuel Zelaya ôfset troch syn konservative politike tsjinstanners, dy't in skyndemokratyske diktatuer ynstelle.
• 30 juny - It ferkearsfleantúch Yemenia-flecht 626 stoart by de Komoaren del yn 'e Yndyske Oseaan. Fan 'e 153 ynsittenden oerlibbet inkeld de 12-jierrige Bahia Bakari de fleanramp.
• 15 july - It ferkearsfleantúch Caspian Airlines-flecht 7908 stoart del yn 'e neite fan 'e Iraanske stêd Kazvyn, wêrby't alle 168 ynsittenden omkomme.
• 16 july - Tsjin 'e eftergrûn fan 'e Iislânske Bankekrisis stimt it parlemint fan Iislân, it Alþing, foar it iepenjen fan ûnderhannelings oer lidmaatskip fan 'e Jeropeeske Uny.
• 17 july - By twa bomoanslaggen troch islamistyske terroristen op it JW Marriott Hotel en it Ritz-Carlton Hotel yn 'e Yndonezyske haadstêd Djakarta komme 9 minsken om.
• 26 july - De terroristyske organisaasje Boko Haram begjint in opstân yn it noardeasten fan Nigearia.
• 3 augustus - Bolivia erkent as earste lân yn Súd-Amearika it rjocht fan 'e lânseigen befolking op selsbestjoer.
• 7 augustus - De tyfoan Morakot tsjocht oer Taiwan hinne en feroarsaket dêr 673 deaden en de slimste wettersneed yn in heale iuw.
• 14 augustus - It Feriene Keninkryk skoarret it selsbestjoer fan 'e Turks- en Kaikoseilannen op nei't by in ûndersyk bewiis foar grutskalige korrupsje fan 'e oerheid fan it oerseeske gebietsdiel boppe wetter kommen is.
• 1 septimber - De Amerikaanske steat Fermont fiert it homohoulik yn.
• 25-26 septimber - De tyfoan Ketsana (ek bekend as Ondoy) feroarsaket grutte wettersneed yn 'e Filipynske haadstêd Manilla, dêr't hast 700 minsken by omkomme.
• 28 septimber - By massale demonstraasjes yn Guinee tsjin 'e militêre steatsgreep fan 2008 iepenet it leger it fjoer op 'e demonstranten, mei teminsten 157 deaden as gefolch.
• 30 septimber - By in ierdbeving fan 7,6 op 'e skaal fan Richter op it Yndonezyske eilân Sumatra komme teminsten 1.115 minsken om.
• 2 oktober - Yn Ierlân wurdt in twadde referindum holden oer it Ferdrach fan Lissabon fan 'e Jeropeeske Uny, nei't de Ierske befolking dat yn 2008 by in earste referindum ôfwiisde. Diskear kart 67,1% fan 'e Ieren it goed.
• 25 oktober - By twa bomoanslaggen yn 'e Iraakske haadstêd Bagdad komme 155 minsken om en reitsje teminsten 721 oaren ferwûne.
• 23 novimber - Op it súdlike eilân Mindanao, yn 'e Filipinen, wurde by it Bloedbad fan Maguindanao teminsten 58 politisy, abbekaten, sjoernalisten, minskerjochte-aktivisten en omstanners ûntfierd en fermoarde.
• 1 desimber - Yn 'e Jeropeeske Uny wurdt it Ferdrach fan Lissabon fan krêft.
• 8 desimber - By in rige bomoanslaggen yn 'e Iraakske haadstêd Bagdad komme teminsten 127 minsken om en reitsje nochris teminsten 448 oaren ferwûne.

Boarnen, noaten en referinsjes

Boarnen, noaten en/as referinsjes:

Foar boarnen en oare literatuer, sjoch ûnder: References, op dizze side. Commons Wikimedia Commons  Ofbylden dy't by dit ûnderwerp hearre, binne te finen yn de kategory 2000s fan Wikimedia Commons.