Amenanu

Funtana di "l'acqua a linzolu" (Titu Angelici)

La funtana dê setti canali â piscaria

L' Amenanu è nu ciumi suttirràniu chi scurri sutta la cità di Catania.

Discrizzioni e evuluzzioni storica

Nzinu a quarchi sèculu fa nun era suttirràniu. Quannu li lavi dò XVII sèculu commigghiaru la citati di Catania, macari lu ciumi Amenanu , lu ciumi Lògnina e lu lagu di Nìcitu foru vurricati sutta la lava.
Assai sunnnu li punti di la cità unni li scavi hannu rilivatu la prisenza dô ciumi Amenanu, cu na purtata di quarchi 14 litri o secunnnu.
Lu vulcanòlugu Carlu Gimmillaru (1787-1866) dissi ca l’Amenanu scurri sutta terra e si sparti nta tri rami, secunnu stu pircorsu: dô viali M. Rapisardi arriva nzìnu la chiazza S. Maria di Jèsu, di ccà curri agghiri la via Pibbliscitu pi pigghiari via Botti di l'acqua e arrivari ntô Munasteru dê binidittini, unni, prima di sbuccari a mari, si sparti nta tri rami:
Lu primu ramu attraversa lu quarteri S. Ajta, lu curtigghiu S. Pantaleu, via Orfanelle, vìculu di li Jàngili, la piscarìa e villa Pacini;
lu secunnu passa sutta lu munasteru di S. Giulianu e attraversa li Termi Achilliani;
lu terzu ramu pigghia via S. Austinu, chiazza S. Francescu d'Assisi, via V. Emanueli e chiazza Domu (ô chianu), unni nta la surgiva di stu ciumi, fu misa ntô 1867 na bedda funtana cu na stàtula, pruggittata di lu sculturi napulitanu Titu Angelici; la funtana veni chiamata dê catanisi, la funtana di “l’acqua a linzolu” pi lu velu di l’acqua ca forma, certi voti cuntìnuu; sempri acqua dô ciumi Amenanu, scurri nta la funtana dê “setti canali” ca è misa a la piscarìa, tanticchia chiù appressu dâ funtana di “l’acqua a linzolu”.

Ciumi mistiriusu

Lu ciumi Amenanu è nu ciumi mistiriusu, picchì nun s'hà saputu mai di unni è ca nasci.
Iddu scurri sutta la cità di Catania, nesci 'n supirfici ô chianu (chiazza Domu) e appoi scumpari n'àutra vota ntô mari.
Anticamenti, assumava, nta diversi punti di la citati, prima ca li culati di lava dô XVII sèculu cummigghiàssuru la cità, ma mai si sappi di unni iddu nasci.

Foru fatti tanti spirimenti pi nzirtari la funti: nta diversi posti supra li pinnici di l’Etna, unni ci sù li surgenti di lu ciumi Simetu e di lu ciumi Alcàntara, ci fu abbiatu culuranti pi vìdiri si appoi st’acqua acculurata arrivava â valli unni stu ciumi nesci fora a Catania, ma, nenti, nun fu cosa ca si potti sapiri.

Àutri ciumi e acqui vurricati

Ciumi Lògnina

Lu ciumi Lògnina, ca di iddu pigghiau lu nomu la burgarta marinara di Ògnina e ca li sò acqui nun hannu nènti a chi vidiri cu chiddi di l'Amenanu , scurri, sutta terra, prubàbbilmenti a nord di Cìfuli e si jietta ntô mari, doppu ca attraversa via Duca di l’Abbruzzi.

Lagu di Nìcitu

Di lu lagu di Nìcitu si sapi sulu ca s'attruvava ‘n facci a lu Vastiuni di l’infetti e ca era di sei migghia di circunfirenza e ca, ‘n èbbichi antichi, vineva alimintatu di lu ciumi Amenanu