Walentina Teresjkowa

Walentina Wladimirowna Teresjkowa (Russies: Валенти́на Влади́мировна Терешко́ва; gebore 6 Maart 1937) is 'n lid van die Russiese Doema, ingenieur en voormalige ruimtevaarder. Sy is die eerste en jongste vrou wat in die ruimte gevlieg het (op 16 Junie 1963) tydens 'n solosending van Wostok 6. Sy het 48 keer om die Aarde gewentel, byna drie dae in die ruimte deurgebring en bly die enigste vrou wat op 'n soloruimtesending was.

Walentina Teresjkowa in 1963

Voor haar aanvaarding vir die Sowjet-ruimteprogram was Teresjkowa 'n tekstielfabriekswerker en amateurvalskermspringer. Sy het by die lugmag aangesluit as deel van die "Ruimtevaarderkorps" en is as 'n offisier aangestel nadat sy haar opleiding voltooi het. Ná die ontbinding van die eerste groep vroulike ruimtevaarders in 1969, het Teresjkowa as 'n ruimtevaarder-instrukteur aangebly in die ruimteprogram. Sy het later aan die Zjoekofski-lumagingenieursakademie gegradueer en weer vir ruimtevlugte gekwalifiseer, maar is nooit weer ruimte toe nie. Sy het in 1997 uit die lugmag getree nadat sy die rang van generaal-majoor beklee het.