پاکستانی پاسپورٹ دنیا کا 5واں کمزور ترین پاسپورٹ قرار

لاہور ( اردوپوائنٹ اخبار تازہ ترین ۔ 08 جنوری 2025ء )پاکستانی پاسپورٹ دنیا کا 5واں کمزور ترین پاسپورٹ قرار، 2025 کے آغاز پر دنیا کے مضبوط اور کمزور ترین پاسپورٹس کی فہرست جاری، صومالیہ کا پاسپورٹ بھی پاکستان سے بہتر قرار دے دیا گیا۔ تفصیلات کے مطابق 2025 کی پہلی ششماہی کے لیے دنیا بھر کے طاقتور ترین پاسپورٹس کی فہرست جاری کی گئی ہے۔ اس فہرست میں کمزور ترین پاسپورٹس والے ممالک کا بھی ذکر ہے۔

پاکستان کو ایک مرتبہ پھر کمزور ترین پاسپورٹس والے ممالک کی رینکنگ میں شامل کیا گیا ہے۔ ہینلے اینڈ پارٹنرز کی جانب سے جاری کردہ پاسپورٹ رینکنگ میں ایشیائی ملک پہلی پوزیشن حاصل کرنے میں کامیاب رہا۔ تازہ ترین پاسپورٹ رینکنگ میں ایشیائی ملک سنگاپور کا پاسپورٹ دنیا کا طاقتور ترین پاسپورٹ قرار دیا گیا۔

(جاری ہے)

سنگاپور کے پاسپورٹ کو دنیا کا طاقتور ترین پاسپورٹ قرار دینے کی وجہ یہ ہے کہ سنگاپور کے پاسپورٹ رکھنے والے افراد 195 ممالک میں ویزا کے بغیر سفر کرسکتے ہیں۔

دنیا کا دوسرا طاقتور ترین پاسپورٹ جاپان کا قرار دیا گیا ہے، جاپانی پاسپورٹس رکھنے والے افراد 193 ممالک میں ویزا فری سفر کرسکتے ہیں۔ جنوبی کوریا، فرانس، جرمنی، اٹلی، اسپین اور فن لینڈ کے پاسپورٹس مشترکہ طور پر تیسرے نمبر پر موجود ہیں۔ ان ممالک کا پاسپورٹ رکھنے والے افراد کو 192 ممالک میں ویزا فری رسائی حاصل ہوجاتی ہے۔ آسٹریا، ڈنمارک، آئرلینڈ، لکسمبرگ، ناروے، سویڈن اور نیدرلینڈز کے پاسپورٹ رکھنے والے افراد 191 ممالک میں ویزا فری انٹری حاصل کر سکتے ہیں، اس لیے یہ پاسپورٹ رینکنگ میں چوتھے نمبر پر رہے۔

بیلجیئم، پرتگال، نیوزی لینڈ، سوئٹزر لینڈ اور برطانیہ پاسپورٹس کو رینکنگ میں 5 واں نمبر دیا گیا ہے، ان ممالک کے پاسپورٹ پر 190 ممالک میں ویزا فری رسائی مل سکتی ہے۔ 189 ممالک میں ویزا فری داخلے کے ساتھ آسٹریلیا اور یونان کے پاسپورٹس مشترکہ طور پر 5 ویں نمبر پر رہے۔ کینیڈا، مالٹا اور پولینڈ کے پاسپورٹس 7 ویں نمبر پر رہے اور ان کے حامل افراد 188 ممالک میں ویزا فری سفر سے مستفید ہوسکتے ہیں۔

ہینلے اینڈ پارٹنرز کی پاسپورٹ رینکنگ میں کمزور ترین پاسپورٹ والے ممالک کی فہرست بھی جاری کی گئی ہے۔ پاکستان کا پاسپورٹ بھی کمزور ترین پاسپورٹ والے ممالک کی فہرست میں شامل ہے۔ پاکستان کمزور ترین پاسپورٹ رکھنے والا 5 واں ملک قرار پایا۔ پاسپورٹ رینکنگ میں پاکستانی پاسپورٹ کے کو 103 نمبر دیا گیا ہے، پاکستانی پاسپورٹ پر 33 ممالک میں ویزا فری داخلہ ممکن ہے۔

یمن کا پاسپورٹ پاکستان کے ساتھ مشترکہ طور پر 103 نمبر پر موجود ہے جبکہ ان سے نیچے عراق (104)، شام (105) اور افغانستان (106) رہے۔ جبکہ افریقہ ملک صومالیہ کا پاسپورٹ پاکستان سے بہتر قرار دے دیا گیا۔ پاکستان سے اوپر صومالیہ کا پاسپورٹ 102 نمبر پر رہا جبکہ نیپال 101، فلسطین، نیپال اور بنگلادیش کے پاسپورٹس مشترکہ طور پر 100 ویں نمبر پر رہے۔