深屈

深屈形勢

灣南屋宇

渡頭見港珠澳大橋

深屈，香港一地，亦係一村，喺大嶼山西北，來住沙螺灣過䃟石灣到大澳山徑中途。佢對出有深屈灣，灣形入得好深，灣口向北。後面南方谷地，亦相當深，當中一支去到昂坪。深谷之故，涌水甚多，集成一支，北流入灣。人煙稀少，有條深屈道通到車。行政上歸離島區。

舊時村人捉魚種米，現今養蠔種菜種生菓為業。

地理

深屈人煙，按形勢分為三笪，灣南、灣東、灣西。

灣南為深谷出口，涌流入灣，又有深屈道行車，道尾有渡頭。涌口澤地淺灘，有紅樹林。沿涌流而上，就開做田地。屋宇大多排喺岸東，近來住山徑。深屈道入自西南面，北走，近岸同往來山徑匯合重疊，東屈，以橋渡涌，再沿岸西北，到渡頭而止，同屋宇睇齊。

灣東細谷，亦有涌水。近岸有地名南田。屋宇散佈谷內，當中有名得李鳳園。溯谷而上，有勝覺下苑，來往山徑側邊。

灣西叫茜草灣，又一細谷，田地為主，屋宇甚少，皆喺谷北。岸邊有紅樹林。來往山徑過佢南面，有分叉沿岸入茜草灣。相傳大明同西洋水戰喺茜草灣。按西洋即葡萄牙。

望向灣口，可見港珠澳大橋。

行政

離島區區議會，大嶼山大多數村，都歸入大嶼山選區，深屈都唔例外，同大澳、梅窩、貝澳、大蠔、長沙等等一齊。

生意

有幾間士多，亦兼做茶水檔。

交通

要車去深屈，只得搭大嶼山的士，無巴士行。有渡頭，但無渡輪。要去一係私家車私家艇，一係行路，或者踩單車。

行路嘅話，可以由大澳行過去，或者沙螺灣行過去，行山人稱為東澳古道，東涌來往大澳咁解。又或由深屈道行落山。