Banniel Kernev-Veur

Geoffroy le Borgne;	Sant-Pezran;
; Rouvroy; de Saint-Simon	; Kêr Arneke

Banniel sant Peran (Baner Peran e kerneveureg) a vez graet eus banniel broadel Kernev-Veur. Ur banniel du gant ur groaz wenn eo, pa oa banniel kozh Breizh unan gwenn gant an hevelep kroaz du.
Hervez ar vojenn e vije bet dibabet an daou liv gant Peran pa welas staen teuz gwenn o tiverañ diouzh ar c'hailh du en e c'hovell. Kement-se a c'hoarvezas, evit doare, pa zizoloas ar staen er VI^vet kantved, a-raok bezañ lakaet da sant paeron ar vengleuzerien-staen. Evel-just e oa anavezet ar staen abaoe kantvedoù, ha kaset e veze ar metal-se eus Breizh-Veur da Arvorig gant moraerien vrezhon a-raok amzer Julius Caesar.

Orin

E gwirionez, den ne oar a-zivout orin banniel Kernev-Veur.
Lod istorourien a lavar e oa eus ar banniel-se kent 1188, e Brezelioù ar Groaz. Ur pennad en Encyclopædia Britannica a embann e veze douget gant Kerneveuriz en Emgann Azincourt d'an 25 a viz Here 1415^[1], hogen kamm eo an dave roet, pa gas d'ur varzhoneg anvet Poly-Olbion bet embannet e 1612 gant ar Saoz Michael Drayton (1563-1631) ma skrivas e oa ur c'hrogad gouren kerneveurat war ar banniel en Azincourt^[2].

Kentañ testeni skrivet a-zivout banniel sant Peran eo labour ar C'herneveurad Davies Gilbert (1767-1839) en e levr The Parochial History of Cornwall (1838) :

A white cross on a black ground was formerly the banner of St. Perran, and the standard of Cornwall; probably with some allusion to the black ore and the white metal of tin.
« Ur groaz wenn war ur goueled du a oa gwechall banniel sant Perran, ha banniel Kernev-Veur ; hep mar gant un damveneg bennak eus kailh du ha metal gwenn ar staen. »^[3]

Dre ma skrivas D. Gilbert e oa « gwechall » banniel sant Peran hini Kernev-Veur e ro da gompren e veze arveret a-raok 1838.

Un testeni all a weler en abati Westminster war ur werell bet diskuliet e 1888 e koun an ijinour kerneveurat Richard Trevithick (1771-1833). Nav sant kerneveurat zo warni, ha dremm an ijinour zo bet roet da sant Peran, banniel Kernev-Veur ouzh e dreid^[4].

Kar eo banniel sant Peran da hini sant Dewi, paeron Kembre, ar vro geltiek dostañ da Gernev-Veur. Ur groaz wenn war gwer eo banniel sant Petroc, hini Devon (2002), ma 'z eo Petroc paeron ar vengleuzerien ivez^[5].

Talvoudegezh

Er c'hantved diwezhañ e veze gwelet banniel sant Peran evel banniel broadelourien Mebyon Kernow. Hiziv e vez dispaket aliesoc'h eget an Union Jack, ha deuet eo da vout arouez Kernev-Veur, hep ster politikel resis.

Hejet-dihejet e vez ar banniel en darn vuiañ eus ar gouelioù e Kernev-Veur koulz hag er c'hrogadoù sport. Boas e vezer d'e welout e pep lec'h er vro, gant an anv kerneveurek Kernow, hag arveret e vez er bed a-bezh evel arouez an diaspora kerneveurat.

Banniel sant Peran zo bet arveret da sevel bannieloù ha n'int ket ofisiel.

Kenwerzhourien gerneveurat war vor

Al lestr Sweet Promise e gouelioù « Brest 2000 », ardamezioù Dug Kernev-Veur er c'honk

Ardamezioù war an douar bras

Tiegezhioù

Koulz e Breizh hag e Bro-C'hall ez eus tiegezhioù kar o ardamezioù da vanniel sant Piran.

Breizh^[6]

Kerlosket : en sabel e groaz koñchek en argant.
Le Bastard de la Porte : en sabel e groaz en argant, teir flourdilizenn en argant ouzh pep konk..
Le Bihan de Keruzouarn : en sabel e groaz pavek en argant, karget ouzh kondon gant ur greskenn en gul.
Le Borgne, Geoffroy : en sabel e graz en argant^[7].
Saint Pezran (de) : en sabel e groaz pavek en argant^[8]^,^[9].

Bro-C'hall

Auvergne de Canteloup : en sabel e groaz en argant, eilet e pep konk gant ur penn bleiz diframmet en argant ha teodek en gul.
Rossillon de Gex : en sabel e groaz en argant^[10].
Rouvroy de Saint-Simon : en sabel e groaz en argant karget a bemp kregilhenn en gul, 1, 3, 1^[11].

Kêrioù

Kêr Arneke : en sabel e groaz en argant karget a bemp brizhenn erminig en sabel, 1, 3, 1.

Notennoù ha daveennoù

↑ (en) CRW Flags
↑ (en) The Complete Works of Michael Drayton, Andesite Press, 2017 (ISBN 978-1-375-65149-3)
↑ (en) Gilbert, David : The Parochial History of Cornwall, levrenn III, London, J. B. Nichols & Son, p. 332 • Lenn en-linenn
↑ (en) Westminster Abbey
↑ (en) Flag Institute
↑ (fr) Potier de Courcy, Pol (1890) : Nobiliaire et armorial de Bretagne
↑ (fr) Mundus Heraldicus
↑ (fr) Kervella, Divi & Bodlore-Penlaez, Mikael : Guide des drapeaux bretons et celtes, Yoran Embanner, 2008 (ISBN 978-2-916579-12-2)
↑ (fr) Tudchentil
↑ (fr) armorial.org
↑ Jean-Marie Ouvrard : Rouvroy de Saint-Simon

[1] (en) CRW Flags

[2] (en) The Complete Works of Michael Drayton, Andesite Press, 2017 (ISBN 978-1-375-65149-3)

[3] (en) Gilbert, David : The Parochial History of Cornwall, levrenn III, London, J. B. Nichols & Son, p. 332 • Lenn en-linenn

[4] (en) Westminster Abbey

[5] (en) Flag Institute

[6] (fr) Potier de Courcy, Pol (1890) : Nobiliaire et armorial de Bretagne

[7] (fr) Mundus Heraldicus

[8] (fr) Kervella, Divi & Bodlore-Penlaez, Mikael : Guide des drapeaux bretons et celtes, Yoran Embanner, 2008 (ISBN 978-2-916579-12-2)

[9] (fr) Tudchentil

[10] (fr) armorial.org

[11] Jean-Marie Ouvrard : Rouvroy de Saint-Simon

[1]

[2]

[3]

[4]

[5]

[6]

[7]

[8]

[9]

[10]

[11]