Tâi-oân Tiān-le̍k Kong-si

Tâi-tiān Tōa-lâu

Tâi-oân Tiān-le̍k Kó͘-hūn Iú-hān Kong-si (台灣電力股份有限公司), kán-chheng Tâi-tiān (台電), sī Tâi-oân kui-bô͘ siāng tōa ê tiān-le̍k kong-si. Tâi-tiān ê chiân-sin sī Ji̍t-pún sî-tāi ê Tâi-oân Tiān-le̍k Tu-sek Hōe-siā. Bo̍k-chiân sī Tiong-hôa Bîn-kok Keng-chè-pō͘ ê kok-êng sū-gia̍p ki-koan, mā sī Tâi-oân tiān-le̍k lêng-goân chèng-chhek ê chip-hêng tan-ūi, hū-chek Tâi-Phêⁿ-Kim-Má ê tiān-le̍k kiong-èng. Chia̍t-chì 2017 nî, Tâi-tiān sī choân Tâi-oân si̍t-siu chu-pún-gia̍h siāng tōa ê kong-si. Tī 1995 nî Tiong-hôa Bîn-kok Chèng-hú si̍t-si "tiān-le̍k chū-iû-hòa" chìn-chêng, Tâi-tiān hū-chek só͘-ū ê hoat-tiān, sàng-tiān, kap phòe-tiān; khai-hòng bîn-kan heng-kiàn hoat-tiān-chhiúⁿ liáu-āu, bîn-kan hoat-tiān-chhiúⁿ só͘ hoat chhut ê tiān-le̍k lóng hō͘ Tâi-tiān bé--khí-lâi.

Kàu 2016 nî ûi-chí, Tâi-tiān chóng-kiōng ū 11 chō chúi-le̍k hoat-tiān-chhiúⁿ, 11 chō hóe-le̍k hoat-tiān-chhiúⁿ, kap 3 chō êng-ūn-tiong ê he̍k-lêng hoat-tiān-chhiúⁿ. Hoat-tiān chong-tì chóng iông-liōng ū 4213.25-bān chheng-óa, hoat-tiān liōng 2257.92-ek tō͘. Kî-tiong, hóe-le̍k hoat-tiān chiàm 79.9% (pau-hâm jiân-môe 36.9%, jiân-iû 4.4%, jiân-khì 36%, khì-tiān kiōng-seng 2.6%), chài-seng lêng-goân chiàm 5.1%, chúi-le̍k 1.5%, he̍k-lêng 13.5%.