Richard I van Normandië

Richard I van Normandië of Richard zounder Vrêes (Frans: Richard Sans Peur) (Fécamp, Normandië 28 ogustus 933 - Fécamp, 20 november 996) was hertog van Normandië van 942 tout 996. Je was de zeune van Willem I van Normandië en Sprota.

Richard I was de derdn hertog van Normandië, moa je zou wel den êestn gewist zyn die dien titel droeg. Lik zyn voader en zyn grôtvoader Rollo wierd ’n in ’t begun ook êest jarl (Vikingleider) genoemd.

Richard was nog klêne on ze zyn voader vermôord hen in december 942, en je kwam ounder ’t regentschap van vier hoge pietn in ’t hertogdom Normandië: Bernard den Deen, Rudolf van Taisson, Anslech van Bricquebec en Osmond de Conteville.

Keunienk Lodewyk van Overzêe van West-Francië liet Richard overbriengn noa ’t hof van Osmond de Conteville in Laon, zogezeid vo zyn educoatie, moa je veroverde binst Normandië en je stelde Herluin, groaf van Montreuil an ols gouverneur.

Richard zou doa gebleevn zyn van 943 tout 945. Je kost uuteindelik vluchtn mè d’hulpe van Osmond de Conteville, Bernard van Senlis (e moat van Rollo en vazal van Hugo de Grôotn), Ivo de Bellèsme en Bernard den Deen.

In 947 kost ‘n Normandië were verovern mè d’hulpe van de Vikings en de Normandiërs, die Herluin van Montreuil vermôord hen in 945, omdan z’hem ounrechtstreeks verantwoordelik steldn vo de môord ip Richards voader Willem Langzweird.

Vrouwn en jounges

In 960 is Richard getrouwd met Emma, dochter van Hugo de Grôotn en zuster van Hugo Capet. Met heur haad ’n gin jounges. Wel mè Gunnor, e Deensche woamee dat ‘n more danico (de Deensche polygoame maniere) getrouwd was. Loater zyn z’ip de christelikke maniere (more christiano) getrouwd, vo 't meugelik te moakn dat hunder zeune Robert den Deen aartsbisschop kwam.

Hunder jounges :

• Richard II van Normandië, zyn ipvolger
• Robert den Deen, groaf van Evreux en aartsbisschop van Rouen
• Mauger, groaf van Corbeil
• Emma van Normandië is getrouwd gewist mè twê keuniengn van Iengeland: êest met Ethelred II en achter zyn dôod met de Vikingkeunienk Knut II van Denemarkn, die ook keunienk van Iengeland was
• Havise, getrouwd mè Godfried I van Bretagne
• Mathilde, getrouwd met Odo II van Blois

Richard haad ook verschillige more danico concubines (frilla), woamee dat ’n veel ounwettige jounges haad, w.o. Godfried van Brionne en Willem I van Eu.