Everipedia
| Everipedia logo.svg | |
|---|---|
| Pan-komersyo? | Pang-negosyo |
| Uri kan Sityo | Internet encyclopedia project |
| Pagrehistro | Bakong Sapiritan |
| Mga tataramong igwa | Ingles |
| Kagsadiri | Everipedia, Inc. |
An Everipedia (/ˌɛvərɪˈpiːdiə, ˌɛvəri-/) sarong on-line na ensiklopedya na batay sa wiki. Ini namukna kan Desyembre 2014 asin an sityo kaini pigbungsod kan Enero 2015 bilang sarong "sanga" kan Wikipedia. Rogaring kan Everipedia, Inc., ini sarong kompanyang pang-negosyo namumugtak sa Westwood, Los Angeles, California. Sinasabing an kadaklan kan mga artikulo kaini mga kopya mansana kan mga napapalaman sa Wikipedya kan ini ultimong sini'rip kan Oktobre 2017.[1] An kagtogdas kan Everipedia iyo sinda Sam Kazemian, Travis Moore, Kedar Iyer asin si Mahbod Moghadam gabos mga alumni sa University of California, Los Angeles UCLA [2]
An pangaran na "Everipedia" hale sa pinagdukot na duwang kataga, an "everything" (arinman) asin "ensiklopedya".
An kaibahan na mayor kaini sa Wikipedya iyo, enot, ta an kompanya naggagamit kan inapod na "EOS blockchain technology" ngarig ini dai mabangga' asin mabagat kan ibang mga nasyon asin, ikaduwa, ini nagtataong token o tandan paagi nin crypto currency inapod na IQ ngane dumakol asin magtaba an laman kan ensiklopedya.[3]
Susog sa kagtogdas kaini, "An Everipedia iyo an sunod na entablado sa ebolusyon kan internet - samuyang sinararo an pinakamagayon na kabtang kan Wikipedia, Reddit, asin Google sa sarong binunyog asin tandayagan na ensiklopidya nin kaaraman nin tawo na madaling hanapon. Enot samong himohon an bagay na pig-ngata' asin dai nagibo kan Wikipedia: sarong plataporma na bukas nanggad para kiisayman - asin bako sanang sa magkapirang ribong editor - na makaka'ambag nin teks, toltolan, mga imahe asin video para sa mas mayaman na eksperensya sa ensiklopidya." Mahbod Moghadam Founder @ Everipedia[4]
Si Kazemian, saro sa kabakas, nagsabi na igwa nang 7,000 na taga'ambag asin taga-edit sa websityo asin maski mayo man nin hunta nin mga editor o algorithm sa pagrebyu kan lambang pahina na napupublikar, mismo an mga paragamit iyo an nag'papakaray asin nagbabantay bilang mga editor sa anoman na mga makaduda asin dai suportadong mga artikulo. Alagad, an kaibahan sa Wikipedia, ini inaako mga artikulo manongod sa kun siisayman na maski bako man ngani popular o maoonabihan na mga personalidad.[5]
