Teodoro Cuesta

Teodoro Cuesta
Vida
Nacimientu	Mieres, 9 de payares de 1829
Nacionalidá	España
Muerte	Uviéu, 1 de febreru de 1895 (65 años)
Estudios
Llingües falaes	asturianu; castellanu
Oficiu	escritor, poeta
Xéneru artísticu	poesía

Teodoro Cuesta García-Ruiz (9 de payares de 1829, Mieres – 1 de febreru de 1895, Uviéu), foi un poeta asturianu qu'algamó gran sonadía nel so tiempu.

Biografía

Nació nel barriu de La Pasera nel conceyu de Mieres. So padre, Ramón Cuesta, morrió anantes de nacer Teodoro, yera farmacéuticu y tenía una botica en Mieres. So madre María Luisa García-Ruiz, yera ama de casa. La so neñez trescurre en Mieres hasta qu'a los ocho años d'edá y debido a les dificultaes económiques familiares marcha a vivir col so güelu, Federico García-Ruiz, gran médicu qu'exercía n'Uviéu.

Tando na capital asturiana fai los primeros estudios hasta los quince años, momentu nel qu'abandona los estudios al entrar como caxista nuna imprenta d'Uviéu. Dende esti momentu y demientres tola so vida dedícase a estremaos trabayos, de los que se puede destacar: impresor, gacetilleru y periodista en Xixón, maestru de música en Mieres, tocador de xiblata, y emplegáu de beneficencia n'Uviéu.

Dende 1845 a 1876 dedícase al estudiu de la música, estudiando composición y armonía y centrándose na flauta, amás de tocar esti instrumentu entama a componer diferentes obres. Na so vida profesional dedícase al trabayu dientro de les imprentes, trabayando en diferentes talleres d'Uviéu y al final acaba trabayando na xerencia d'una imprenta en Xixón. Dempués de la so etapa de Xixón alcuentra trabayu n'Uviéu a onde torna en 1853. Ye nesta ciudá onde conoz a Dña. Gertrudis Urdangaray y Goy cola que se casa el 22 de setiembre de 1854 na ilesia de San Isidoro d'Uviéu.

En 1856 faise cargu de la banda de música de Mieres como direutor. Por dos años fai esti llabor con gran aciertu, lo que lu fai merecedor d'una creciente fama que-y fai al final algamar un ascensu y asina'l 7 de febreru de 1858 pasa a dirixir la banda de música del Hospiciu d'Uviéu.

El 30 de mayu de 1876 dempués de desempeñar un gran llabor dientro de la banda nómenlu alministrador del Hospiciu. Una vegada n'esti cargu entama a dedicase a la lliteratura más qu'al so llabor de músicu, hasta la so muerte en 1895.

Nel añu 1888 pola mor d'unos recortes de presupuestu, xubílase prematuramente del puestu del Hospiciu, lo que fai qu'entre nuna fase de declive económicu yá que'l dineru de la xubilación nunca-y llegó. Muerre en 1895 según se cree d'un infartu, siendo daquella una persona de gran sonadía y reconociemientu. El so funeral ye multitudinariu, celebrándose n'Uviéu, a esti actu asistieron les más importantes personalidaes de la dómina como Félix Aramburu, Fermín Canella o Leopoldo Alas (Clarín).

Obra lliteraria

Les primeres noticies que se tienen d'él son de 1845 nes que se llee el so primer poema de La «mendiga» nel Liceo uvieín.

Dende 1858 a 1876 dedícase básicamene a la música, y dientro de la so faceta de compositor, compón numberoses obres, sobre todo relixoses (misereres, ofertorios, salves...).

Collabora n'estremaes ediciones como «El Industrial», «El Faro Asturiano» y «El Independiente».

Les sos «Poesías asturianas» asoleyáronse en 1896 con prólogu d'Alejandro Pidal y Mon
«Andalucía y Asturias»
«El protomártir asturiano Fr. Melchor García Sampedro (Poema en bable)»

Ver tamién

Referencies

↑ ^1,0 ^1,1 Afirmao en: Proyecto Biblioteca Internacional de Partituras Musicales. Identificador IMSLP: Category:Cuesta,_Teodoro. Apaez como: Teodoro Cuesta. Data de consulta: 9 ochobre 2017.

Enllaces esternos

[0badeadf367933876de4923a5a55d10554604ef8-1] 1,0 ^1,1 Afirmao en: Proyecto Biblioteca Internacional de Partituras Musicales. Identificador IMSLP: Category:Cuesta,_Teodoro. Apaez como: Teodoro Cuesta. Data de consulta: 9 ochobre 2017.

[1]