Fabian Graaf vun Wrangel

Fabian Graaf vun Wrangel (* 1651; † 2. September 1737) weer een Feldmarschall bi de Suldaten vun den Kaiser ut dat Huus Habsborg.

Fabian vun Wrangel stamm vun den eestlännisch Twieg vun de Familie Wrangel af. Toeerst weer he bi de Sweden in Deenst. Dor is he al opfullen 1676 bi de Slacht vun Lund. Later güng he as Suldat na de Hollänners. De wullen em to´n General maken, man he güng in den Kaiser sienen Deenst.

Dor wurr he in dat Johr 1706 to´n Generalmajor maakt. He hett sik besunners goot slaan in den Krieg, wo dat üm de Fraag güng, wer tokümstig op den Thron vun Spanien sitten scholl (Spanischer Erbfolgekrieg). In düssen Krieg hett de Hertog vun Bayern Max Emmanuel 1708 versöcht, de Stadt Brüssel intonehmen, man he hett dat nich schafft.

Denn is he för korte Tiet na de Armee vun Graaf Guido von Starmhemberg na Spanien gahn. Dor hett em de König Karl III. an ´n 6. Januar 1709 to´n Graaf mookt.

1712 wurr he Feldmarschallleutnant, August 1718 Feldzeugmeister un an´n 27. März 1728 wurr he Feldmarschall nöömt. Siet 1717 weer siene böverste Opgav, dat he de Verwaltung vun dat Militär in Brüssel anföhren dö.

He hett sik düchtig mit dat Boon vun Warken to´n Verdeffendeeren vun de Stadt afgeben. Mit Artillerie hett he sik ok oorntlich uteneensett.

Sien Graff is in de Karken vun de Kapuziners in Brüssel.