დვარ(ა)კა (გუჯ. દ્વારકા, ჰინ. द्वारका, ინგლ. Dwarka, Dvarka, Dwaraka, Dvaraka) — ნოღა დო მუნიციპალური წჷმნაქიმინა ჯამნაგარიშ ოლქის, ინდოეთიშ შტატი გუჯარათის. ნოღა არაბეთიშ ზუღაშ წყარპიჯის იდვალუაფუ, ნოღაშ ბჟადალშე - ქათჰიავარიშ ჩქონი. სანსკრიტულ ლიტერატურას თაშნეშე მოჸონაფილი რე შხვა ჯოხოდვალა — დვარავატი. დვარკა ინდოეთიშ ართ-ართი არძაშე ჯვეში დო შკვითშე ართ-ართი ინდუიზმიშ ჯეგე ნოღა რე. ნოღას იდვალუაფუ კრიშნაშ არძაშე ჩინებულ ოხიდეეფშე ართ-ართი — დვარაკადიშაშ ოხიდა. „მაჰაბჰარატაშ“ დო „პურანაშ“ მეჯიანთ, დვარკა ჯვეში კრიშნაშ ომაფეშ ნანანოღა რდჷ.
