Caer

Caer (kymrikse) libo Chester (angliekse) on linnu Anglies lähil Kymrinmuan rajua.

Caeran kymriläzet

Hos Caer sijaiččou Kymrinmuan ulgopuolel, se on roinnuh tärgiekse linnakse kymriläzilegi. Jo 1000-luvul kymriläzet käydih jarmankale Caerah da vuozisadoin aijan kymriläzien muuttoliikeh sinne oli toinah raviembua migu yhtehgi Pohjas-Kymrinmuan omah linnah.^[1] Enne 1700-luguu muuttujat sulavuttih terväh anglienkielizih, ga linnan eläjien kymriläzet juuret nävytäh ezimerkikse sinny, ku vuvvel 1818 joga kolmandel linnas iänioigevuttu käyttänyöl miehel oli sugunimi kymrilästy alguperiä.^[2] 1700-luvun algupuolel Caeras allettih painua kymrinkielizii kirjoi da 1790-luvul kymrinkielizii lehtii.^[3] Samoih aigoih linnah muuttunuot kymriläzet allettih säilyttiä parem omua kieldy da azuttih kymrinkielizii kirikkölöi. Enimyölleh Caeras ruadoi viizi kymrinkielisty kirikkyö da nygöigi niilöis on jällel vie yksi.^[4]^[5] Vuvvel 1851 linnan eläjis yksitostu procentua oli roinnuh Kymrinmuas^[6] da vuvvel 1866 kymrin kielen kunnivokse joga vuozi piettävy kanzalline Eisteddfod-pruazniekku järrestettih Caeras.^[7] Nygöigi linnas eläy kymrinkielizii da sie ruadau Caeran kymriläzien siebru (kymrikse Cymdeithas Cymry Caer), hos sen jäzenmiäry ongi vähennyh 2000-luvun algupuolel.^[8]

Lähtiet

[1] ttps://www.british-history.ac.uk/vch/ches/vol5/pt1/pp1-8

[2] ttps://www.british-history.ac.uk/vch/ches/vol5/pt1/pp1-8

[3] ttps://www.british-history.ac.uk/vch/ches/vol5/pt1/pp1-8

[4] ttps://www.bbc.com/cymrufyw/37471540

[5] ttps://www.bbc.co.uk/programmes/p0491wd6

[6] ttps://www.british-history.ac.uk/vch/ches/vol5/pt1/pp1-8

[7] ttps://www.bbc.co.uk/cymru/gogleddorllewin/papurau_bro/llanw_llyn/newyddion/ebrill05.shtml

[8] ttps://www.bbc.com/news/uk-wales-28488729

[1]

[2]

[3]

[4]

[5]

[6]

[7]

[8]