OPAC

E Screenshot vo dr Suechmaske vom OPAC vo dr Uniwersidäätsbibliotheegg vo dr Uniwersidäät Wien

En OPAC (Abchürzig vo Online Public Access Catalogue, alemannisch: öffentlig zuegänglige Onläin-Katalog) isch e Bibliotheeggskataloog, wo mä onläin, hüte mäistens über s Internet cha benutze. Sit de 1980er-Joor het er elteri Arte vo Bibliotheeggsskatalöög afo ablööse, hüte het fast jedi Bibliotheegg iire äignig OPAC, wo iire Bestand an Publikazioone verzäichnet und röscherschierbar macht. Bearbäitet wärde OPACs mit Integrierte Bibliotheeggssüsteem. Hüte sin si die maassgääbligi Kataloogart, wo mit Abstand am witiste verbräitet isch.

Jede OPAC het e Daatebangg, wo jedi vorhandeni Publikazioon vo dr Bibliotheegg din as digitals Katalogisat abgspiicheret isch. D Bibliothekar chönne dr OPAC im sogenannte Onläin-Dienstkatalog bearbäite; d Benutzer vo dr Bibliotheegg verwände en anderi Wersion, dr Onläin-Benutzerkatalog. Dä cha mä uf dr Website vo dr Bibliotheegg ufrüefe. Därt het s e Benutzeroberflechi, wo mä über sä d Bestanddäil vo de Katalogisat (Autorenaame, Ditel, Erschiinigsjoor, Schlagwort etc.) cha sueche. Über die richtige Suechbegriff findet mä d Publikazioone, wo mä will.

In Bibliotheegge, wo nonig alli iiri Medie in iire OPAC ufgnoo häi, muess mä für die Beständ immer no die eltere Kataloogarte bruuche. Bim Katalogisiere hänkt mä an d OPAC-Katalogisat immer hüfiger au d Vollteggst vo de Publikazioone.

Gschicht

In de 1980er-Joor häi OPACs d Katalöög, wo denn gängig gsi si, d Zeddelkatalöög, afo verdränge. Am Aafang isch dr Zuegang nume über e lokals Netzwärk mööglig gsi, wo sich s Internet aber am Aafang vo de 1990er Joor verbräitet het, si immer mee Katalöög über über s Internet abrüefbar worde, zerst über e Telnet-Interface oder spezielli Clients und wo sich s WWW vo dr Middi vo de 1990er Joor etabliert het, si d OPACs tüpischerwiis über äigeni, frei zuegängligi Website röscherschierbar, ooni dass mä in d Bibliotheegg muess goo. Metasuechmaschiine wie dr Karlsruejer Wirtuelli Kataloog lön äim gliichzitig in e hufe OPACs sueche, wääred bibliografischi Daatebanke wie WorldCat en OPAC-Oberflechi biete, wo uf e gmäinsami Daatebangg vo vile Bibliotheegge zruggrift.

Litratuur

• Klaus Gantert, Rupert Hacker: Bibliothekarisches Grundwissen. 8. Uflaag. Saur, Münche 2008, S. 202–213.
• Dietmar Strauch, Margarete Rehm: Lexikon Buch, Bibliothek, neue Medien, 2. Uflaag, Saur, Münche 2007, ISBN 978-3598117572, S. 326

Fuessnoote

Dä Artikel basiert uff ere fräie Übersetzig vum Artikel „OPAC“ vu de dütsche Wikipedia. E Liste vu de Autore un Versione isch do z finde.