عمران خان پر کیسز پاکستان کا اندرونی معاملہ ہے، کسی کو مداخلت کی اجازت نہیں دیں گے

اسلام آباد ( اردوپوائنٹ اخبار تازہ ترین۔ آئی پی اے ۔ 19 دسمبر 2024ء ) وزیرمملکت برائے خزانہ رانا احسان افضل نے کہا ہے کہ عمران خان پر کیسز پاکستان کا اندرونی معاملہ ہے، کسی کو مداخلت کی اجازت نہیں دیں گے، اگر کوئی مداخلت کرتا ہے تو بالکل ایبسولوٹلی ناٹ ہونا چاہئے،پی ٹی آئی پہلے کہتی تھی ہم کوئی غلام ہیں؟ اب ان کا مسیحا امریکا، ایڈوائزر اور کانگریس کے لوگ ہے، پی ٹی آئی زیادہ ضد کرے گی تو امریکا کو کہیں گے کہ عافیہ کے بدلے عمران خان کو لے جائیں۔

انہوں نے ہم نیوز کے پروگرام میں گفتگو کرتے ہوئے کہاکہ وزیراعظم بیرون ملک دورے پر ہیں، جب وہ واپس آئیں گے تو مذاکرات کیلئے ان سے بات کریں گے۔ انہوں نے کہاکہ پاکستان اپنے اندرونی معاملات میں مداخلت کی کسی کو اجازت نہیں دے گا، عمران خان کا معاملہ بھی اندرونی معاملہ ہے، اگر کوئی مداخلت کرتا ہے تو بالکل ایبسولوٹلی ناٹ ہونا چاہئے۔

(جاری ہے)

عافیہ صدیقی کو امریکی عدالت نے سزا دی ہوئی ہے ہم نے کتنی بار کہا کہ رہا کروا دیں، پی ٹی آئی پہلے کہتی تھی ہم کوئی غلام ہیں؟ اب ان کا مسیحا امریکا، امریکی ایڈوائزر اور کانگریس ہے،اورکہتے انسانی حقوق کی وجہ لابنگ کررہے ہیں۔

زلمے خلیل زاد ٹویٹ کرتے ہیں امریکا کو کہتے ہیں پاکستان پر پابندیاں لگاؤ پھر ساتھ ہی کہتے ہیں کہ عمران خان کو رہا کر دو، ہم نے جب ان کی پروفائلنگ کی کہ یہ کون سے کانگریس مین ہیں جو پاکستان کی پابندیوں کی حمایت کرتے ہیں کشمیر میں انسانی حقوق کی خلاف ورزیوں پر انڈیا کی حمایت کرتے ہیں۔ اس موقع پر رہنماء پی ٹی آئی مہر بانو قریشی نے کہا کہ عمرا ن خان کی رہائی کیلئے پی ٹی آئی کی امریکا سے کوئی توقعات نہیں ہیں، اس بات کو ن لیگ اچھال رہی ہے کیونکہ ن لیگ خوف کا شکار ہے۔

ان کو خوف اس لئے ہے کہ یہ جانتے ہیں کہ یہ ایک جعلی اور چوری شدہ مینڈیٹ پرحکومت میں بیٹھے ہوئے ہیں، جب بنیادیں ہی کھوکھلی ہوں گی تو خوفزدہ ضرور ہوں گے۔ زلمے خلیل زاد کی ذاتی رائے اسرائیل، پاکستان یا عمران خان سے متعلق کچھ بھی ہو، ان تینوں کو جوڑنا امیچورٹی ہے۔جہاں بھی جو بھی ہمارے فائدے میں بات کرے گا ہم اس کو ضرور اجاگر کریں گے، مگر ن لیگ اپنی خارجہ پالیسی کی ناکامیوں کو پی ٹی آئی کے پیچھے مت چھپائیں۔

امریکا میں تحریک انصاف کی لابنگ پاکستانی اوورسیز کررہے ہیں، اگر وہ فلسطین یا کشمیر کیلئے آواز نہیں اٹھاتے یہ ان کا مسئلہ ہے۔ انہوں نے کہاکہ مذاکرات کیلئے عمران خان نے سول نافرمانی کی تحریک کو مئوخر کرکے بڑے دل کا مظاہرہ کیا ہے، اگر حکومت مذاکرات میں لچک دکھاتی ہے تو سول نافرمانی کی کال کو مزید آگے بڑھایا جاسکتا ہے، ہمارے دو جائز مطالبات ہیں کہ سیاسی قیدیوں کو رہا کریں اور 9 مئی ، 26 نومبر پرجوڈیشل کمیشن بنائیں۔