Nanna di Palleca
A Nanna di Palleca hè una nanna di Corsica. Issa nanna hè tipica di u righjonu di u Taravu. Salvatore Viale è Niccolò Tommaseo ni facini minzioni in i so Canti pupulari corsi è ni svelani u testu. In u paesi di Palleca, una minnana canta par addurmintà u so bisfigliolu.
A nanna
[mudificà | edità a fonte]Eccu u testu di a nanna, incù una ortugrafia più muderna.
- In Palleca di Pumonti
- Un ziteddu s'addivaia
- È la so cara mammona
- Sempri à trinnichà du stava
- Fendu li l'annannaredda
- È stu fattu li prigaia.
- Addurminteti vi o pegnu
- Aligrezza di mammona
- Ch'aghju da fà ni la cena
- È da cusgia li pilona
- Da lu vostru babbareddu
- È da i vostri fratiddoni.
- Quandu sareti maiori
- Currareti par li piani;
- L'arbi turrarani fiori
- L'oliu currarà à funtani;
- Turrarà balsamu fini
- Tutta l'acqua di lu mari.
- Vi faremu lu ghjacchettu
- Tuttu in rossu prufilatu
- Cù li pennuli pinzi
- È di bottuli scaccatu;
- È un barrittonu pinzutu
- Di trinnetta infiucchittatu.
- Andareti à lu stazzali
- Cù lu vosciu babbareddu;
- Vi ni stareti in capanna
- Calatu nantu un tineddu;
- È vi sarà prisintatu
- Un cuchjari di caghjatu.
- Quandu sareti grandonu
- Purtareti li voscii armi;
- Ùn vi farani paura
- Vultisgiori nè giandarmi;
- È s'è vo seti inzirmitu
- Sareti un fieru banditu.
- Tutti li voscii antinati
- Erani omini famosi;
- Erani lesti è gagliardi
- Sanguinarii è curaghjosi;
- M'aviani sempri à l'apposta
- Cutrachini è beddi cosi.
- Cinqui di li più maneschi
- Ni partini da Palleca
- Ghjunti di notti in Aiacciu
- Sbuttunoni una buttega
- È prima ch'è fussi ghjornu
- Funi sbrighi è di ritornu.
- Ogni donna di la razza
- Tredici anni nun francava
- Parchì quiddu impartinenti
- Chì la scuffia li tuccaia
- S'eddu un li mittia l'aneddu
- Dui sitimani ùn scampava.
- À i ricconi è praputenti
- Di Palleca è Ciamannaccia
- S'ùn valia la distrezza
- Li faciani li minacci;
- Sicch'è aviani in cunclusioni
- Tuttu à so dispusizioni.
- Ma l'infamu di Murandi
- Scurrunò la parintia;
- L'arristò tutti in un ghjornu
- È ni feci la stirpia;
- È li latri pallichesi
- L'aviani fattu la spia.
- Quindici funi impiccati
- Tutti quanti à meza piazza;
- Omini di gran' valori
- Lu fiori di la noscia razza;
- Forsi saristi o Santonu
- Par fà ni la vindicanza.
Da veda dinò
[mudificà | edità a fonte]Rifarenzi
[mudificà | edità a fonte]- Salvatore Viale, Canti popolari corsi, 1855, Fabiani:Bastia
- N. Tommaseo, 1841, Canti popolari - Canti toscani, corsi, illirici, greci, Venezia
- A. L. A. Fée, Voceri, Canti pupulari di a Corsica, 1850, Derivaux