Engelsch Anspeel

1.c2-c4

Dat Engelsch Anspeel is en Anspeel in’t Schachspeel. De Naam hett se vun den engelschen Meester Howard Staunton kregen, de dit Anspeel in dat 19. Johrhunnert völ speelt hett un sück grooden Verdeenst um hör theoretisch Bekanntmakung erwurben hett. Engelsch is en bannig flexibel Anspeel, in de man faken in völ anner Anspeelsysteme övergahn kann; so is vun Daamgambit över de Indisch Verteedigung bit to Siziliaansch völ mögelk. Kien anner Anspeelsystem bütt so en Völfalt an Mögelkeiten.

Dat Engelsch Anspeel tellt to de Slooten Spelen un is in de ECO-Codes ünner de Slötel A10 bit A39 klassifizeert.

Jede vun de Hööftvarianten fangt mit 1.c2-c4 an (Toogumstellungen gifft dat faken; t. B. 1. Sf3.... 2. c4)

To de Hööftvarianten vun dat Engelsch Anspeel tellen:

• Engelsch Symmetrievariante 1. ... c7-c5
• Siziliaansch in’ Antoog 1. ... e7-e5
• Nah de neutral Entwicklungstoog 1. ...Sg8-f6 is da Mikenas-System oder Mikenas-Angreep nömmt 2.Sb1-c3 e7-e6 3.e2-e4 vun sülvstännig Bedüüden. Bi 3. ...d5 4. e5 d4 5. exf6 dxc3 6. bxc3 Dxf6 7. d4 sett Witt up den Ruumvördeel vun sien robust Buernzentrum.

Bi 3. ...c5 4. e5 Sg8 kann Witt middels 5. d4 cd4 6.Dxd4 Sc6 7.De4 sien Vörposten e5 verteedigen oder mit 6. d4 cxd4 7. Sxd4 Sxe5 8.Sdb5 Figurendruck utöven.

Dat Anspeel wurrd af un an ok Bremer Anspeel oder Carls-Anspeel, nah de Bremer Schachmeester Carl Carls (1880 - 1958) nömmt. Mit de witt Figuren hett Carls immer 1.c4 speelt. Dorto wurrd folgend Anekdote vertellt: As Carls bi en Schachturnier wedder mol Witt harr, hebbt sien Frünnen stillkens den Buer up c2 fastkleevt. Carls hett sück denn an Brett sett, den c-Buern anfaat un hett denn versöcht mit aller Kraft to trecken...