Renu

U Renu (in tedescu: Rhein, in francese: Rhin, in neerlandese: Rijn, in rumanciu: Rain, in inglese: Rhine) hè, incù 1 326 km, unu di i fiuma più longhi d'Auropa. U so nomu diriveghja da una radica celtica, ma sempri prima induaurupea, chì significheghja "scorra". L'urighjina induaurupea di u terminu trova cunferma in u Grecu anticu, in u quali u verbu ρέω (traslitteratu rheō) hà probbiu u suddettu significatu. Incù à u Danubiu, u Renu furmava a maiò parti di u cunfini sittintriunali di l'Imperu rumanu ed hè statu, finu da quiddi tempi, un corsu d'acqua navighevuli, imprudatu par u cummerciu è u trasportu di a ropa finu à u cori di u cuntinenti. A navigazioni annantu à u fiumu hè arrigulata da a Cunvinzioni par a navigazioni annantu à u Renu, firmata à Mannheim u 17 uttrovi 1868, trà u Granducatu di Baden, u Regnu di Baviera, a Francia, u Granducatu di Hessen, i Paesi Bassi è a Prussia.

Parcorsu

Svizzara

Renu (Assmannshausen / Rüdesheim 2008)

Sorghji da l'Alpi svizzari, in u Canton Grigioni, induva i so dui principali tributarii iniziali sò chjamati Renu Antiriori è Renu Pustiriori. U Renu Antiriori sgorga da u lavu Tuma, vicinu à u passu di l'Oberalp è attraversa i travi di u Ruinaulta. U Renu Pustiriori nasci da i ghjacciali di u gruppu di l'Adula annantu à u cunfini miridiunali di u Grigioni incù u Ticino. I dui tributarii si scontrani vicinu à Reichenau, sempri in i Grigioni. Unu di i rami sicundarii hè custituitu da u turrenti Renu di Edda, chì nasci in Italia da u Pizzu Stedda (in a cumuna di Piuro) è hè talianu par circa 15 km, par cunfluiscia, dopu, in u Renu Pustiriori. Da quì u fiumu, chjamatu Alpenrhein (Renu alpinu), scorri versu u nordu travirsendu Coira par dopu lascià i Grigioni è ghjentra in u cantonu di San Ghjaddu di u quali custituisci a fruntiera uriintali incù u Liechtenstein è l'Austria prima di ghjittà si in u lavu di Custanza. À l'isciuta di u lavu si dirighji à punenti è dopu u saltu di i cascati di u Renu ricevi l'acqui di u fiumu Aar chì ni aumentani a purtata di oltri a mità, incù una media di 1.000 metri cubi à a siconda. U Renu segna u cunfini trà Svizzara è Ghjermania prima di svultà à nordu incù l'ansi (Rheinknie) vicinu à Basilea.

Ghjermania è Francia

Varcata Basilea u Renu custituisci a parti miridiunali di u cunfini trà Ghjermania è Francia scurrendu in una larga vaddi prima di entra intiriamenti in tarritoriu tedescu à Rheinstetten, vicinu à Karlsruhe. L'ampia vaddi di u Renu finisci à a cunfluenza incù u Menu à Magonza. A parti frà Bingen è Coblenza, induva u Renu entri in una vaddi più stretta, hè nota cum'è Gola di u Renu, una furmazioni criata da l'erusioni è da un sullivamentu tettonicu. Stu trattu di u fiumu hè notu par i casteddi mediivali è i vignali chì ricoprini l'alturi circustanti; in u 2002 hè statu numinatu Patrimoniu di l'umanità da l'UNESCO.

U fiumu s'allarga di novu à sudu di Culonia. Ancu s'è molti industrii si trovani longu u Renu, sinu da u so corsu svizzaru, hè in 'ssu puntu, a rigioni di a Ruhr in a quali traversa Culonia, Düsseldorf è Duisburg (Duisburgu) chì si cuncentrani a maiò parti di eddi. À Duisburg si trova u più grandi portu fluviali d'Auropa. À i ghjorna d'oghji molti industrii longu u Renu è i so affluenti ani chjusu o ani riduttu l'emissioni di inquinanti in u corsu d'acqua ancu s'eddu ferma un certu gradu di inguinamentu, spicialamenti à a cunfluenza incù l'Emscher in passatu impiigatu cum'è veru è probbiu canali di scolu industriali.

Paesi Bassi

U Renu à stu puntu ghjira à punenti in i Paesi Bassi, induva incù a Mosa forma un enorma delta. Oltripassatu u cunfinu ulandesi, u Renu righjunghji a so massima ampiezza, ma si dividi dopu in trè rami principali: l'IJssel, u Waal è u Bassu Renu. Da quì a situazioni diventa più cumplicata, in quantu u nomu "Renu" ùn cuincidi più incù u corsu principali. Gran' parti di l'acqua di u Renu scorri sempri più à punenti à traversu u Waal, u Nieuwe Waterweg è, uniscendu si à a Mosa, l'Hollands Diep è l'Haringvliet, finu à sfucià in u Mari di u Nordu. U ramu di l'IJssel porta a so parti d'acqua à u nordu in l'IJsselmeer, mentri u Bassu Renu scorri à punenti, parallelu à u Waal.

Ad ogni modu, oltri Wijk bij Duurstede stu corsu d'acqua cambia nomu par divintà u Lek è scorri à punenti par riuniscia si à u ramu principali in u Nieuwe Waterweg. U nomu "Renu" à parta da quì fù usatu solu par fiuma più chjughi chì scorrini versu u nordu è chì un tempu furmavani l'ultimu trattu di u Renu di l'ebbica rumana. Ancu s'è mantenini u nomu, sti vadini ùn portani micca acqua di u Renu, ma sò usati par drenà i terri è i polder di i circonda. Da Wijk bij Duurstede, ci sò u Kromme Rijn ("Renu stortu") è dopu Utrecht l'Oude Rijn ("Vechju Renu") chì scorri à traversu Leida (Olanda Meridiunale) è in un cumplessu di chjusi induva i so acqui poni essa scaricati in u Mari di u Nordu.

Affluenti

Affluenti da a surghjenti à a foci:

Km da a surghjenti di u Renu	dritta/manca	affluenti	lunghezza in km	purtata in m³/s	sizzioni di u Renu
	D	Ill (Austria)	72	66	Alpenrhein
	D	Bregenzer Ach	80	46	Obersee
	D	Argen	78	20	Obersee
	D	Schussen	62	12	Obersee
	S	Thur	130	47	Hochrhein
	D	Wutach (fiumu)	90	16	Hochrhein
	S	Aar	291	560	Hochrhein
164,4	S	Birs	73	15	Hochrhein
	S	Elz	90	22	Oberrhein
289,1	S	Kinzig	90	28	Oberrhein
311,3	S	Ill (Francia)	208	54	Oberrhein
334,3	S	Moder	93	17	Oberrhein
344,0	S	Sauer	70	4	Oberrhein
344,5	D	Murg	79	18	Oberrhein
370	D	Pfinz	60	2	Oberrhein
400,2	S	Speyerbach	60	3	Oberrhein
428,2	D	Neckar	384	145	Oberrhein
496,6	D	Menu	524	225	Oberrhein
512	S	Selz	63	0,77	Oberrhein
529,1	S	Nahe	116	30	Oberrhein
585,7	D	Lahn	242	52	Mittelrhein
592,3	S	Mosella	544	325	Mittelrhein
610,2	D	Wied	102	12	Mittelrhein
639	S	Ahr	89	9	Mittelrhein
659,3	D	Sieg	155	53	Niederrhein
703,3	D	Wupper	113	17	Niederrhein
735,6	S	Erft	103	16	Niederrhein
780,1	D	Ruhr	221	80	Niederrhein
797,7	D	Emscher	84	16	Niederrhein
814,4	D	Lippe	255	45	Niederrhein
	S	Mosa (da u 1904)	920	357	Delta (Waal)
1013	S	Oude Maas			Delta (Nieuwe Maas)
	D	Oude IJssel	80	9	Delta (IJssel)
	D	Berkel	115	9	Delta (IJssel)
	D	Schipbeek	86	4	Delta (IJssel)

Ponti farruviari

Ponti farruviari annantu à u Renu (incù i stazioni più prossimi à a riva sinistra è dritta):

Austria è Svizzara:
- trà Lustenau è Sankt Margrethen

Svizzara è Liechtenstein:
- trà Buchs è Schaan

in Svizzara:
- trà Flurlingen è Sciaffusa
- à Basilea

trà Francia è Alimagna
- trà Bantzenheim è Neuenburg am Rhein
- trà Neuf-Brisach è Breisach
- trà Strasburgu è Kehl

in i Paesi Bassi:
- vicinu à Culemborg.

Da veda dinò

Fonti

'Ss'articulu pruveni in parti o in tutalità da l'articulu currispundenti di a wikipedia taliana.