Sheryn Regis

Sheryn Regis
Si Regis nagpasundayag sa UK 'niadtong 2009
Kinatibuk-ang Kasayuran
Ngalan sa pagkatawo	Sheryn Mae Poncardas Regis
Gihimugsû	(1980-11-26) Nobiyembre 26, 1980 Carcar, Cebu
Mátang sa musika	P-pop OPM
Panginabuhi	Mag-aawit tagsuwat og huni hostiya aktres
Katuigan	2003–karon
(Mga) timananan	Star Records (2003–karon)

Si Sheryn Mae Poncardas Regis usa ka bantog nga Pilipinong mag-aawit. Siya gipanganak sa Carcar, Sugbo nila ni Bernardo ug Daisy Regis. Siya ang kinamaguwangan sa tulo ka managsoon uban nila ni Elton ug Joseph.

Si Sheryn mas nahinumdoman isip labing paboritong kontestant sa Star in a Million diin siya miapil. Nakuha niya ang ikaduhang ganti human siya pildeha ni Erik Santos 'niadtong Enero 2004. Gikan sa pagka "Power Belter" ngadto sa pagka "Shining Diva", si Sheryn mas ilado na karon isip The Modern Jukebox Queen. Sukad pa kaniadto, nakuha na ni Sheryn ang suporta ug gugma sa mga tawo ug labing nailhan siya sa talagsaong pagkatugtog sa mga huni sama sa Come In Out of the Rain ni Wendy Moten, Maybe ni Roberta Flack ug Peabo Bryson, ug sa iyang bantog nga pag-awit sa Through the Fire ni Chaka Khan.

Kabatan-onan ug karera

Dili kayahay ang kabatan-on ni Sheryn. Samtang nagdako, natagamtaman sa iyang pamilya ang mahagiton nga dagan sa kinabuhi. Tungod sa kakulangon sa salapi, gikinahanglan nga molangyaw ang iyang amahan ngadto sa Saudi Arabia. Niadtong mga panahona gigiyahan si Sheryn sa iyang inahan nga si Daisy sa iyang pagkanta. Sa tinud-anay, ang amahan ni Sheryn ang maayong mokanta apan ang iyang inahan ang mipuli isip magtutudlo ni Sheryn sa pag-awit.

Sa batang panuigon nga duha, kahibalo na si Sheryn moawit og yano nga mga tono, matod pa sa iyang inahan. Ang una ug paboritong kantahon ni Sheryn sa mga indigay sa pag-awit mao ang Dito Ba ni Kuh Ledesma, nga nakat-onan ni Sheryn niadtong lima ka tuig pa lamang siya. Sa panuigon nga pito, nagsugod og apil-apil si Sheryn sa mga bangga sa pagkanta. Ang iyang daog sa pag-apil niya sa mga tigi sa pagkanta iyang gigamit sa pagpalit og album ni Shirley Bassey alang sa iyang sunod nga pagpakigtigi sa pagkanta. Sa panuigong walo unang nakadaog si Sheryn sa labing dakong ganti. Ang iyang gikanta adtong higayona mao ang Saan Ako Nagkamali? ni Ms. Tillie Moreno.

Samtang ang ubang bata naggahin og oras sa pagdula-dula, si Sheryn walay kapuol sa pagbansay-bansay og awit alang sa sunod nga mga indigay. Bisan walay tanol nga pagtuon, nahinumdoman niya nga kaniadto nagkanta-kanta siya duol sa halawom nga atabay para maabot niya ang hataas na mga nota.

Nasulayan usab ni Sheryn ang pagtudlo og awit sa mga bata sa dihang diha siya sa hayskol. Pagtungtong niya sa balay kaalam, nahuman ni Sheryn ang kursong batsilyer sa sekundaryang bangkaagan, mayor sa Iningles, sa Tunghaang Normal sa Sugbo (karon Unibersidad Normal sa Sugbo). Niining mga higayona miapil sab siya sa pagpadayag sa arte sa teyatro. Tungod niini, nahatagan siya og higayon sa pagpanaw sa lainlaing nasod, lakip na ang Kanada ug Amerika. Kaniadtong tuig 1999, midaog si Sheryn isip Labing Maayong Maghuhubad sa Cebu Pop Music Festival (usa ka indigay sa pagmugna ug paghubad og mga awit) ug ang litunganay nga giawit niya midaog usab sa labing dako nga ganti.

Nagtrabaho si Sheryn isip usa ka mag-aawit sa Cebu Plaza Hotel diin niya makita ang tinuoray nga gugma sa iyang kinabuhi, si Earl Echiverri, nga usa ka piyanista kaniadto. Bisan sa hadako nga gintang sa ilang mga pangedaron, wala kini mahimong babag sa ilang pagminahalay. Niadtong 2002 gikasal sila ug gitugahan og usa ka anak na gianggaan nila og "Sweetie".

Sa tuig 2003, gisulayan ni Sheryn ang iyang suwerte sa Star in a Million sa ABS-CBN. Siya ang kanunayng labaw sa iyang mga kakompetensiya ug nahimong pinasidunggan sa mga mipili pinaagi sa teks, apan miuli siyang ikaduha lamang. May mitanyag kaniya og kontrata apan tungod sa iyang utang kabubut-on sa ABS-CBN, ang kontratang gikan sa maong sibyaanan ang iyang gilagdaan.

Mga bag-ong kalamboan

Takos ra usab nga tawgong kampeyon si Regis human sa Star in a Million. Daghang mga kahigayonan ang miabot kaniya human sa maong bangga. Ang awit nga Come In Out of the Rain (ang iyang giawit sa kampeyonato sa Star in a Million) nahimong popular sa radyo. Kini nakaabot sa unang puwesto sa MYX Hit Chart ug milungtad og 12 ka pitlaw niini.

Niadtong Abril 2004, gipagawas sa Star Records ang labing unang album niya, nga giulohag Come In Out of the Rain. Sulod lamang sa tulo ka bulan, nahimo na kining platinum. Lakip sa mga awit sa maong album ang "Kailan Kaya" (sinulat ni Cacai Velasquez ug Raul Mitra) nga gigamit sa pantaseryeng Marina.

Nalakip usab si Regis sa mga variety shows, sama sa Magandang Tanghali Bayan, Most Requested Show, ug ASAP ’06. Gipili si Sheryn ni Vehnee Saturno isip usa ka tinugyanan sa Pilipinas alang sa 2004 Voice of Asia Song Festival nga gipahigayon sa nasod sa Kazakhstan ug diin napunggit niya ang ikaduhang ganti.

Kauban niya sila si Sarah Geronimo, Erik Santos, Rachelle Ann Go, Frenchie Dy, Jerome Sala, Kris Lawrence, Jed Madela, Mark Bautista ug si Christian Bautista sa pundok sa mga "Champions", mga mag-aawit nga Pilipino nga misikat tungod sa pag-apil og mga bangga sa pag-awit.

Kaniadtong Hulyo 2005, gipagawas ni Sheryn ang ikaduhang album nga giulohag What I Do Best. Ang kantang "What I Do Best" sa maong album gigantihan isip Best Song by a Female Performer sa iFM Pinoy Music Awards sa nahisgotang tuig. Siya ang miawit sa "Sabihin Mo Sa Akin" nga gigamit sa pantaseryeng Kampanerang Kuba sa ABS-CBN (gidala ni Anne Curtis). Ang iyang awit nga "Hindi Ko Kayang Iwan Ka" napili isip dugokang awit sa teleserye nila ni Kristine Hermosa ug TJ Trinidad sa Gulong ng Palad. Ang lain niyang kanta nga "Dahil Nagmamahal" napili usab nga dugokang awit sa tulumanong Nagmamahal, Kapamilya ni Bernadette Sembrano. Nahimong host si Sheryn sa nahumang Search for the Star in a Million Season 2, uban sa mga kampeyon nga sila si Erik Santos, Rachelle Ann Go ug Mark Bautista. Siya sab ang host sa Little Big Star Cebu, nga giisip ikaupat nga top-rating nga tulumanon sa Nationwide Charts sa ABS-CBN.

Kaniadtong Nobyembre 2006, gipagawas ni Sheryn ang ikatulong album nga giulohag The Modern Jukebox Collection.

Mga album

Atubangan sa album	Detalye	Titulo	Mga awit
Payl:Ciootr.jpg	May 2004 Star Records Platinum Award (30,000 units)	Come In Out of the Rain	Come In Out of the Rain Sana'y Ingatan Mo We Could Be in Love Kailan Kaya Sana’y Di Pangarap Maybe Now More Than Ever Shoobee Doo Wop Follow Your Dream Among Gabayan
Payl:Widb.jpg	July 2005 Star Records Gold Award (15,000 units)	What I Do Best	What I Do Best Sa Piling Mo I Don’t Want You to Go Now That I Have You Hindi Ko Kayang Iwan Ka Sabihin Mo Sa Akin When You Tell Me That You Love Me Dahil Nagmamahal If Ever I See You Again (Try It) On My Own
Payl:Srtmjc.jpg	November 2006 Star Records	The Modern Jukebox Collection	Ang Pag-ibig Kong Ito Alam Mo Ba? Sayang na Sayang Bago Magbukas After All Bakit Iniwan Mo Ang Lahat Para Sa'yo 'Di Na Ba Babalik Pa? I Remember the Boy Pusong Lito Bonus Track: Maria Flordeluna Minus One: Ang Pag-ibig Kong Ito Alam Mo Ba? After All I Remember the Boy Pusong Lito Sayang na Sayang

Mga mag-usang huni

Come In Out of the Rain

• 2004: Come In Out of the Rain
• 2004: Kailan Kaya (Marina OST)
• 2004: Maybe
• 2004: Follow Your Dream
• 2004: Sana'y Ingatan Mo

What I Do Best

• 2005: Sabihin Mo Sa Akin (Kampanerang Kuba OST)
• 2005: What I Do Best
• 2006: Hindi Ko Kayang Iwan Ka (Gulong ng Palad Love OST)
• 2006: Dahil Nagmamahal (Nagmamahal, Kapamilya OST)
• 2006: Sa Piling Mo

The Modern Jukebox Collection

• 2006: Ang Pag-ibig Kong Ito
• 2007: I Remember the Boy (Sana Maulit Muli Love OST)
• 2007: Maria Flordeluna (Maria Flordeluna OST)
• 2007: Ang Lahat Para Sa'yo
• 2008: Sayang na Sayang

Mga ganti

• Labing Maayong Maghuhubad ug Kampeyon, ika-17 nga Cebu Pop Music Festival (Enero 1999)
• University Songbird of the Year, Unibersidad Normal sa Sugbo (2000)
• Ikaduhang Ganti, Voice of Asia Song Festival, Kazakhstan (Agosto 2004)
• Top Entertainer International Achievement Awardee, 21st Year-Ender Excellence Awards (Pebrero 2005)
• Labing Maayong Babayeng Manlilingaw, People's Choice Awards (Oktubre 2005)
• Best Song by a Female Performer para sa "What I Do Best", iFM Pinoy Music Awards (Enero 2006)
• Song of the Year Award para sa "Hindi Ko Kayang Iwan Ka", S-Magazine's People's Choice Awards (Oktubre 2006)