Orde van et Gulden Vlies

Filips den Goein met de keetn van de deur em gestichte Ridderorde

Lodewyk van Gruuthuse met de keetn van de Orde van ’t Gulden Vlies

De Orde van et Gulden Vlies is 'n ridderorde, die in 1430 gesticht is deur ertog Filips den Goein.

Geschiedenisse

D'n tienstn januoari 1430 richtte Ertog Filips den Goein de orde ip in Brugge, ter geleegneid van d'n trouw mè z'n derde vrouwe Isabella van Portugal. Je wilde de ridders van z’n ryk verenign vo nog meer anzien te geevn an z’n dynastie. De nieuwe orde bestound uut ’n select gezelschap woamee dat 'n z’n beste medewerkers en buutnlandse boundgenootn koste eern. Je was nie d’n eestn die zo ’n orde in leevn riep. Peis moar an de befoamde Ingelsche Orde van de Kouseband, die nog ouder is. De Orde van et Gulden Vlies benoemde vier belangryke ambtenoars: de kanselier, die verantwoordelik was vo de zegel en controle deed ip de ridders, de schatbewoarder, de griffier, die verantwoordelik was vo de documentn, en de woapnkeunink die de kapittelvergoaringn leidde. ’t Kapittel, ’t bestier, bestound uut dertig gekoozn ridders, w.o. Lodewyk van Gruuthuse.

De functie van ’t oofd van de orde gink achtereenvolgns over van Filips den Goein noa Karel den Stoutn, Maria van Bourgondië, Filips den Schoonn, Karel V, Filips II, enz...

Os Karel den Stoutn in 1477 sneuvelde, gink d’orde no z’n dochter Maria van Bourgondië en eur vint Maximiliaan van Oostenryk, d’n Habsburger. Doadeure noamn de Habsburgers de soevereiniteit over van de orde.

In 1516 veranderde Karel V, keizer van ’t Illig Rôoms Ryk, keunink van Spanje en heer van de Nederlandn, de statuutn. In plekke van dertig ridders woarn d’r nu viftig. De orde was erkend deur de paus en was in feite ’n religieuze gemeenschap. De vergoaringn mostn deure goan in e kerke. Doadeure vind je nog woapnschildn van de orde in ’t koorgestoelte van verschillige kerkn, lik in de Onze-Lieve-Vrouwekerke in Brugge, mor ook in Gent, Mecheln en Barcelona.

In ’t begun van de 18e eeuwe is de orde gesplitst in ’n Spoanschn en ’n Oostnryksn tak.

De schattn van’t Gulden Vlies wordn nu bewoard in Weenn.

De Orde bestoat nog oltyd ols oge ounderscheidinge. D’Ollanders, Van Willem I tout keuniginne Beatrix, zyn d’r mee g'eerd en ook enigte van onze keuningn.

Mêer ofbeeldiengn die ier by passn ku je vien ip Orde van et Gulden Vlies ip Wikimedia Commons.