Hermann VI. vu Bade

Dialäkt: Undermarkgreflerisch

Sigel vum Hermann VI.

Dr Markgrof Hermann VI. vu Bade (* um 1225; † 4. Oktober 1250) isch vu 1243 bis 1250 regierede Markgrof vu Verona un Bade gsi. No dr Hochzyt mit dr Gertrud vu Babenberg isch er churzi Zyt au no Herzog vu Eschtryych un dr Steiermark gsi.

Dr Hermann VI. isch dr Suhn gsi vum Hermann V. vu Bade un dr Pfalzgrefi Irmengard bi Ryy. D Sihn Hermann VI. un Rudolf I. hän s Erb vum Vater zerscht mitenand ibernuu. Wu dr Hermann VI. 1247 ins eschtryychisch Herzogegschlächt yyghyrote gha het, isch er dert ane zoge un het em Rudolf I. d elainig Herrschaft iber d Markgrofschaft Bade iberloo.

Dr Papscht Innozenz IV. het am 14. Septämber 1248 em Markgrof Hermann VI. d Schänkig vum Herzogtum Eschtryych dur syy Frau Gertrud vu Babenberg bstetigt. E baar Monet speter, am 31. Jänner 1249, het dr Papscht dr Gegechenig Wilhelm vu Holland ufgforderet, em Markgrof Hermann VI. s Herzogtum Österreich as Läche z gee.

Dr Markgrof Hermann VI. isch bim Adel un au im eigene Land nit bsundersch beliebt gsi. Wäge däm het syy Witfrau versuecht, dur e Schänkig dr Schade am Stift Alteburg bim nidereschtryychische Horn wider guet z mache.

Dr Hermann VI. het um 1248 d Gertrud vu Babenberg (* 1226; † 24. April 1299), d Witfrau vum Markgrof Wladislaw vu Mähre, ghyrote, dur Vermittlig vum Herzog Otto vu Bayern. Us dr Eh sin die Chinder fiirigange:

• Friedrich, (* 1249 z Alland; † 29. Oktober 1268 z Neapel gchepft); regierede Markgrof vu Bade un Verona
• Agnes, (* 1250; † 2. Januar 1295 z Wien)

1. ∞ 1263/65 Herzog Ulrich III. vu Kärnte
2. ∞ 1270/71 Ulrich III. vu Heunburg († 1308)

Weblink

• genealogie-mittelalter.de

Vorgänger	Amt	Nochfolger
Hermann V.	Markgrof vu Bade Markgrof vu Verona 1243–1250	Friedrich I.

Dä Artikel basiert uff ere fräie Übersetzig vu dere Version vum Artikel „Hermann_VI._von_Baden“ vu de dütsche Wikipedia. E Liste vu de Autore un Versione isch do z finde.