Tura Satana

C'l artìcul chè 'l è scrit in Miranduléś

La Tura Luna Pascual Yamaguchi, cgnusùda méj c'n al nóm 'd art ad Tura Satana (Hokkaidō, 10 ad Luj dal 1938 - Rêṅ, 4 ad Favràr dal 2011), l'è stada n'atōra americàna cun di urìgini giapunéśi.

La s è fata cgnósar par la part dla Varla in dal film cult ad Russ Meyer Faster, Pussycat! Kill! Kill! dal 1966, ólt'r a èsar stada par dimóndi tèmp la muróśa 'd Elvis Presley.

Biugrafìa

Nada in Giapòṅ da 'n atōr giapunéś ad film mut e da na cuntrursiunìsta americàna cun di urìgini Cheyenne, scuséśi e irlandéśi, durànt la secónda guèra mundiàla la vîṅ misa in un camp ad cuncentramènt in Califòrgna insém a i sò genitōr. Finìda la guèra la và a star a Chicago. A nóṿ an la vîṅ viulentàda da sinc óm e sò pàd'r al gh'inséggna al karate par difénd'r-as. A quàtórd'ś an l'è custréta a spuśàr-as c'n un ragàs ad tri an più grand ma la divòrsia nóṿ méś dòp. In chi an lè la taca anc a far la balarìna eśòtica e a tōr part a na gang ad fémni d'l Illinòis ciamàda „Gl'àngii“.

In séguit la Tura la taca a véndar dal sigaréti in soquànt teàtar e pò a lauràr cuma balarìna 'd burlesque ch'la n gh'iva gnanc daśdòt an. Dòp na relasiòṅ c'n al cantànt Elvis Presley, l'è stada lē a insgnàr-'g al muimènt dal parti basi dla pansa e di galòṅ, la taca a far cìnema faghénd la part dna putàna in dla pelìcula Irma la dolce ad Billy Wilder e pò la prutagunìsta dal film Faster, Pussycat! Kill! Kill!. Dòp atri pelìculi giràdi p'r al regìsta Ted V. Mikels, la mōr a 'l impruvìś par 'n atàc ad cōr in dal 2011.

Filmugrafìa

1963 - Irma la dolce (Irma la Douce), regìa ad Billy Wilder
1963 - Le 5 mogli dello scapolo (Who's Been Sleeping in My Bed?), regìa ad Daniel Mann
1965 - Faster, Pussycat! Kill! Kill!, regìa ad Russ Meyer
1966 - Il nostro agente Flint (Our Man Flint), regìa ad Daniel Mann
1968 - The Astro-Zombies, regìa ad Ted V. Mikels
1973 - Squadra speciale con licenza di sterminio (The Doll Squad), regìa ad Ted V. Mikels
2004 - Mark of the Astro-Zombies, regìa ad Ted V. Mikels
2009 - Sugar Boxx, regìa ad Cody Jarrett
2010 - Astro Zombies: M3 - Cloned, regìa ad Ted V. Mikels

Culegamènt estéran