Supercomputer

Dr Columbia-Supercomputer vo dr NASA mit 20x 512 Intel-Itanium-2-Prozässer

E Supercomputer oder Superrächner isch e Hochleistigsrächner, wo zum Ziitpunggt won er iigfüehrt wird im oberste realisierbare Leistungsberiich schafft. Drbii isch s nid wichdig, wien er ufbaut isch.

E typischs Merkmol vom ene modärne Supercomputer isch die grossi Zahl vo Prozässer, wo uf gmeinsami Peripheriigrät und uf e Hauptspiicher, wo deilwiis gmeinsam isch, chönne zuegrife. Die groossi Zahl vo Prozässer chunnt drvo, ass me d Gschwindigkeit vom ene einzelne Prozässer nid cha beliebig höcher mache. Dorum wärde vili einzelni Rächner parallel gschaltet, wo jede drvo öbbe gliichziitig e chliine Deil vo dr Arbet macht. Alli Rächner wärde zentral gstüürt mit Programm wo bsundrigs uf Parallelitet usgrichdet si.