Marià Fortuny

Dr Marià Fortuny, äigentlig Marià Josep Maria Bernat Fortuny i Carbó, au Marià Josep Maria Bernat Fortuny i Marsal, (* 11. Juni 1838 z Reus in Katalonie; † 21. Novämber 1874 z Rom, isch e schbanische Mooler, Graphiker und Zäichner und Radierer gsi.

Lääbe und Wärk

Dr Fortuny het uf dr Akademii z Barcelona studiert under em Claudio Lorenzález, eme Schüeler vom Friedrich Overbeck. E baar Lithographie vom Paul Gavarni häi en inspiriert. In ere Schuelkonkurränz het er gwunne und as Briis e Räisestipendium uf Rom überchoo, won er 1856 aachoo isch.

Er isch im Marokkofäldzug 1859–1860 gsi under em Generaal Juan Prim. Bevor er uf Rom zrugg isch, isch er uf Bariis, won er zum Jean-Louis-Ernest Meissonier gangen isch und dr Jean-Léon Gérôme kennegleert het. Denn isch er au uf Madrid, won er vor allem dr Goya studiert het. 1866 isch dr Fortuny wider z Rom gsi. Er het für e Bariiser Kunsthändler Goupil e baar Bilder gmacht, wo 1869 uf ere Usstellig Beachdig gfunde häi.

D Gmäld Hochzit in dr Vicaria z Madrid und Dr marokkanisch Schlangebändiger si bsundrigs bekannt. Zu sine letzte Wärk ghööre D Arkadier und d Akademiker. Dr Fortuny het au Historie gmoolt, drunder e groossformatigi Allegorii für d Chille vom häilige Augustin z Barcelona und e Deckimoolerei für e Balast vo dr Köönigin Maria Christina. Er het non e baar Räise uf Schbanie gmacht, aber sust het er z Rom gläbt, won er am 21. Oktober 1874 gstorbe isch. Er het e Hufe Studie, Skizze und Gmäld, wi nid fertig worde si, hinderloo, drunder D Schlacht bi Tanger. E baar vo sine Wärk us dr Sammlig vo sim Soon Mariano cha mä hüte im Palazzo Fortuny z Venedig gsee.

Bortret

1874: Bronssemedallie, 76 mm, Medäjöör: Jacinto Moratò. Vordersite: MARIANO «» FORTVNY Büste mit Chläideraasatz und Chruuselhoor halbrächts, unde signiert: J. MORATÒ. R. Ruggsite: 11 Zile Text

En Uswaal vo Wärk

Bsuechsdaag im Pfarrhuus, 1870, Öl a. Holz, 55×92 cm. Barcelona, Museo de Arte Moderno.
Bsuechsdaag im Pfarrhuus (Usschnittvergröösserig), 1870, 1870, Ööl uf Holz, 55×92 cm. Barcelona, Museo de Arte Moderno.
Dr Chupferstichsammler, 1866, 1870, Ööl uf Holz, 50×66 cm. Barcelona, Museo de Arte Moderno.
D Schlacht vo Tetuan, 1862-72, 1870, Ööl uf Liinwand, 325×1075 cm. Barcelona, Museo de Arte Moderno.
D Söön vom Mooler, 1874, 1870, Ööl uf Liinwand, 44×93 cm. Madrid, Museo del Prado.
Odaliske, 1861, 1870, Ööl uf Karton, 54×79 cm. Barcelona, Museo de Arte Moderno.
Fantasii über s Faustdrama, 1866, 1870, Ööl uf Liinwand, 40×69 cm. Madrid, Museo del Prado.

Liddratuur

Carlos González López, Monserrat Martí Ayxelà: Mariano Fortuny Marsal, Barcelona 1989, ISBN 84-86719-25-9.
Rosa Vives i Piqué, Maria Luisa Cuenca Garcia: Mariano Fortuny Marsal, Mariano Fortuny Madrazo: grabados y dibujos, Madrid 1994, ISBN 84-8156073-1
Mercè Doñate, Cristina Mendoza, Francesc M. Quílez i Corella: Fortuny, Barcelona 2003, ISBN 84-8043-112-1

Weblingg

Commons: Marià Fortuny – Sammlig vo Multimediadateie

Dä Artikel basiert uff ere fräie Übersetzig vum Artikel „Marià_Fortuny“ vu de dütsche Wikipedia. E Liste vu de Autore un Versione isch do z finde.