Buzz Aldrin

Lo colonèl Edwin Eugene Aldrin, Jr. escaissat Buzz Aldrin, (nascut lo 20 de genièr de 1930) es un pilòt d'ensag, astronauta estatsunidenc e lo segond èsser uman que pausèt lo pè e caminèt sus la Luna (aprèp Neil Armstrong) pendent la mission Apollo 11.

Edwin Eugene (Buzz) Aldrin, Jr.

Biografia

Jovença

Edwin Aldrin nasquèt a Montclair, Nòva Jersei, EUA. Foguèt diplomat de l'Escòla Superiora de Montclair e capitèt a la tresena plaça de promocion de l'Acadèmia Militara de West Point, Nòva York. Aldrin foguèt promogut lòctenent segond e serviguèt coma pilòt de caça a las Fòrças Aerianas estatsunidencas pendent la Guèrra de Corèa, que volèt dins 66 missions de combat amb un F-86 Sabre. Aprèp que daissèt Corèa, Aldrin foguèt instructor d'artilhariá aeriana a la basa Nellis, e assistent del degan de facultat a l'Acadèmia de las Fòrças Aerianas dels Estats Units. Aprèp aquel destin, Aldrin volèt amb F-100 Super Sabres coma comandant de vòl a Bitburg, Alemanha.

Carrièra militara

Aldrin daissèt lo servici militar per estudiar a l'Institut de Tecnologia de Massachusetts (Massachusetts Institute of Technology, MIT) a Cambridge, Massachusetts ont obtenguèt un doctorat en astronautica. Sa tèsi de doctoral foguèt "orientacion per l'apròcha orbitala abitada". Aprèp lo MIT, tornèt a las fòrças aerianas, foguèt enviat al burèu d'objectius Gemini de la division del sistèmas espacials de las fòrças aerianas, a Los Angeles, Califòrnia, e aprèp a l'escòla dels pilòts d'ensag de las fòrças aerianas a la basa Edwards, Califòrnia. En març de 1972, Aldrin se retirèt del servici actiu aprèp 21 ans.

Camina lunar pendent la mission Apollo 11

Carrièra d'astronauta

Aldrin foguèt seleccionat dins lo tresen grop d'astronautas de la NASA en octobre de 1963. Foguèt fòrça implicat dins lo dessenh de las missions Gemini, mas jamai foguèt pas sus la lista dels equipatges. La mòrt de l'equipatge principal de Gemini 9 promoguèt Aldrin coma equipatge de remplaçament. La principala mission de Gemini 9 foguèt l'apròcha e acoblament de la capsula amb un veïcul objectiu, mas al fracàs d'aquel darrièr Aldrin improvisèt una manòbra eficaça per s'aprochar a de coordenadas determinadas de l'orbita terrèstra. Alara foguèt confirmat coma pilòt de Gemini 12, darrièra mission Gemini e darrièra possibilitat de testar las activitats extraveïcularas o EVA. Aldrin utilizèt de tecnicas revolucionàrias pendent los exercicis d'entraïnament per la mission. Aquelas, encara son utilizadas actualament.

Aldrin aviá fòrça mai exposicion publica que Neil Armstrong, e deviá èsser lo que originalament deviá davalar lo primièr sus la superfícia de la Luna. Aldrin tanben es conegut pel son costat místic, essent francmaçon, e recebèt la comunion per la superfícia lunara.

Retirada

Aprèp que daissèt lo servici actiu, Aldrin tornèt a las fòrças aerianas dins un pòst administratiu, mas patiguèt de problèmas personals. Dins son autobiografia "Retorn sus Tèrra", Aldrin relata sos problèmas amb l'alcoolisme e la depression aprèp aver daissat la NASA. Aldrin contunhèt a promòure l'exploracion espaciala e produguèt alara un jòc d'ordinador "Buzz Aldrin's Race into Space" en 1992.

Ligams

• (en)Pagina oficiala