Schriftschteller

Als Schriftschteller werded Persone gnennt, wo im Verfasse vo eigene literarische Texte ihre bruefliche Schwerpunkt setzed. Dr Begriff schtammt us em 18. Jahrhundert, de Iidüütschige vo de Wörter Skribent und Autor. Jede Schriftschteller isch gliichziitig Autor (Verfasser), allerdings werded hüt insbsunderi d Autore vo Belletristik als Schriftschteller betrachtet. D Verfasser vo Sachtexte degäge gälted biischpiilswiis als Sachbuechautore.

Als Bruef isch dr freii Schriftschteller gege Endi vom 18. Jahrhunderts entschtande.

Inhält

Bi de Werch vomene Schriftschteller channs sich sowohl um erzählendi Prosa-Text als au um Drame, Essays oder lyrischi Werch handle. Schriftschteller isch en Überbegriff für Autore oder Verfasser vo de gnännte Textgattige. Mitunder werded Schriftschteller, wo de Schwerpunkt vo ihrer Arbet uf e Gattig verleged entsprechend als Romancier, Dramatiker, Essayischt oder Dichter bezeichnet.

Uusbildig und Training

Es git kei beschtimmti Uusbildig zum Schriftschteller. Viili Autore händ sich s Schriibe ganz eifach selber biibracht. Anderi studiered an Universitäte oder Akademie, bsueched Kürs oder lesed Büecher. A dr Universität Hildesheim und dr Universität Leipzig (Düütsches Literaturinschtitut Leipzig) gits mittlerwiile e schriibhandwerchlichi Uusbildig zum Schriftschteller. Au zahlriichi Schriibwerchstätte und Schriibseminar wie z. B. s Junge Literaturforum Hesse-Thüringe oder d Marburger Summerakademie büüted aagehende Autore interaktivs Training und mängisch Coaching dur etablierti Vertreter vom Bruef aa. Am Düütsche Literaturinschtitut in Leipzig gits sit 1995 en Schtudiegang für Schriftschteller mit Prüefig und Diplom.

Vorsichtig sött mer bi Aagebot wie "In 30 Tagen zum eigenen Buch" sii. Geld verdiened debii zerscht emal di Schuele, wo settigi "Kürs" aabüüted.

Für aagehendi Schriftschteller eignet sich zum Iischtieg (und au im wiitere Werdegang) d Nutzig vonere Autoreplattform. S Publiziere im Internet ermöglicht en erschte Kontakt zu Leser und über Feedback- bzw. Diskussionsfore chönnd mit Gliichgsinnte und Interessierte handwerchlichi Grundkenntnis erlangt und uusbaut werde.