متحدہ عرب امارات کے صدر کا دورہ پاکستان باہمی تجارتی و معاشی تعلقات کے لیے اہم سنگ میل ثابت ہوگا: لاہورچیمبر

لاہور (اُردو پوائنٹ اخبارتازہ ترین - آن لائن۔ 06 جنوری2025ء) لاہور چیمبر آف کامرس اینڈ انڈسٹری کے صدرمیاں ابوذر شاد، سینئر نائب صدر انجینئر خالد عثمان اور نائب صدر شاہد نذیر چودھری نے متحدہ عرب امارات کے صدر شیخ محمد بن زاید النہیان کے دورہ پاکستان کو پاکستان اور متحدہ عرب امارات کے تجارت و معاشی تعلقات کے لیے ایک اہم سنگ میل قرار دیا ہے۔

لاہور چیمبر کے عہدیداروں نے کہا کہ یہ دورہ دوطرفہ تعلقات کو مضبوط بنانے، تجارت کو فروغ دینے اور سرمایہ کاری بڑھانے کی جانب ایک غیرمعمولی قدم ہے۔انہوں نے کہا کہ متحدہ عرب امارات پاکستان کے اہم ترین تجارتی اور سرمایہ کاری شراکت داروں میں سے ایک ہے۔ دونوں ممالک کے درمیان دوطرفہ تجارت تسلی بخش اور مزید اضافہ کی طرف گامزن ہے۔

(جاری ہے)

پاکستان متحدہ عرب امارات کو ٹیکسٹائل، چاول، پھل، سبزیاں اور چمڑے کی مصنوعات برآمد جبکہ پیٹرولیم مصنوعات، مشینری، ایلومینیم اور کیمیکلز درآمد کرتا ہے۔

انہوں نے کہا کہ متحدہ عرب امارات پاکستان میں سرمایہ کاری کرنے والا بڑا ملک ہے، صدر شیخ محمد بن زاید النہیان نے پاکستان کی معیشت کے مختلف شعبوں میں 10 ارب ڈالر کی سرمایہ کاری کا ارادہ ظاہر کیا ہے جو پاکستان کی معیشت مستحکم کرنے میں اہم کردار ادا کرے گا۔ انہوں نے کہا کہ پاکستان کو اس موقع سے بھرپور فائدہ اٹھانا چاہیے کیونکہ دونوں ممالک کے درمیان شراکت داری میں استحکام پاکستان کے توانائی، ٹیکنالوجی اور زراعت جیسے شعبوں میں انقلابی تبدیلیاں لاسکتے ہیں۔

انہوں نے کہا کہ شمسی، ہوائی اور ہائیڈرو پاور منصوبوں میں متحدہ عرب امارات کی سرمایہ کاری حوصلہ افزائی کرنی چاہیے۔ ایگری پروسیسنگ کے مشترکہ منصوبے فوڈ سکیورٹی کو یقینی بنا اور پاکستان کی زرعی برآمدات میں اضافہ کر سکتے ہیں۔ متحدہ عرب امارات کے ذریعے پاکستان کے سیاحتی شعبہ کو بھی فائدہ حاصل ہوسکتا ہے۔ انہوں نے یو اے ای کے سرمایہ کاروں پر زور دیا کہ وہ پاکستان کے خصوصی اقتصادی زونز میں سرمایہ کاری کریں جو یو اے ای کے سرمایہ کاروں کے لیے پاکستان میں مضبوط صنعتی بنیادیں قائم کرنے میں مدد کرے گی۔

لاہور چیمبر کے عہدیداروں نے کہا کہ یو اے ای میں 1.6 ملین سے زائد پاکستانی مقیم ہیں جو دونوں ممالک کے درمیان پل کا کردار ادا کرتے ہیں۔ یو اے ای سے آنے والی ترسیلاتِ زر پاکستان کے زرمبادلہ ذخائر کا ایک اہم حصہ ہیں۔ میاں ابوذر شاد، انجینئر خالد عثمان اور شاہد نذیر چودھری نے مشکل وقت میں متحدہ عرب امارات کی سپورٹ کو بھرپور سراہا ۔ انہوں نے امید ظاہر کی کہ یہ دورہ نئے تجارتی معاہدوں، سرمایہ کاری میں اضافے اور مشترکہ منصوبوں کی بنیاد رکھے گا۔ انہوں نے کہا کہ حکومت کو متحدہ عرب امارات کے صدر شیخ محمد بن زاید النہیان کے دورہ پاکستان کو ثمرآور بنانے کے لیے اقدمات یقینی بنانا ہونگے۔