Universitato de Tartu
Universitato de Tartu (aŭ mallonge UT, estone nun Tartu Ülikool, historie komence latine Academia Gustaviana, de 1802 ĝis 1893 germane Kaiserliche Universität zu Dorpat respektive ruse Императорский университет Дерпта, Imperatorskij universitet Derpta) estas la plej granda kaj plej malnova universitato en Estonio. La institucio apartenas al la Koimbra Grupo, internacia asocio de 41 universitatoj en Eŭropo.
Ĝi estis fondita de reĝo Gustavo la 2-a Adolfo de Svedio en 1632. Universitataj lingvoj komence ĝis la jaro 1893 estis la latina kaj germana (vidu la artikolon pri la germanaj baltoj), de tiam pro rusiga politiko de la Cara Imperio precipe la rusa kun iom da germana, ekde 1918 la estona, kun flankaj signifoj ankaŭ de la rusa kaj ekde la jaro 1991 la angla [1].
Post la restarigo de la estona ŝtato en 1991, la universitato, kiel la plej malnova, plej granda kaj plej antaŭa universitato de Estonio, evoluis en internacian medion, kun pli da studeblecoj en la angla kaj kun ĉirkaŭ 4% internaciaj studentoj inter la doktoraj studentoj. En 2007, la universitato havis totalon de iom malpli ol 18,000 studentoj.
