لحسين جانطي
لحسين جانطي
| ||
| معلومات عامة | ||
| زيادة | 1900 بيوݣرى | |
| لموت | 20 دجنبر 1975 (74/75 عام) | |
| لجنسية | لمغريب | |
| لحرفة | مغني و شاعير | |
| لّوغات لي كيعرف | تاشلحيت | |
| معلومات خرى | ||
| لألة | صوت، الرباب و لوتار | |
الرايس لحسين بن عبد الله بن براهيم أومالك، لمعروف ب سميت لحسين جانطي (بتاشلحيت: ⵍⵃⵓⵙⵉⵏ ⵊⴰⵏⵟⵉ، تولد عام 1900 - مات نهار 20 دجنبر 1975) كان مغني و شاعر و رايس مغريبي من قبيلة إشتوكن، تيغني بالشلحة على لوتار و الرباب. جانطي كان معروف بسميت الشاعر لمقاوم ولاّ الرايس د لمقاومة.[1]
ملّي كان صغير، خدم لحسين عند واحد لفرانساوية، و كان مهدب و ضريّف معاها، و سمّاتو "جونتي" (اللي هي ضريّف ب لفرانساوية). داكشي علاش بداو الناس كيسمّيو جانطي.
تولد لحسين جانطي عام 1900 ف دوار "إمزيلين" ف النواحي د بيوݣرى، ف لقبيلة د إشتوكن ف سوس. من صغرو كانت عزيزة عليه لموسيقا و كان كيضرب لوتار و الرباب. ولكن حيت كانت عائلتو ما فحالهاش، مشا للدار لبيضا هو و خوه مبارك باش يخدمو. تمّا بانليه لإستعمار و شاف لفرق بين لعيشة د لمغاربة و لفرانساويين اللي مستعمرينهوم.
من ديك الساعة جا للحسين لحس لوطني، خرج من لخدمة و ولاّ رايس تيدور ف لمدون و الدواور و تيخرّج لقصايد على لإستعمار و لخونة، و تيشجع الناس باش يناضلو و يتورو. بسباب هاد لمقاومة ديالو، دخل جانظي بزاف د لمرات للحبس، ف الدار لبيضا و تيزنيت و أڭادير. آخر مرّة تسجن كانت ف 1953 و موراها دارتو فرانسا ف لإقامة بزز ف الدوار ديالو، اللي بقا فيه تا ستاقل لمغريب ف 1956.[2]
ف 2015، خرّج محمد مستاوي كتاب فيه 122 صفحة ب لعربية، سميتو "منتخبات من شعر المقاوم الرايس الحسين جانطي"، تيهضر على لقصايد والشعر اللي كتب لحسين جانطي ضد لإستعمار لفرانساوي.[3]
- ^ "شخصيات: الرايس والشاعر المقاوم "الحسين جانطي" - أزول بريس (2019)". مأرشيڤي من لأصل ف 2023-05-31. تطّالع عليه ب تاريخ 2023-05-31.
- ^ "لعيشة د الرايس جانطي (بلفرانساوية) - 2010". مأرشيڤي من لأصل ف 2023-05-31. تطّالع عليه ب تاريخ 2023-05-31.
- ^ "تقديم أولي لكتاب -منتخبات من شعر المقاوم الرايس الحسين جانطي - محمد أردجال - الحوار المتمدن (2015)". مأرشيڤي من لأصل ف 2023-05-31. تطّالع عليه ب تاريخ 2023-05-31.
 هادي زريعة ديال مقالة علا موضوع عندو علاقة ب شخصيات د لمغريب خاصها تّوسع. تقدر تشارك ف لكتبة ديالها. |