امدادی سرگرمیوں کے لیے شام سے پابندیاں ہٹانا ضروری، ٹام فلیچر

اسلام آباد (اُردو پوائنٹ ۔ UN اردو۔ 09 جنوری 2025ء) اقوام متحدہ کے اعلیٰ حکام نے سلامتی کونسل کو بتایا ہے کہ شام میں طویل خانہ جنگی کا سامنا کرنے والے لوگوں کے لیے امدادی وسائل کی فراہمی یقینی بنانے اور ملک کے طول و عرض میں انسانی امداد پہنچانے کی راہ میں رکاوٹیں دور کرنے کی ضرورت ہے۔

رواں سال شام کے مسئلے پر سلامتی کونسل کے پہلے اجلاس میں امدادی امور کے لیے اقوام متحدہ کے رابطہ کار ٹام فلیچر نے سفیروں کو بریفنگ دیتے ہوئے کہا ہے کہ ملک میں شہریوں کو بین الاقوامی قانون کے مطابق تحفط ملنا چاہیے۔

پابندیاں ہٹانے کی ضرورت

انہوں نے کہا کہ شام میں امدادی کارروائیوں کے لیے اس پر عائد پابندیاں ہٹانا ہوں گی اور اقوام متحدہ کو اس موقع سے فائدہ اٹھانا چاہیے۔

(جاری ہے)

اس وقت ملک میں امدادی اداروں اور کارکنوں کو بہت سے مسائل درپیش ہیں۔

ٹام فلیچر نے یہ بھی بتایا کہ شام میں عبوری انتظامیہ نے بین الاقوامی انسانی قانون کے احترام، شہریوں کو تحفظ دینے اور امدادی اداروں کو آزادانہ طور سے کام کی اجازت دینے کا وعدہ کیا ہے اور ان یقین دہانیوں کو عالمی برادری کا تعاون درکار ہے۔

UN Photo/Loey Felipe

امدادی امور کے لیے اقوام متحدہ کے رابطہ کار ٹام فلیچر سلامتی کونسل کے ارکان کو شام میں انسانی امدادی ضروریات بارے آگاہ کر رہے ہیں۔

امدادی وسائل کی اپیل

رابطہ کار نے بتایا کہ ملک میں 620,000 سے زیادہ لوگ تاحال بے گھر ہیں جنہیں شدید سردی کے موسم میں سخت مشکلات کا سامنا ہے۔ عام شہریوں کو تحفظ اور مالی مدد کی فراہمی ترجیح ہونی چاہیے۔ اس وقت شام کے لیے طلب کردہ امدادی وسائل میں سے صرف ایک تہائی مہیا ہو پائے ہیں جن میں مزید اضافے کی ضرورت ہے۔

شام کے حکام کو خواتین اور لڑکیوں کی پسماندگی کا خاتمہ یقینی بنانا ہو گا۔

مواقع اور خطرات

شام کے لیے اقوام متحدہ کے خصوصی نمائندے جیئر پیڈرسن نے ویڈیو لنک کے ذریعے کونسل بریفنگ دیتے ہوئے کہا کہ سابق صدر بشارالاسد کی حکومت کا خاتمہ ہونے کے بعد شام اپنے اختیار کردہ راستے پر بڑھ رہا ہے جہاں اسے بیک وقت بہت سے مواقع اور خطرات کا سامنا ہے۔

انہوں نے ملک میں اسرائیلی فوج کی موجودگی اور اس کی سرگرمیوں پر گہری تشویش ظاہر کی اور کہا کہ دہشت گرد تنظیم داعش کی موجودگی بھی ملکی امن و اسحکام کے لیے خطرہ ہے۔

خصوصی نمائندے کا کہنا تھا کہ شام کے لوگوں کی ضروریات ہنگامی نوعیت کی ہیں جبکہ سیاسی تبدیلی کے عمل کی سمت کے حوالے سے غیریقینی کیفیت بھی پائی جاتی ہے۔ انہوں نے یقین دلایا کہ اقوام متحدہ قابل اعتبار اور مشمولہ انداز میں ملک کی قائمقام انتظامیہ کے ساتھ کام کرنے کے لیے تیار ہے۔