GNU General Public License

Iste articlo ye en proceso de cambio enta la ortografía oficial de Biquipedia (la Ortografía de l'aragonés de l'Academia Aragonesa d'a Luenga). Puez aduyar a completar este proceso revisando l'articlo, fendo-ie los cambios ortograficos necesarios y sacando dimpués ista plantilla.

A Licencia Publica Cheneral de GNU u mas conoixida por o suyo nombre en anglés GNU General Public License (u simplament as suyas siglas de l'anglés GNU GPL) ye a licencia mas amplament usada en o mundo d'o software y guarancia a os usuarios finals (personas, organizacions, companyías) a libertat d'usar, estudiar, compartir (copiar) y modificar o software. O suyo proposito ye declarar que o software cubierto por ista licencia ye software libre y protecher-lo de intentos d'apropiación que restrinchan ixas libertaz a os usuarios. Ista licencia fue creyada orichinalment por Richard Stallman fundador d'a Free Software Foundation (FSF) ta o prochecto GNU.

A licencia GPL puet estar usada por cualsiquiera, ya que a suya finalidat ye protecher os dreitos d'os usuarios finals (usar, compartir, estudiar y modificar). Ista ye a primera licencia copyleft ta uso cheneral, o que significa que os treballos derivaus nomás pueden estar distribuyius baixo os termins d'a mesma licencia. Baixo ista filosofía, a licencia GPL guarancia a os destinatarios d'un programa d'ordinador os dreitos y libertaz reunius en definición de software libre y usa copyleft ta asegurar que o software ye protechiu cada vegada que o treballo ye distribuiu, modificau u enamplau. En a forma de distribución (solament pueden estar distribuius baixo os termins d'a mesma licencia) se diferencian as licencias GPL d'as licencias de software libre permisivas, d'as cuals os eixemplos mas conoixius son as licencias BSD (BSD licenses).

O software baixo licencia GPL puet estar aplicau baixo toz os propositos, incluius os propositos comercials y mesmo como ferramienta de creyación de software propietario. En uso purament privativo (u interno), sin vendas ni distribucions implicadas, o software puet estar modificau sin liberar o codigo fuent pero, en caso contrario, o codigo fuent y cualsiquier cambeo realizau en él debe estar disponible ta os usuarios, ya que en iste caso os dreitos de l'usuario son protechius por copyleft. D'ista forma, as aplicacions instaladas en sistemas operativos baixo licencia GPL como Linux, no cal que sían licenciadas baixo GPL u que sían distribuidas con o suyo codigo fuent disponible ya que as licencias no dependen d'a plataforma. Por eixemplo, si un programa ye formau completament por codigo orichinal, u si ye combinau con software que no cumple os requisitos de copyleft no cal que se licencie baixo GPL u que se distribuiga con o suyo codigo fuent disponible. Nomás si un programa utiliza fragmentos de codigo GPL (y o programa ye distribuiu) o codigo fuent en a suya totalidat ha d'estar disponible, baixo a mesma licencia.

A licencia LGPL (GNU Lesser Cheneral Public License) fue creyada ta tener dreitos menos restrictivos que GPL, por o que en iste caso en un programa que emplega fragmentos de codigo LGPL, no cal liberar o codigo orichinal.

Os usuarios u companías que distribuyen os suyos treballos baixo licencias GPL, pueden cobrar u distribuir-las gratuitament. Isto distingue as licencias GPL d'as licencias de software que prohiben a suya distribución comercial. A FSF argumenta que no s'ha de restrinchir a distribución comercial d'o software (incluindo a redistribución), ya que a GPL estableix explicitament que as obras cubiertas por ista licencia se pueden vender a cualsiquier pre.

Historia

A licencia GPL estió creyada por Richard Stallman en 1989 ta protecher os programas liberaus como parte d'o prochecto GNU. A licencia GPL orichinal se basó en a unificación de licencias semellants utilizadas en versions anteriors de GNU Emacs, GNU Debugger y de GNU Compiler.

Istas licencias conteneban disposicions semellants a las actuals GPL, pero yeran especificas ta cada programa, fendo-los incompatibles, manimenos estar a mesma licencia. L'obchectivo de Stallman yera producir una licencia que podese estar aplicada a cualsiquier prochecto, por o que ye posible utilizar-las en muitos prochectos ta compartir codigo. A segunda parte d'ista licencia, versión 2, fue liberada en 1991.

Entre os siguients 15 anyos, os miembros d'a comunidat FOSS prencipioron a preocupar-se con os problemas en a GPLv2 que permitiban explotar o software GPL con intencions contrarias a la licencia. Istos problemas incluiban tivoización, que ye a inclusión de software con licencia GPL en hardware que refusará executar versions modificadas d'o suyo software, problemas de compatibilidat como ocurre con a licencia Affero Cheneral Public License; y os pleitos por patents entre Microsoft y distribuidors de codigo libre y ubierto, o que se consideró como un intento d'usar as patents como arma contra a comunidat FOSS.

A tercera versión d'ista licencia (GNU) fue desembolicada ta tractar de resolver istos problemas y fue lanzada oficialment o 25 de chulio de 2007.

Versions

Versión 1

A versión 1 de GNU GPL, fue presentada o 25 de febrero de 1989, impidió o que yeran as dos prencipals formas con as que os distribuidors de software restrinchiban as libertaz definidas por o software libre.

O primer problema yera que os distribuidors publicaban nomás os fichers binarios, funcionals y executables, pero no entendibles u modificables por humans. Ta aprevenir isto, a licencia GPLv1 establió que cualsiquier proveedor de software libre amás de distribuyir o fichero binario heba de liberar a la suya vegada codigo fuent entendible y que podese estar modificau por o ser humano, baixo a mesma licencia (seccions 3a y 3b d'a licencia).

O segundo problema yera que os distribuidors podeban adhibir restriccions adicionals, ya estase adhibindo restriccions a la licencia u por meyo d'a combinación d'o software con unatro que tenese atras restriccions en a suya distribución. Si isto se feba, alavez a unión de toz dos conchuntos de restriccions sería aplicada a o treballo combinau alavez podrían adhibir-se restriccions inacceptables. Ta aprevenir isto, GPLv1 obligaba a que as versions modificadas en o suyo conchunto, hesen d'estar distribuidas baixo os termins GPLv1 (seccions 2b y 4ª licencia). Por tanto, o software distribuiu baixo GPLv1 puede estar combinau con software baixo termins mas permisivos y no con software con licencias mas restrictivas, o que dentraría en conflicto con o requisito que tot software ha d'estar distribuiu baixo os termins d'a licencia GPLv1.

Versión 2

Seguntes Richard Stallman, o mayor cambeo en GPLv2 estió a cláusula “Liberty or Death” (Libertat u Muerte), como a flama en a sección 7 d'ixe documento. Ista sección diz que si belún imposa restriccions que le prohiben distribuir codigo GPL de tal forma que influiga en as libertaz d'os usuarios (por eixemplo, si una lei imposa que ixa persona solament pueda distribuir o software en binario), ixa persona no puede distribuyir software GPL. A esperanza ye que isto ferá que sía menos tentador ta las interpresas o recurrir a las menazas de patents ta exichir una remuneración d'os desembolicadors de software libre.

En 1990 se fació evident que una licencia menos restrictiva sería estratechicament util ta la librería C y ta las librerías de software que esencialment feban o treballo que levaban a cabo atras librerías comercials ya existents. Cuan a versión 2 de GPL estió liberada en chunio de 1991, una segunda licencia Library General Public License fue quitada a o mesmo tiempo y numerada con a versión 2 ta denotar que as dos son complementarias. Os numeros de versions divergieron en 1999 cuan a versión 2.1 de GPL fue liberada, ista fue renombrada como GNU Lesser Cheneral Public License ta reflectar o suyo puesto en ista filosofía.

Versión 3

En zaguerías de 2005, a Free Software Foundation (FSF) anunció estar treballando en a versión 3 d'a GPL (GPLv3). O 16 de chinero de 2006, o primer borrador de GPLv3 fue publicau, y s'encetó a consulta publica. A consulta publica se planificó orichinalment ta durar de nueu a quince meses, pero finalment s'extendió a deciueito meses, entre os que se publicoron cuatro borradors. A GPLv3 oficial fue liberada por a FSF o 29 de chunio de 2007. Fue escrita por Richard Stallman con l'asesoramiento legal de Eben Moglen y o Software Freedom Law Center.

Seguntes Stallman os cambeos mas importants se producioron en o campo d'as patents de software, a compatibilidat de licencias de software libre, a definición de codigo fuent, y restriccions de hardware respective a las modificacions de hardware. Atros cambeos son relacionaus con a internacionalización, como son manulladas as violacions de licencias, y como os permisos adicionals pueden estar concedius por o titular d'os dreitos d'autor. Tamién adhibe disposicions ta sacar a o DRM a suya valor legal, por ixo ye imposible trencar o DRM en o software de licencia GPL sin trencar leis como a DMCA.

O proceso de consulta publica fue coordinau por a Free Software Foundation con asistencia de Software Freedom Law Center, Free Software Foundation Europe, y atros grupos de software libre. Os comentarios d'o publico estioron recolectados a traviés d'a pachinal web gplv3.fsf.org.

Entre o proceso de consulta publica, 962 comentarios fuoron presentaus ta o primer borrador. A la fin d'o proceso s'aconsiguió a cifra de 2.636 comentarios.

O tercer borrador fue liberau o 28 de marzo de 2007. Iste borrador incluye mecanismos destinaus a privar alcuerdos relativos a las patents, como o controvertido alcuerdo entre Microsoft y Novell y restrinche as clausulas anti-tivoización a una definición legal d'un "usuario" u "producto de consumo". Tamién elimina a sección de "Limitacions cheograficas", que o suyo prebable borrador s'heba anunciau en o lanzamiento d'a consulta publica.

O cuatreno borrador, que estió o zaguer, fue liberau o 31 de mayo de 2007. Ficó a compatibilidat con as Licencias Apache, clarificó o paper d'os contratistas externos, y fa una excepción ta privar os problemas provocaus por l'alcuerdo Microsoft-Novell, establindo en o paragrafo 6 d'a Sección lo siguient:

Vusté no puede distribuir un treballo amparado si vusté ye una parte d'un alcuerdo con un tercer que ye en o negocio de distribución de software, baixo o cual vusté fa o pago a la tercera parte sobre a base d'a extensión de l'actividat de distribución d'o treballo, y en virtut d'o como l'atorgue, a cualsiquiera d'as partes que recibirían o treballo amparado, una licencia de patent discriminatoria

L'obchectivo d'isto ye fer iste tipo de acuerdos ineficaces. A licencia ye orientada a que Microsoft haiga d'extender as licencias de patents ta guaranciar a os clients de Novell l'uso de GPLv3, o que ye posible solament si Microsoft ye distribuidor legal d'o software baixo GPLv3.

Cualques desembolicadors d'alto ran d'o kernel de Linux, comentoron y facioron declaracions publicas a os meyos de comunicación sobre as suyas obcheccions a os borradors 1 y 2.22

Termins y condicions

Os termins y condicions de GPL han d'estar disponible ta cualsiquiera que reciba una copia d'a obra a o como ha estau aplicada ista licencia. Cualsiquier licencia a la que se l'apliquen ditos termins da permiso a realizar modificacions a una obra, realizar copias y distribuyir-la u distribuyir cualsiquiera d'as suyas versions derivadas. Con ista licencia, ye permitiu cobrar por a distribución de cada copia, u no cobrar cosa. Iste zaguer punto distingue as licencias GPL d'as licencias de software que prohiben a distribución comercial. A FSF argumenta que en o software libre no debe haber puesto ta las restriccions comercials, y as obras baixo iste tipo de licencias pueden estar vendidas a cualsiquier pre.

A GPL, amás, estableix que un distribuidor no puede imposar "restriccions sobre os dreitos atorgaus por a GPL". Ista prohibe actividaz como a distribución d'o software baixo un alcuerdo de confidencialidat u contracto. Distribuidors baixo a GPL tamién conceder una licencia ta cualsiquiera d'os suyos patents software, ta estar utilizadas en software GPL.

A cuatrena sección d'a versión 2 d'a licencia y a decimoséptima sección d'a versión 3 requieren que que os programas distribuius como binarios precompilados sían acompanyaus d'una copia d'o codigo fuent, una ofierta por escrito ta distribuir o codigo fuent a traviés d'o mesmo mecanismo que o binario pre-compilau, u una ofierta por escrito ta obtener o codigo fuent d'o binario recibiu baixo a GPL. A segunda sección d'a versión 2 y a sección quinta d'a versión 3 tamién apuntan que cal suministrar "a toz os destinatarios una copia d'ista licencia de conchunta con o programa". A versión 3 d'a licencia permite que o codigo fuent sía disponible en distintas plataformas en complimiento d'a setena sección. Istos incluyen a descarga de codigo fuent dende un servidor de rete adchacent u a obtención d'o mesmo a traviés de peer-to-peer, siempre que o codigo compilau sía disponible y que i haiga "instruccions claras” sobre a on trobar o codigo fuent.

A FSF no permite l'aplicación de dreitos de copyright a una obra licenciada baixo GPL, a lo menos que l'autor los aplique explicitament (isto succede raras vegadas en con excepción d'os programas que forman parte d'o prochecto GNU). Solament os titulars d'os dreitos individuals tienen l'autoridat ta demandar una violación d'a licencia cuan se fa.

Copyleft

Os dreitos de distribución atorgaus por a GPL ta versions modificadas d'a obra no son incondicionals. Cuan belún distribuye baixo licencia GPL adhibindo a la obra as suyas propias modificacions, os requisitos ta la distribución d'a totalidat d'a obra no puede estar mayor que os requisitos que son en a GPL.

Iste requisito se conoixe como copyleft. Que aconsigue o suyo verdadero potencial en o caso d'os dreitos d'autor sobre o software. Si una obra GPL tiene dreitos copyright, no se tendrá dreito a distribuir ista obra, realizar modificacions (fueras de ta uso propio). En aplicar una licencia GPL a una obra, os dreitos d'a mesma serán protechius por a lei de dreitos d'autor. Y si por contra, se distribuyen copias d'a obra (licenciada baixo GPL) sin atener-se a os termins d'a GPL (por eixemplo, en mantener en secreto o codigo fuent), puede estar demandau por l'autor orichinal d'os dreitos d'autor.

Copyleft por tanto fa servir a lei de copyright ta aconseguir l'opuesto d'o suyo proposito usual: en cuenta d'imposar restriccions, atorga dreitos, de tal traza que guarencie que os dreitos no puedan estar posteriorment sacaus u restrinchius. Tamién asegura que si os dreitos amugaus de redistribución no se conceden u se produz cualsiquier falla legal se troba baixo a protección d'a lei.

Muitos distribuidors de programas baixo GPL empaquetan o codigo fuent con o executable. Una alternativa que cumple as bases de copyleft ye ye proporcionar una ofierta por escrito ta distribuir o codigo fuent en un meyo fisico (como por eixemplo un CD) baixo demanda. En a practica muitos programas baixo a GPL se distribuyen por internet, y o codigo se troba alochau en servidors FTP, HTTP...

Copyleft solament s'aplica cuan se tracta de redistribuyir o programa. Seguntes as suyas bases, ye permitiu fer privadas as modificacions realizadas, sin obligación de divulgar as modificacions siempre que iste software sía d'uso propio (no sía redistribuiu).

I habió un debat sobre si se tractaba d'una violación d'a GPL de liberar o codigo fuent tanto en forma oculta, como en forma deliberadament complexa a la comprensión. O consenso cheneral estió que, si bien no etica, no se consideró una violación. L'afer fue aclariu cuan a licencia fue modificada ta exichir que hese d'estar disponible a versión “preferida” d'o codigo fuent.

Licencias y temas contractuals

GPL estió diseñado orientau mas a una licencia que a un contracto. En cualques churisdiccions, a distinción legal entre una licencia y un contracto ye muit important: os contractos son executables por a lei de contractos, mientres que as licencias s'aplican en virtut d'o dreito d'autor. Manimenos, ista distinción no ye util en as diversas churisdiccions en que no existen diferencias entre os contractos y licencias, como os sistemas de dreito civil.

Aquels que no acceptan os termins d'a GPL y as suyas condicions no tienen permiso, en virtut d'o dreito d'autor, a copiar u distribuir software con licencia GPL u treballos derivaus. Manimenos, si no redistribuyen o programa, pueden utilizar o software en a suya organización a o suyo gusto, y istas obras (incluius os programas) construidas baixo iste uso no han d'estar baixo ista licencia.

Propietarios d'o Copyright

O texto que compone a GPL ye en él ye protechiu baixo copyright y ye propiedat d'a FSF. Manimenos, a FSF no ye titular d'o dreito d'autor d'una obra publicada baixo a licencia GPL, de no estar que l'autor asigne explicitament os dreitos d'autor a la FSF (que rara vegada succede con excepción d'os programas que forman parte d'o prochecto GNU). Solament os titulars d'os dreitos individuals tienen l'autoridat ta demandar una violación d'a licencia cuan se fa.

A FSF permite a o publico creyar nuevas licencias basadas en a GPL, siempre que as licencias derivadas no utilicen GPL sin permiso. Isto no se recomienda, ya que tal licencia puede estar incompatible con a GPL. Atras licencias creyadas por o prochecto GNU incluyen a GNU Lesser Cheneral Public License y a GNU Free Documentation License.

Compatibilidat y licencias multiples

Guía rapida d'a compatibilidat con a GPL..

Codigo licenciau baixo cuantas licencias puede estar combinau con programas con licencias GPL sin conflictos, siempre que a combinación de restriccions d'o treballo en o suyo conchunto no meta garra restricción adicional dillá de lo permitiu por a GPL.28 Amás d'os termins regulars d'a GPL, i hai restriccions y permisos adicionals que se pueden aplicar:

Si se quiere combinar codigo baixo diferents versions de GPL, se puede fer si o codigo con a versión mas antiga de GPL incluye a declaración “cualsiquier versión posterior”.
Codigo baixo LGPL puede estar vinculau con cualsiquier atro codigo, no importa que licencia tienga ixe codigo. Codigo baixo LGPLv2 sin a declaración “cualsiquier versión posterior” puede estar relicenciado si o treballo a o completo se licencia con una GPLv2 u una GPLv3.

A FSF mantiene una lista d'as licencias de software libre GPL-compatibles con muitas d'as licencias de software libre mas comuns, como a licencia orichinal MIT/X a licencia BSD (en a suya forma actual de tres cláusulas) y a licencia Artistic 2.0.

David A. Wheeler ha avogau a os desembolicadors de software libre/ubierto a que usen solament licencias GPL-compatibles, porque fer-lo d'unatra traza fa mas dificil ta os de demás a participación y a contribución a o codigo. Como eixemplo especifico d'incompatibilidat, ZFS de Sun Microsystems no puede estar incluiu en a licencia GPL d'o kernel Linux, porque iste ye baixo una GPL-incompatible CDDL. Amás, ZFS ye protechiu por patents, asinas que a distribución independient desembolicada por una implementación GPL requeriría o permiso de Oracle.

Cuantas interpresas usan licencias multiples ta distribuir una versión GPL y vender una propietaria a atras companyías que quieran combinar o paquet de codigo con codigo propietario, usando una vinculación dinamica u no. Eixemplos d'istas companyías incluyen MySQL AB, Digia PLC (Qt framework, antes d'o 2011 de Nokia), Ret Hat (Cygwin) y RiverBank Computing (PyQt). Atras companyías, como Mozilla Foundation (beluns d'os suyos productos incluyen Mozilla Application Suite, Mozilla Thunderbird y Mozilla firefox), usan licencias multiples ta distribuir versions baixo GPL y atras licencias de codigo ubierto.

Validez legal

A licencia GPL, en estar un documento que cede bels dreitos a l'usuario, asume a forma d'un contracto, por o que usualment se denomina contracto de licencia u alcuerdo de licencia. En os países de tradición anglosaxona existe una distinción doctrinal entre licencias y contractos, pero isto no ocurre en os países de tradición civil u continental. Como contracto, a GPL debe complir os requisitos legals de formación contractual en cada churisdicción.

A licencia ha estau reconoixida, entre atros, por chudgaus en Alemanya, particularment en o caso d'una sentencia en un tribunal de Múnich, o que indica positivament o suyo validez en churisdiccions de dreito civil.

Enlaces externos

Datos: Q7603
Multimedia: GPL / Q7603