Landhof

47.5623055555567.6026361111111Koordinate: 47° 33′ 44,3″ N, 7° 36′ 9,5″ O; CH1903: 612344 / 267968

Dr Landhoof isch e Sportstadion im Wettstäi-Kwardier z Baasel. Es isch s erste Häimstadion vom FC Baasel gsi. S erste Fuessball-Länderspiil zwüsche dr Schwizer und dr Dütsche Nazionaalmannschaft het dört am 5. April 1908 stattgfunde. Für die dütschi Mannschaft isch das s erste Länderspiil gsi, für d Schwizer s dritte. D Schwiz het s Spiil mit 5:3 gwunne.^[1]

Nutzig

Dr Landhoof lit im Chläibaasel und um en ume si Woonblöck. S Areaal bestoot us em Fuessballfäld, dr Dribüüne und eme Grüenfäld.

Es isch s Häimstadion vom FC Baasel gsi bis er gege s Änd vo de 1960er Joor vom Landhoof wägzüüglet isch. Sit em Aafang vo de 2000er macht d «ooink ooink Productions», dr Jugendförderveräin vom Obere Chläibaasel uf em Landhoof iiri offeni Chinder- und Jugendarbet mit bietet e Hufe verschidnigi Freizitbeschäfdigunge aa.^[2] Dr Sportblatz isch zentraal glääge und cha so d Chinder und die Jugendlige im Kwardier erräiche.^[3] S Areaal wird au vo berschiidene Sportgrubbe brucht.

Blään für d Zuekumft

2003 het s e stedtebaulige Ideäwettbewärb für e Siidligs- und Freiruumkonzept für s Landhoof-Areaal gee. Intressierti Iiwooner vom Kwardier häi mitghulfe e Konsensbabbiir mit Ideä und Wünsch für s Areal uszarbäite. S Brojekt het vorgsee ass mä s Areal zum Däil wurd bruuche zum vier Geböid und öbbe 120 Woonige z baue. Es het aber Widerstand gee und die Grüeni Partei, dr «Veräin zur Erhaltig vom Landhoofareaal», und Lüt vor Allem us em Chläibaasel häi e Komitee ufgstellt, wo au dr WWF Region Basel din verdräte gsi isch. E Volksiniziative isch lansiert worde, wo het welle ass s Gebiet Däil vo dr Grüenzoone wurd, zum eso verhindere ass druf chönnt baut wärde.

D Regierig und s Kantonsparlamänt häi e Gegevorschlag gmacht, wo uf äins vo de vier Geböid verzichtet und achzig gnosseschaftligi Woonige blaant het. D Iniziative isch aber nit zruggzooge worde, wil d Iniziante die ganzi Flechi häi welle offe loo as Grüenflechi im e Stadtdäil wo sowiso scho dicht bebaut isch. So häi empfoole ass mä dr Riechestrooss nooch wurd baue.

D Abstimmig

Im Merz 2010 isch s zur Abstimmig über d Zuekumft vom Landhoof choo. Vor allem die Lingge si für d Iniziative gsi, wääred die bürgerlige Parteije für s Baue gsi si. D Volksiniziative «Der Landhof bleibt grün» isch aagnoo worde: für d Iniziative JA: 29'596 (60,28 %) - NEIN: 19'498 (39,72 %), für e Gegevorschlaag für d Däilüberbauig: JA: 24'829 (51,70 %) - NEIN: 23'194 (48,30 %). Erst bi dr Stichfroog het d Iniziative d Abstimmig gwunne mit 25'810 Stimme (52,58 %), dr Gegevorschlaag het 23'281 (47,42 %) überchoo.

Fuessnoote

↑ Seite des Deutschen Fußballbundes über das Länderspiel 1908 im Landhof Archivlink (Memento vom 22. Oktober 2012 im Internet Archive); Abruf 22. Februar 2010.
↑ Offizielli Internetpräsenz vo dr «ooink ooink Productions»; Abruef 18. Februar 2010.
↑ Offizielli Internetpräsenz vom Landhoof; Abruef: 18. Februar 2010.

Weblingg

Historisches

Verhagelte Premiere auf dem Landhof, DFB-Site über s erste Länderspiil vo dr dütsche Nazionalmannschaft
Foto vom Landhoof-Stadion, entstande wääred em Länderspiil Schwiz-Dütschland 1908

Gegenwärtige Offene Kinder- und Jugendarbeit Landhof

Netzufdritt vo dr «ooink ooink Productions», Jugendförderverein Oberes Kleinbasel

Abstimmung zur Zukunft

Dä Artikel basiert uff ere fräie Übersetzig vum Artikel „Landhof“ vu de dütsche Wikipedia. E Liste vu de Autore un Versione isch do z finde.

[1] Seite des Deutschen Fußballbundes über das Länderspiel 1908 im Landhof Archivlink (Memento vom 22. Oktober 2012 im Internet Archive); Abruf 22. Februar 2010.

[2] Offizielli Internetpräsenz vo dr «ooink ooink Productions»; Abruef 18. Februar 2010.

[3] Offizielli Internetpräsenz vom Landhoof; Abruef: 18. Februar 2010.

[1]

[2]

[3]