Top Gun (Film)
| Filmdaten | |
|---|---|
| Plattdüütsch Titel: | — |
| Originaltitel: | Top Gun |
| Düütsch Titel: | Top Gun – Sie fürchten weder Tod noch Teufel |
| Produkschoonsland: | USA |
| Johr vun’t Rutkamen: | 1986 |
| Läng: | 105 Minuten |
| Originalspraak: | Engelsch |
| Öllersfreegaav in Düütschland: | FSK 12 |
| Filmkru | |
| Speelbaas: | Tony Scott |
| Dreihbook: | Jim Cash Jack Epps Jr. |
| Produkschoon: | Don Simpson Jerry Bruckheimer |
| Musik: | Harold Faltermeyer |
| Kamera: | Jeffrey L. Kimball |
| Snitt: | Chris Lebenzon Billy Weber |
| Szenenbild: | John DeCuir Jr. |
| Dorstellers | |
| |
Top Gun is de Titel vun en US-amerikaanschen Actionfilm ut dat Johr 1986 mit Tom Cruise in de Hööftrull vun en US-Navy-Kampfleger.
De Film hett an de Kinokassen weltwiet ruchweg 344 Millionen US-Dollar inspeelt. Dat Budget för de Produkschoon hett 15 Millionen US-Dollar bedragen. De Produkschoon is vun’t US-amerikaansche Ministerium för’t Verdeffenderen finannziell ünnerstütt worrn.
Inholt
[ännern | Bornkood ännern]Pete „Maverick“ Mitchell is’n jungen F-14-„Tomcat“-Kampfleger, de bi de United States Navy op’n Flegerdräger USS Enterprise (CVN-65) insett is. He is de Söhn vun Duke Mitchells, en Kampfleger, de in’n Vietnamkrieg afschoten worrn is un sietdem as vermisst gellt. Wat nipp un n au passeert is, hett Maverick nienich rutfunnen, vunwegen dat de Vörfall ünner Versluss is.
De Film fangt in’n Insatz op den Flegerdräger ennerworrns in’n Indischen Ozean an. Maverick is mit sien Wapensystemoffizeer (RIO) „Goose“ op’n Patrouillenflaag an de Siet vun „Cougar“ un den sien RIO „Merlin“. Se kriegt den Opdrag, Flegers aftofangen, de in en Luftruum rinflagen is. Dat stellt sik rut, dat dat twee Kampflegers vun’n Tyyp MiG-28 sünd, de al op 250 km an den Flegerdräger ran sünd. De Soldaten nehmt de gegnerischen MiGs in jemehr Teelradar un künnt jem na’n beten Hen un Her opletzt afdrängen. Ofschoonst allns goot utgahn is, kriggt Cougar dör den Vörfall en Panikanfall un verlütt de Kontroll över sik un den Fleger. Maverick kann em aver rünner snacken, liekers dat he Order harr, foorts to lannen.
As Cougar na den Vörfall sien Deenst as Kamppilot opgifft, stiegt Maverick un Goose dordör op un drööft, liekers dat se jüst de Order nich utföhrt hebbt, an de Utbilln bi de United States Navy Fighter Weapons School in Miramar, de ok „Top Gun“ nöömt warrt, deelnehmen. Maverick steiht dor in Konkurrenz to den ehrgiezigen Flaagschöler Tom „Iceman“ Kazanski. Dat duert nich lang, bit de eersten Problememn kamt, vun wegen dat Maverick gegen mehrere Insatzregeln verstöten deit, liekers dat he spoodriek sien Luftkämp bestrieden deit. He wiest sik, as wenn he nich in’t Team arbeiten künn. In en Kampsimulatschoon brickt he to’n Bispeel ut de Formatschoon ut üm op egen Fuust den Baas vun Top Gun to jagen. Den kann he in’n Luftkamp mit Spood bikamen, warrt sülvst aver vun en annern Utbiller simuleert afschaten. Blangento lehrt Maverick Charlotte Blackwood kennen, de sik as een vun de Utbillers vun Top Gun rutstellt. Se is dat Gewohnt, dat junge Flegers wat mit ehr anfangen wüllt und lett em eerst oplopen, man mit de Tiet kummt se gegen Mavericks Charme nich an un de beiden kamt tohopen.
Bi en nächsten simuleerten Insatz jaagt Maveriack un Iceman tosamen en vun de Utbillers. De beiden Fleger bewegt sik dicht op, wobi Iceman vörn flüggt. As he afdreiht, flüggt Maverick dör sien Afgasstrahl, wodör de beiden Driefwarken vun Maverick F-14 naenanner utgaht. Dat kummt to’n Afrieten vun de Strömen un de Maschien fangt an to trudeln un sackt daal. As de F-14 nich mehr to redden is, versöökt Maverick un Goose mit den Sleudersitt uttostiegen. Goose warrt dorbi aver gegen Dat Dack vun’t Cockpit schaten un blifft bi den Unfall doot. Da Fall warrt dör’t Gericht ünnersöcht un Maverick warrt freespraken, liekers kann he sien Schuldgeföhlen nich loswarrn un sütt sik nich in de Laag, noch mol so en Risiko intogahn. Bi en wietere Simulatschoon dreiht Maverick af, ofschoonst he en go’e Scheetpositschoon harr.
De Vörfall maakt em blots noch unsekerer un Maverick denkt nu doröver na, wat he wieterhen in de Navy blieven will. As he siek bi Viper, den Top-Gun-Baas, Raat hollt, vertellt de em wat över sien Vadder un sien Insatz in Vietnam - ofschoonost he dat nich vertellen dröff un dormit sien Loopbahn op’t Speel sett. So kriggt Maverick nu spitz, dat sien Vadder drapen weer man liekers noch wieter kämpen de un dormit dree annere Flegers reddt hett, vördem sien Kampfleger afstört is. Vun’t US-Bundsministerium is de Vörfall aver verheemlicht worrn, vun wegen dat de Luftkamp buten den vietnameeschen Luftruum stattfunnen hett un de Regeren en internatschonalen Twüschenfall verhinnern wull.
Op de Afslussfier warrt Iceman, Slider, Hollywood, Wolfman und Maverick överraschen op de USS Enterprise afkommandeert. In de Neeg vun’n Flegerdräger drifft en US-amerikaansch Spionaaschschipp ahn Andriev in feendlich Water. Bit dat Schipp repareert is, schüllt Iceman un Hollywood den Luftruum överwachen, wiel Maverick un sien RIO Merlin as Alarmrott an’t Startkatapult blievt. Iceman un Hollywood warrt op jemehr Patrouille vun söss MiGs gliektietig angrepen un Hollywoods F-14 warrt dorbi afschaten. As Maverick losflegen deit, geiht de Startanlaag in’n Dutt, so dat Maverick un Iceman lange Tiet alleen in de Luft sünd.
As Maverick in den Luftkamp ingriepen kann, kummt he mit sien F-14 wedder in den den Afgasstrahl vun en MiG un fangt an to trudeln. Liekers dat he de Maschien ditmol wedder in’n Greep kriggt, verlütt he sien Sülvstbewusstwesen un will al meist utrieten. Man, as he de Kennmark vun sien doden Fründ Goose in de Hand hollt, överleggt he sik dat un dreiht wedder üm. He kann dree vun de MiGs afscheten un deckt denn Iceman, de sülvst ok en MiG afscheten kann. As Maverick na sien heldenhaften Insatz torüch na’t Schipp kummt, warrt em freestellt sik uttosöken, woneem he mit sien Loopnbahn wietermaken will. So kehrt he as Utbiller torüch na Miramar un dröpt dor sien Bruut Charlie in en Bar.
Kritik
[ännern | Bornkood ännern]- Lexikon vun’n internatschonalen Film: Ein in verführerischen Bildkompositionen aufgelöstes Hohelied auf die militärische Gemeinschaft, die jungen Menschen Aufstieg, Erfüllung und ein hohes Maß an Abenteuerlichkeit bietet. Distanzlos und plakativ, in der auf ungebrochene Faszination setzenden Direktheit äußerst zwiespältig.[1]
- TV Spielfilm: Daß der Film während seiner Produktion tatkräftig von der US-Navy unterstützt wurde, brachte ihm bei seiner Kinopremiere den Ruf ein, ein Werbefilm fürs Verteidigungsministerium zu sein. Wie dem auch sei: Er bietet atemberaubende, actionstarke Flugaufnahmen. Mit Filmen wie «Flashdance» und «Beverly Hills Cop» wurden Jerry Bruckheimer und der 1996 verstorbene Don Simpson zu den erfolgreichsten Produzenten der 80er Jahre. Und eben auch mit «Top Gun». Dessen «schickes» Styling und sein Hit-Soundtrack (Giorgio Moroder gewann den Titelsong-Oscar für «Take My Breath Away») machen ihn zu einem herausragenden Vertreter des Kinos jener Dekade.[2]
Utteken
[ännern | Bornkood ännern]De Film is för 14 Filmpriesen vörslahn wesen. Mit negen dorvun is he uttekent worrn:
- 1987: mit den ASCAP Award in de Kategorie Top Box Office Films för Harold Faltermeyer
- 1987: mit den ASCAP Award in de Kategorie Fakenst speelt Leed ut en Speelfilm för Giorgio Moroder un Tom Whitlock
- 1987: mit den Oscar in de Kategorie Best Leed för Giorgio Moroder un Tom Whitlock
- 1987: mit den Brit Award in de Kategorie Best Soundtrack
- 1987: mit den Golden Globe in de Kategorie Best Filmleed för Giorgio Moroder un Tom Whitlock[3]
- 1987: mit den Golden Reel Award in de Kategorie Best Toonsnitt – ADR
- 1987: mit den Golden Reel Award in de Kategorie Best Toonsnitt – Luuteffekten
- 1987: mit de Golden Lienwand
- 1987: mit den People’s Choice Award in de Kategorie an’n leefsten sehn Speelfilm
Wohre Achtergrund
[ännern | Bornkood ännern]Top Gun weer Enn vun de 1960er Johren en Utbilln vun de United States Navy Fighter Weapons School, de vun de United States Navy in’t Leven ropen worrn is. as in’n Verloop vun’n Vietnamkrieg jümmer düütlicher worrn is, dat de Jaagdflegers keen Överlegenheit wiesen deen, nich bi’t Afscheten vun Luft-Luft-Raketen, noch in’n so nöömten dog fight, also den Nahkamp in de Luft. Vör allen bi de mit AIM-7 Sparrow un AIM-9 Sidewinder bestückten F-4-Phantom-II-Staffeln is blangen dat Fehlen vun en Boordkanoon ok en minnere Gööd bi’n Nahkamp faststellt worrn, de de Flegers t. B. vun de F-105 Thunderchief vun de US-Luftstrietkräft so nich wiesen deen.
Anners wat
[ännern | Bornkood ännern]- To de Tiet, as de Film dreiht worrn is, weern keen original russ’sche Kampflegers to kriegen. De Filmmakers hebbt dorum swart anmaalte F-5 Tiger II un T-38 Talon bruukt, üm de MiGs to simuleeren. De Tyyp Mig-28, de in’n Film nöömt warrt, is en utdachten Fleger, den dat in Wohrheit nienich geven hett.
- De US-Navy hett den Speelbaas Tony Scott mit Fackweten un Fleger utholpen.[4]
- Deelen vun de Flaagszenen weern in de Feernsehreeg JAG noch mol wedder bruukt.
- Bryan Adams schüll dat Leed "Only the Strong Survive" to’n Soundtrack bistüern, man he hett sien Freegaav nich geven, vun wegen dat he de Ansicht weer, dat de Film den Krieg verherrlichen deit
Literatur
[ännern | Bornkood ännern]- Mike Cogan: Top Gun. Das Buch zum Film. Düütsch vun Joachim Honnef. 16. Oplaag. Bastei-Verlag Lübbe, Bergisch Gladbach 1993, 186 S., ISBN 3-404-13084-7
Borns
[ännern | Bornkood ännern]- ↑ Lexikon des internationalen Films, CD-ROM-Utgaav, Systhema, München 1997
- ↑ http://www.tvspielfilm.de/filmlexikon/?type=filmdetail&film_id=377281
- ↑ Silvia Pingitore: Remember Top Gun's song "Take My Breath Away" in 1986? Exclusive interview with John Crawford of Berlin. In: the-shortlisted.co.uk. 1. April 2022, afropen an’n 22. Mai 2022 (brietsch Engelsch).
- ↑ http://www.tvspielfilm.de/filmlexikon/?type=filmdetail&film_id=34168
Weblenken
[ännern | Bornkood ännern]- Top Gun in de Internet Movie Database (engelsch)
- Kritiken to Top Gun op Rotten Tomatoes