Toupet

Da Julius Caesar mid an Toupet

A Toupet is a Hoartei bzw. a Teiperuckn. Es wead moastns vo Monan dazua vawendt, um a hoiwade Glotzn obzdeckn. Toupets wean owa aa vo Weiwaleid gnuzd, vua oim ois Hoareaweidarung bzw. Hoarvalängarung.

Etymologie

Des Woat Toupet kimt ausm Franzesischn. Uaspringle wor damid a Hoarschopf (dt. Haartolle) gmoant, dea wo iwa da Stian liegt und duach toupian oda an untalegtn Poista afbauscht und mid ana Pomadn gfestigt wead. Intressantaweis gähd des Woat, so wia Zopf, afs urgermanische *tuppa zruck, des wo Obaseitn oda obas End bedeit (des englische Woat "top" is aa damid vawandt). Aus da franzesischn Bedeitung Hoarwuist oda Hoarschopf is aa de Bedeitung toupian z vasteh, "de Hoar afbauschn".

Gschicht

Toupets hom a lange Tradition. Des easchte bekannte Beispui is a Fund in an oidegyptischn Grob vo umara 3100 v.Kr.. Da Julius Caesar hod emfois a Toupet drogn. Vui Prominenz ausm lezdn Joarhundat hod Toupets gnuzt: Vom John Wayne bis zum Frank Sinatra.

Heit spuin Toupets neama so a grousse Roin, weis Oitanativmethodn zua Behandlung vo Glotzn gibd. Zum oan de Hoarvapflanzung zum andan Behandlung duach Medikament.

Im Endstadium vo da Foaschung und Entwicklung is a neie Methodn zua Zucht vo Hoazejn im Labor. So kannt in wenign Joar keapaoagnas Hoar am Schädl implantiad wean. Nacha bleibt fia de Toupets nua no a theatralischa Nutzn.

Schau aa

• Zopf
• Irokesenschnitt

Im Netz

 Commons: Toupet – Sammlung vo Buidl, Videos und Audiodateien