Dr Schilthoof
| Dialäkt: Baseldütsch |
Dr Schilthoof isch e historischs Geböid in dr Schwizer Stadt Baasel. Er befindet sich in dr Groossbaasler Altstadt am Egge vom Stäinebärg und dr Freije Strooss am Banggeblatz. Er stoot under Dänggmolschutz und isch äins vo de Kulturgüeter im Kanton Basel-Stadt, wo für d Region vo Bedütig si.
Gschicht
[ändere | Quälltäxt bearbeite]Dr Rudolf Forcart-Hoffmann (1800-1860), e Baasler Siidebandfabrikant, het sich in de 1830er Joor oobe an dr Freije Strooss, wo s Innere Äschedoor gsi isch, e Woonhuus welle baue. S Door aber het en gstört und dorum het er im August 1839 im Chläine Root en Aadraag gstellt, ass mä das alte Door wurd abbräche. Dr Blatz wurd schööner eso, het er gsäit, und d Iifaart in die Freiji Strooss bräiter, so dass dr vili Verkeer zum Määrtblatz und zur Schiffländi besser duurekiem. Scho im Juli 1840 het mä s Door afo abrisse und braggtischerwiis s Baumaterial grad könne bruuche zum im Forcart si Huus und s nöije Kaufhuus am Barfi z baue.[1]
Dr Archideggt vom Schilthoof im klassizistische Stiil isch dr Johann Jakob Stehlin gsi, und im Stehlin si Soon, dr Johann Jakob Stehlin dr Jünger, wo drissg Joor spööter 1872 wisawii am Stäinebärg die neobarocki Kunsthalle blaant het, isch au drbii gsi. 1842 isch s Woonhuus fertig worde. Em Huusegge am Stroossenegge vo dr Freije Strooss und em Stäinebärg het dr Stehlin d Form von ere Rotunde gee mit korinthische Halbsüüle, was für Baasel nöi gsi isch. Woorschinlig het er s Schloss Wilhelmshööchi bi Kassel as Vorbild gnoo. Dr Schilthof isch bis 1864 im Bsitz vo dr Familie bliibe.[2]
In de Joor 1899 und 1900 isch s Geböid dur e Fritz Stehlin umbaut worde. S Huus isch e Gschäftshuus worde. Es isch e Zit dr Hauptsitz vo dr Baasler Handelsbangg gsi und bis 1979 isch d Handwärkerbangg Baasel din gsi. D Ostschwizer Bangg, wo 2012 Däil vo dr Bank Wegelin übernoo het und an d Grubbe Raiffeisen Schwiiz verkauft worde isch, het dr Schilthoof umbaut und renowiert[3]
Fuessnoote
[ändere | Quälltäxt bearbeite]- ↑ Aeschenschwibbogen uf basler-bauten.ch
- ↑ Thomas Schibler: Forcart, Johann Rudolf. In: Historisches Lexikon vo dr Schwiiz.
- ↑ Jahresbericht 2011 uusegee vo dr Kantonale Denkmalpflege Basel-Stadt, 2012, ISBN 978-3-9522166-2-0, ISSN 2235-4514, S. 105
Koordinate: 47° 33′ 14,5″ N, 7° 35′ 30,4″ O; CH1903: 611529 / 267045