The Man Who Would Be King (cinta)

Iste articlo ye en proceso de cambio enta la ortografía oficial de Biquipedia (la Ortografía de l'aragonés de l'Academia Aragonesa d'a Luenga). Puez aduyar a completar este proceso revisando l'articlo, fendo-ie los cambios ortograficos necesarios y sacando dimpués ista plantilla.

Iste articlo ye sobre una cinta de cine d'aventuras anglo-estausunidense de 1975; ta atros usos, se veiga The Man Who Would Be King.

The Man Who Would Be King
Títol	The Man Who Would Be King
Póster teatralizau d'a cinta, obra de Tom Jung.
Ficha tecnica
Dirección	John Huston
Dirección artistica	Alexandre Trauner Tony Inglis Peter James
Producción	John Foreman
Guión adaptau	John Huston Gladys Hill
Basau en	The Man Who Would Be King, cuento de Rudyard Kipling
Musica	Maurice Jarre
Fotografía	Oswald Morris
Montache	Russell Lloyd
Vestuario	Edith Head
Actors	Sean Connery Michael Caine Christopher Plummer Saeed Jaffrey Shakira Caine
Datos y cifras
País(es)	Estaus Unius Reino Uniu
Anyo	1975
Debantadera	26 de noviembre de 1975
Chenero(s)	Cine d'aventuras
Durada	129 min.
Idioma(s)	Anglés
Companyías
Productora(s)	Columbia Pictures
Distribución	Columbia Pictures
Estudio(s)	Pinewood Studios
Presupuesto	8,5 millons de dólars
Recauto	11 millons de dólars
Informacions en bases de datos especializadas:

The Man Who Would Be King (títol orichinal en anglés, en aragonés L'hombre que quereba estar rei; enguerada en Aragón con o títol en castellano de El hombre que pudo reinar, L'hombre que podió reinar en aragonés) ye una cinta anglo-estausunidense de l'anyo 1975 de cine d'aventuras dirichida por John Huston seguntes un guión adaptau por él mesmo y por Gladys Hill d'un cuento de Rudyard Kipling, The Man Who Would Be King, publicau en 1888 fendo parte d'a colección de cuentos The Phantom Rickshaw and Other Tales. Producida por John Foreman ta la productora Columbia Pictures, con una Banda Sonora Orichinal de Maurice Jarre y una dirección de fotografía d'Oswald Morris, en l'elenco d'a cinta participan, entre d'atros, os actors Sean Connery, Michael Caine, Christopher Plummer, Saeed Jaffrey y Shakira Caine.

Ambientada en o Raj britanico de finals d'o sieglo XIX, a cinta explica las aventuras de dos antigos suboficials de l'exercito britanico en o Kafiristán, actualment situau en Afganistán, rodando-se en os Pinewood Studios en o reino Uniu y en localizacions exteriors en Francia (Chamonix, a on se filmoron as escenas de lurtes), Estaus Unius y Marruecos, en obtenendo cuatro nominacions a los Premios Oscar, dos a los Premios BAFTA y una atra a los Premios Globos d'Oro.

Argumento

En l'anyo 1885 mientres o Raj britanico, lo periodista britanico Rudyard Kipling ye abordau por un candanero aparentment enlocau qui li diz estar Peachy Carnehan, un antigo conoixiu. Carnehan explica a Kiplig que él y lo suyo companyero Daniel Dravot (toz dos antigos sarchentos de l'exercito britanico destacau en a India) viachoron dillá d'as mugas d'a India con Afganistán, plegando dica lo Kafiristán, amán d'o territorio de l'Imperio Ruso.

Feba tres anyadas que Carnehan y Dravot heban conoixiu a Kiplig cuan Carnehan, diimpués de robar-li lo reloch, heba visto que portaba un simbolo masón y en parar cuenta que heba robau a un companyero masón, decidió de tornar-lo-li. En ixas envueltas Carnehan y Dravot yeran preparando un complot ta fer chantache a un rachá y Kipling heba frustrau ixe plan en fer que intervenisen as autoridaz britanicas, salvando-se Carnehan d'a suya deportación nomás que porque estió capable de fer un nuevo chantache, ista vegada a lo comisionau britanico.

Frustraus por a falta d'oportunidaz ta fer en a India trapazas ta obtener bella ganancia en estar o país cada vegada mas regulau y ordenau (en parte gracias a lo suyo propio treballo como militars) y con garra expectativa si tornasen en a metropoli britanica, de no estar bel treballo mal pagau, Carnehan y Dravot se presentan en a oficina de Kipling ta explicar-li lo suyo nuevo plan. Armaus con vinte rifles y la suyas correspondients municions, albandonarán a India ta dirichir-se enta lo remoto y perigloso Kafiristán, en trescruzando lo no menos perigloso Afganistán dica plegar-ie. En ixe territorio, que ye desconoixiu de raso ta los europeus, ya trobarán bel gubernant d'o lugar que ameniste los suyos servicios como mercenarios y l'aduyarán a redotar a los suyos enemigos, encara que cuan l'haigan conseguiu lo derrocarán a él ta asinas poder espullar o reino tranquilament. Kipling preba de disuadir-los pero en no lograr-lo lis fa entrega d'un simbolo masonico en preba de chermandat.

Carnehan y Dravot sinyan, con Kipling como testigo, un contracto a on alcuerdan renunciar a l'alcol y a las mullers, y bien luego marchan enta lo norte, dica lo paso Khyber ta dentrar en Afganistán. Mientres bellas semanas viachan en trescruzando ixe país y luitando contra bandolers, tronadas de nieu y lurtes. Finalment, cuan plegan en Kafiristán troban a Billy Fish, un antigo soldau gurkha a lo servicio d'os britanicos que ye o solo supervivient d'una expedición britanica que heba plegau en Kafiristán feba bellas anyadas. Billy, qui charra l'anglés y la luenga local, ye imprescindible t'aduyar-los en a suya aventura. En primeras troban a lo chefe d'un lugarón que se troba menazau y constantement espulauu por os suyos vecins y lu ufren os suyos servicios. Cuan lo chefe accepta, principian a entrenar a un chicot grupo de soldaus; cuan consideran que lo suyo chicot exercito ye preparau, marchan contra un lugarón vecino los habitants d'o cual gosan espullar a las chents que agora fan parte d'o suyo exercito. Mientres a batalla, una flecha enemiga se clava en l'uniforme de Dravot, pero ni él ni Carnehan paran cuanta d'a importancia d'iste escaicimiento.

En veyer os suyos soldaus mesmo que los soldaus enemigos que la flecha no li ha produciu garra danyo, encara que teneba que haber-lo matau en clavar-se en o suyo corazón, toz lo consideran un dios vivient y, en consecuencia, s'adhiben a lo suyo exercito, que marcha enta lo siguient lugar, a on viven enemigos de qui acababa de redotar. Pero istos tamién se li adhiben, en un proceso que se repite dica que no queda garra enemigo. alavez, deponen a lo rei a qui dica l'inte teoricament serviban, pero lis plega una petición que no pueden refusar: o sumo sacerdot d'a redolada los ha convocau a la suya ciudat sagrada de Sikandergul. En plegar-ie, lo sumo sacerdot decide que son uns embabucadors y ordena la suya muerte, pero en desperfilar a chupa de Dravot veye o simbolo que leva colgau d'o suyo cuello, que no ye atro que lo simbolo masonico que Kipling li heba dau. alavez lo sacerdot lo dixa libre en creyer que sí que ye un dios, porque ixe simbolo masonico, una estrela de cinco puntas, ye coincident con un simbolo secreto que nomás que él conoixeba y que heba marcau en a roca lo mesmo Alexandre lo Gran, o zaguer conquistador d'a redolada y que, cuan marchó, afirmó que bel día ninviaría a lo suyo fillo ta que los gubernase.

Asinas, os kafiristanesos aclaman a Dravot como a un dios, en considerando-lo lo fillo d'Alexander, y lo portan dica una cambra con un gran tresoro en forma d'oro, archent, piedras preciosas y choyas. Carnahan proposa pillar tot lo que puedan portar-se con éls y marchar escapaus enta la collada ta tornar en a India antes de que plegue l'hibierno y la nieu zarre lo paso. Pero Dravot tien una idea diferent: se veye en dictando leis, recebindo l'adulación d'os nativos y mesmo suenia con tractar-se a lo mesmo livel con a reina Vitoria. Tamién ha conoixiu a una polidisma mesacha clamada Roxana (mesmo que la muller d'Aleixandre) y decide casar-se con ella y tener fillos, dando asinas orichen a la suya propia dinastía.

Elenco

Actor	Papel	Notas
Sean Connery	Daniel Dravot
Michael Caine	Peachy Carnehan
Christopher Plummer	Rudyard Kipling
Saeed Jaffrey	Billy Fish
Larbi Doghmi	Ootah
Jack May	Comisionau d'o dictricto
Karroom Ben Bouih	Kafu Selim
Mohammad Shamsi	Babu
Albert Moses	Ghulam
Paul Antrim	Mulvaney
Graham Acres	Oficial
The Blue Dancers of Goulamine	Bailarins
Shakira Caine	Roxanne
Nadia Atbib	Bailarina	No acreditada
Yvonne Ocampo	Bailarina	No acreditada
Gurmuks Singh	Soldau sikh	No acreditau
Kimat Singh	Soldau sikh	No acreditau

Producción

The Man Who Would Be King heba estau un prochecto favorito de John Huston dende que heba leyiu o cuento de Kipling de nino. Teneba la idea de fer ista cinta dende los anyos 1950, pensando en os actors Clark Gable y Humphrey Bogart como Daniel Dravot y Peachy Carnehan, respectivament. Tanimientres no podió completar iste prochecto antes de que morise Bogart en 1957 y Gable en 1960. En os anyos 1960 pensó en Burt Lancaster y Kirk Douglas y dimpués en a parella Richard Burton y Peter O'Toole. En os anyos 1970 prebó con os actors Robert Redford y Paul Newman, pero Newman li suchurió que estasen actors britanicos qui protagonizasen a cinta, estando él mesmo qui recomendó a Connery y Caine. Caine s'intresó muito en a historia, y encara mas cuan li dicioron que lo papel s'heba pensau en primeras ta Humphrey BogarT, qui yera lo suyo actor favorito cuan era nino.

O papel de Roxana (lo solo papel femenín d'a cinta) s'heba pensau que estase ta Tessa Dahl, la filla de Roald Dahl y l'actriz Patricia Neal. Tessa yera bien intresada en o papel y mesmo perdió peso ta poder interpretar-lo, pero finalment Huston consideró que yera millor boscar una actriz que estase mas conforme con l'aspecto fisico que se suposa ta los nativos de Kafiristán. Mientres una cena con Caine, se diz que dició que "amenistamos trobar una princesa arabe el bel puesto". alavez paroron cuenta que en ixa mesma cena se trobaba Shakira Caine, la muller de Caine, qui yera descendient d'indios, y finalment Huston y Caine la convencioron ta que acceptase lo papel.

A mayor parte d'o rodache s'escaició en os Pinewood Studios, amán de Londres. Ta las escenas exteriors, se facioron filmacions en Francia (en Chamonix, a on se filmoron as escenas de nieu y lurtes), en Estaus Unius (en a Glen Canyon National Recreation Area en Utah) y Marruecos (en Ouarzazate).

Premios

Premio	Calendata	Edición	Categoría	Premiau	Notas
Premios Oscar	1976	48ena edición	Nominada a l'Oscar a lo Millor Guión Adaptau	John Huston, Gladys Hill
	1976	48ena edición	Nominada a l'Oscar a la Millor Dirección Artistica	Alexandre Trauner, Tony Inglis, Peter James
	1976	48ena edición	Nominada a l'Oscar a lo Millor Disenyo de Vestuario	Edith Head
	1976	48ena edición	Nominada a l'Oscar a lo Millor Montache	Russell Lloyd
Premios BAFTA	1976	29ena edición	Nominada a lo BAFTA a la Millor Fotografía	Oswald Morris
	1976	29ena edición	Nominada a lo BAFTA a lo Millor Disenyo de Vestuario	Edith Head
Premios Globos d'Oro	1976	33ena edición	Nominada a lo Globo d'Oro a la Millor Banda Sonora	Maurice Jarre
Premios WGA	1976		Nominada a lo WGA a lo Millor Guión Adaptau de Drama	John Huston, Gladys Hill
Premios d'a Semana Internacional de Cine de Valladolit	1976	21ena edición	Nominada a la Espiga d'Oro d'a Semana Internacional de Cine de Valladolit	The Man Who Would Be King

Critica

John Simon, d'a revista New York consideró que la cinta yera lo millor treballo de Houston dende The African Queen, vintitrés anyadas antes.

O critico Jay Cocks escribió en Time que:

John Huston heba queriu fer ista cinta dende fa mas de vinte anyadas. Pagó la pena l'aspera. Una cinta suau, estrident y vigorosa, rica en aventuras y malinconia, The Man Who Would Be King representa lo millor treballo ha feito Houston en una decada. Mesmo que The Treasure of the Sierra Madre (1947), The Man Who Would Be King ye tamién una meditación sobre los excesos de l'ambición y l'avaricia

Jay Cocks

Vincent Canby en The New York Times deciba que:

logra estar muit divertida en sí mesma y ye muit fiel a Kipling, la historia d'o cual, escrita en a decada de 1890, ye una especie de metafora vulgar d'a experiencia colonial britanica que no remató que dica un atro medio sieglo dimpués

Vincent Canby

D'atra man, o critico Roger Ebert li atorga cuatro estelas sobre cuatro y afirma que:

aventura de capa y espada, pura y simpla, y en mans de un mayestro. Ha pasau muito tiempo dende que habió un entretenimiento escapista tan descarau (...) y emocionant y divertiu... Obtenemos caracterizacions solidas, mos emocionamos y, lo millor de tot, mos reímos de cabo ta cuan

Roger Ebert

Gene Siskel en o Chicago Tribune li da tamién cuatro estrelas sobre cuatro y fa las siguients valoracions:

una historia d'aventuras chenuinament incheniosa y culta... que caldría que atrayese a toda la familia. Os ninos mas grans de 10 anyadas espleitarán en estar transportaus a un atro mundo de casbahs y camellos; os adultos s'agavillarán con un dialogo inchenioso, en a suya mayor parte preso d'a suya fuent, una historia de Rudyard Kipling

Gene Siskel

Tanimientres, una critica en Variety ye negativa enta l'actuación de Michael Caine:

estase u no la intención d'o director y adaptador John Huston, la historia d'acción y aventura se convertió en una comedia masiau ampla, mas que mas a causa d'a mala actuación de Michael Caine

En Espinof Alberto Abuín valora asinas a cinta, centrando-se mas que mas en o suyo director, John Huston:

(en ista cinta) la palabra "perdedor" plega en o suyo significau cinematografico por antonomasia, mas que mas en o cine d'o suyo autor (qui) trobó lo punto mas alto d'a suya filmografía en iste treballo (...) plegando (con ista adaptación de Kipling) en a cota mas alta d'o suyo cine. Pocas vegadas en a historia d'o cine o chenero d'aventuras ha estau tan bien tractau

Alberto Abuín

Se veiga tamién

• Cine en 1975.
• Cintas de 1975.

Vinclos externos

• (en) The Man Who Would Be King en Internet Movie Database.
• (en) The Man Who Would Be King en AllMovie.
• (en) The Man Who Would Be King en TCM Movie Database.
• (en) The Man Who Would Be King en l' American Film Institute Catalog de l'American Film Institute.
• (en) The Man Who Would Be King en Box Office Mojo.
• (en) The Man Who Would Be King en Rotten Tomatoes.

• Datos: Q1042931