阿道夫·希特拉
阿道夫·希特拉（Adolf Hitler，1889年4月20号—1945年4月30号）是20世纪中前期魏玛共和国个政客搭之后纳粹德国个独裁者。伊立在奥匈帝国靠近德国边境个小镇不牢阴出生。早年立在维也纳混迹。第一次世界大战爆发之后，参军，1919年退伍，加入激进党派，开始构建自家个极右翼野心。1923年，伊模仿意大利个法西斯组织，立在慕尼黑发动啤酒管暴动。失败，牢监蹲仔一年。迭个当中，完成自家个自传搭思想读物《我个奋斗》。1920年代末，因得大萧条事件，获得德国老百姓个广泛认同。通过选举进入魏玛共和国个议会。从1932年开始，担当德国总理个职务。立在魏玛共和国个总统兴登堡元帅死脱之后，篡夺一切大权。自立成功所谓个德国元首，建立纳粹党个独裁统治。伊是纳粹主义个创始人物，鼓吹种族主义，强调生存空间，引导德国走向战争。
早年
[编辑]家庭背景
[编辑]希特拉1889年4月20号立在德国搭奥匈帝国边境个小镇不牢阴出生。伊拉爷阿洛伊斯·希特拉是奥匈帝国个海关小文员。伊是伊爷娘个第四个小囡。之前个三个小孩全在蛮小辰光就夭折脱哉。故所以伊也是父母存活长大个第一个后代。到希特拉三岁辰光，伊一家人搬到巴伐利亚个怕骚。希特拉因此，学成功一口巴伐利亚个口音。1894年，伊拉爷貤搬到林自。之后，1895年退休。希特拉立在林自读中学，有传言，搭后势来个著名哲学家维特根斯坦是同级同学。
落魄维京
[编辑]从1905年开始，希特拉到迭个辰光奥匈帝国个京城维也纳去考艺术学院，幻想自家好成为一个有名气个成功艺术家。弗过，事与愿违，伊个尝试一直失败。嘸办法，只好立在维也纳，画画明信片，搞搞艺术创作。用朝弗保夕个收入勉强过日脚。弗过，立在20世纪初个维也纳，伊有机会接触到交关立在家乡碰弗著个书本搭思想。迭个辰光个维也纳有交关民粹主义抬头，其中，便包括认为日耳曼人种族优越，以及犹太人控制世界个通俗宣传文本。希特拉立在迭个阶段，广泛阅读过迭眼作品，受到邪气大个影响。开始慢慢较形成仔后首来排斥犹太人，并鼓吹日耳曼优越个价值观。
