نامور اداکار سلطان راہی کی29 ویں برسی منائی گئی

لاہور (اُردو پوائنٹ اخبارتازہ ترین - اے پی پی۔ 09 جنوری2025ء) پنجابی فلموں کے معروف لیجنڈری اداکار سلطان راہی کی29 ویں برسی 9جنوری (جمعرات )کو منائی گئی۔ سلطان راہی 24 جون 1938ء کو سہارن پور( بھارت) کے مسلم آرائیں خاندان میں پیدا ہو ئے ۔ انہوں نے 1959ء میں اکیس سال کی عمر میں اپنے فنی کیریئر کا آ غاز کیا اور فلم باغی میں بطور گیسٹ ایکٹر کام کیا ، بطور پروڈیوسر اور سکرین رائٹر بھی خدمات سر انجام دیں ۔

سلطان راہی نے 700 سے زائد پنجابی اور اردو فلموں میں کام کیا جو فلم انڈسٹری میں ورلڈ ریکارڈ ہے، انہیں 150 سے زائد فلمی ایوارڈز سے بھی نوازا گیا۔ سلطان راہی اور مصطفٰی قریشی کی جوڑی پاکستان فلم انڈسٹری کی مقبول ترین جوڑی بنی، ان کی فلم مولا جٹ نے باکس آفس پر کامیابی کے ریکارڈ قائم کئے، سلطان راہی پہلے پاکستانی فنکار ہیں جن کا نام گینز بک آف ورلڈ ریکارڈ میں موجود ہے، انہیں یہ اعزاز بھی حاصل ہے کہ 12اگست 1981 کو ان کی پانچ فلمیں شیر خان، ظلم دا بدلہ، اتھرا پتر، چن وریام اور سالا صاحب ایک ہی روز ریلیز ہوئی تھیں ،یہ فلمیں عوام میں بے حد مقبول ہوئیں۔

(جاری ہے)

سلطان راہی کی مقبول ترین فلمی ہیروئنز میں آسیہ، انجمن، صائمہ، گوری، نیلی اور بابرہ شریف قابل ذکر ہیں۔ انہیں9 جنوری 1996 کو گوجرانوالا کے قریب نامعلوم ڈاکوئوں نے فائرنگ کرکے قتل کر دیا تھا، ان کی المناک موت کے بعد پاکستانی فلم انڈسٹری بحران کا شکار ہوگئی۔