Lompat ke isi

Pitih

Suntiang pautan
Wikipedia Minangkabau - Lubuak aka tapian ilimu

Pitih dalam ilimu ekonomi tradisional didefinisian sabagai satiok alaik tuka nan dapek ditarimo sacaro umum. Alaik tuka ko dapek barupo benda apopun nan dapek ditarimo dek urang banyak di masyarakaik untuak proses manuka antaro barang jo jaso.[1] Dalam ilimu ekonomi moderen, pitih didefinisian sabagai sasuatu nan tasadio dan sacaro umum ditarimo sabagai alaik pambayia untuak pambalian barang-baran dan jaso-jaso sarato kakayoan barago lainyo sarato untuak pambayia utang.[2] Babarapo ahli juo manyabuikan fungsi pitih sabagai alaik penunda pambayian ateh pambalian barang jo jaso, dan pado wakatu nan basamoan batindak sabagai alaik panimbun kakayoan.

Kabaradoan pitih manyadiokan alternatif transaksi nan labiah mugah daripado barter nan labiah rumik, indak episien, jo kurang cocok digunoan dalam sistem ekonomi moderen karano mambutuahkan urang nan mamiliki kainginan nan samo untuak malakuan patukaran dan juo kasukaran dalam panantuan nilai.[3] Episiensi nan didapek jo mangunoan pitih pado kasudahannyo mandorong paniagaan jo pambagian tanago karajo nan kamudian akan maningkekan produktifitas jo kemakmuran.

Pado mulonyo di Indonesia, pitih —dalam hal iko pitih kartal—ditabikan dek pamarentah Republik Indonesia. Namun sajak dikaluakan UU No. 13 taun 1968 pasal 26 ayek 1, hak pamarentah untuak mancetak pitih dicabuik. Pamarentah kamudian manunjuak Bank Sentral, Bank Indonesia, sabagai ciek-cieknyo lembaga nan berhak mambuek pitih karateh. Hak untuak mambuek pitih ko disabuik jo hak oktroi.[4]

Sejarah

[suntiang | suntiang sumber]

Mulonyo, masyarakaik alum bana tau jo mangenal patukaran karano satiok urang barusaho mamanuhi kabutuhannyo jo usaho surang-surang. Manusia baburu jikok lapa, mambuek pakaian surang dari bahan-bahan saadonyo, mancari buah-buahan untuak dimakan; singkeknyo, apo nan didapek itulah nan dimanfaaikkan untuak mamanuhi kabutuhannyo. Pakambangan selanjuiknyo  mambuek manusia basubok jo kenyataan bahwa apo nan diproduksi surang tanyato indak cukuik untuak mamanuhi saluruah kabutuhannyo. Untuak mandapekan barang-barang nan indak dapek dihasilkan surang, manusia mancari urang nan niyo manukaan barang nan dimiliki jo barang lain nan dibutuahkan dek inyo.[5] Akibeknyo munculah sistem ‘barter’ yaitu barang nan dituka jo barang.[6] Namun pado kasudahannyo, banyak kesulikan-kesulikan nan diraso jo sistem samacam iko ko. Di antaronyo iolah sulik untuak manamuan urang nan mampunyoi barang nan diinginan jo nan amuah manukaan barang nan dimilinyo sarato sulik untuak mamparoleh barang nan dapek dipatukakan ciek jo lainnyo. Salain itu akibaik situasi politik  manyebabkan raso takuik untuak mangadokan barter.[7] Untuak mangatasinyo, mulailah timbua aka untuak manggunnokan benda-benda tatantu untuak digunoan sabagai alaik tuka.[8] Benda-benda nan ditetapkan sabagai alaik patukaran itu adolah benda-benda nan ditarimo dek  umum (generally accepted), benda-benda nan dipiliah banilai tinggi (sulik didapek atau mamiliki nilai magis dan mistik), atau benda-benda nan marupokan kabutuhan primer sahari-hari; misalnyo garam nan dek urang romawi digunoan sabagai alaik tuka maupun sabagai pambayia upah.[9] Pangaruah urang Romawi ko tanyato masih taliek sampai kini ko; urang inggris manyabuik upah sabagai salary nan barasa dari bahaso Latin salarium nan bararti garam.

Sasudah tuh muncua lah apo nan dinamokan jo pitih logam. Pitih logam partamo muncua pado 1000 SM di Cino.[10] Logam dipiliah sabagai alaik tuka karano mamiliki nilai nan tinggi sahinggo disukoi dek urang banyak, tahan lamo jo indak mugah rusah, mugah dipacah tanpa mangurangi nilai, dan mugah untuak dipinda-pindahan.[11] Logam nan dijadian alaik tuka  karano mamanuhi syaraik-syaraik tasabuik iolah ameh jo perak.[12]

Sajalan jo pakambangan perekonomian, timbua suatu anggapan sulik bana katiko pakembanggan tuka-manuka nan mesti dilayani jo pitih logam batambah samantaro jumlah logam mulia (ameh jo perak) sangaik tabateh. Panggunoan pitih logam jugo sulik dilakuan untuak transaksi dalam jumlah nan gadang sahinggo diciptakanlah pitih karateh.[13] Pitih karateh  patamo kali dipakai di Cino pado jamannyo Dinasti Tang.[14] Mulonyo pitih karateh nan baredar marupokan bukti-bukti pemilikan ameh jo perak sabagai alaik/parantaro untuak malakuan transaksi. Bak kato lainnyo, pitih karateh nan baredar pado wakatu itu iolah pitih nan dijamin 100% jo ameh atau perak nan disimpan di pandai ameh atau perak nan sawaktu-waktu dapek ditukakan panuah jo jaminannyo. Pado pakembangannyo, masyarakaik indak lai mangunoan ameh (sacaro langsuang) sabagai alaik tuka-manuka. Sabagai gantinyo, inyo jadian “karateh-bukti” tasabuik sabagai alaik tuka.[13]

Fungsi

[suntiang | suntiang sumber]

Sacaro umum, pitih mamiliki fungsi sabagai parantaro untuak patukaran barang jo barang, ado pulo untuak mahindarkan padagangan dengan caro barter. Sacaro labiah rinci, fungsi pitih dibedaan manjadi duo yaitunyo fungsi asli j o fungsi turunan.

Fungsi Asli

[suntiang | suntiang sumber]

Fungsi asli pitih ado tigo, yaitu sabagai alaik tuka, sabagai satuan hituang, jo sabagai panyimpanan nilai.

  • Pitih bafungsi sabagai alaik tuka atau medium of exchange nan dapek mampamudah patukaran.[15]
  • Pitih bafungsi pulo sabagai satuan hituang (unit of account).
  • Salain tuh, pitih bafungsi sabagai alaik panyimpanan nilai (valuta ) karano dapek digunoan untuak mangaliahkan dayo bali dari maso kini ka maso datang. Katiko saurang panjua wakatu kini manarimo sajumlah pitih sabagai pambayaran ateh barang jo jaso nan dijua dek nyo, mako inyo dapek manyimpan pitih tasabuik untuak digunoan mambali barang jo jaso pado maso mandatang.[16]

Fungsi turunan

[suntiang | suntiang sumber]

Salain katigo hal di ateh, ado fungsi lain pitih nan disabuik sabagai fungsi turunan. Fungsi turunan iko antaro lain:

  • Pitih sabagai alaik pambayaran nan sah
  • Pitih sabagai alaik pambayaran utang
  • Pitih dapek digunoan untuak mangukua pambayaran pado maso nan akan datang
  • Pitih sabagai alaik panimbun kakayoan. Sabagian urang biasonyo indak mahabisan kasado pitih nan dimiliki untuak kaperluan konsumsi. Ado sabagian pitih nan disisihan jo ditabuang
  • Pitih sabagai alaik pamindah kakayoan
  • Pitih sabagai alaik panundo kegiatan ekonomi. Apobilo nilai pitih stabil urang labiah sanang dalam malauan investasi. Jo adonyo kegiatan investasi, kagiatan ekonomi akan samakin maningkek.

Syarek-syarek

[suntiang | suntiang sumber]

Ciek benda dapek dijadian sabagai pitih jikok benda tasabuik alah mamanuhi syarek-syarek tatantu. Partamo, benda ko haruslah ditarimo dek urang banyak (acceptability). Supayo dapek diakui sabagai alek tuka umum suatu benda harus mamiliki nilai tinggi atau satidaknyo dijamin kabaradoannyo dek pamarentah nan bakuaso. Bahan nan dijadian pitih juo mesti tahan lamo (durability), kualitasnyo canduang samo (uniformity), jumlahnyo dapek mamanuhi kebutuhan masyarakaik sarato indak mugah dipalsuan (scarcity). Pitih juo harus mugah dibawok, portable, dan mugah dibagi tanpa mangurangi nilai (divisability), sarato mamiliki nilai nan canduang stabil dari wakatu ka wakatu (stability of value).[17] Salain itu, mangingek dari bagaimano inyo taruih baputa dari ciek tangan ka tangan nan lain, mako dibutuahan pitih nan mugah dibawok (portability).[18]

Otoritas panciptaan pitih

[suntiang | suntiang sumber]

Dalam parekonomian saat iko, otoritas nan punyo wewenang jo mamagang kandali untuak manciptakan pitih adolah pamarentah, dalam hal iko pamarentah mambantuak otoritas kapitihan atau bank sentral. Hal iko tajadi karano kabaradoan pitih dianggap mawakili kabaradoan negara nan basangkutan. Sahinggo wajar apobilo ditetapkan lembaga nan ateh namo negara atau pamarentah nan bawenang untuak manciptakan pitih. Hampia satiok negara di dunia mampunyoi lembaga nan bakarajo untuak malaksanakan fungsi otoritas moneter, nan salah cieknyo adolah mangaluakan jo mangedarkan pitih. Di Indonesia fungsi tasabuik dikarajoan dek Bank Indonesia sasuai jo undang-undang nan balaku.[19]

Liek pulo

[suntiang | suntiang sumber]

Referensi

[suntiang | suntiang sumber]
  1. ↑ "Definition of MONEY". www.merriam-webster.com (dalam bahasa Inggris). Diakses tanggal 2020-10-22.
  2. ↑ Media, Kompas Cyber. "Uang: Pengertian, Sejarah, Fungsi dan Jenisnya Halaman all". KOMPAS.com. Diakses tanggal 2020-10-01
  3. ↑ "Functions of Money". www.cliffsnotes.com. Diakses tanggal 2020-10-22.
  4. ↑ Media, Kompas Cyber. "Hak Oktroi: Pengertian dan Isinya Halaman all". KOMPAS.com. Diakses tanggal 2020-10-01.
  5. ↑ Smith, Yves (2011-08-26). "What is Debt? – An Interview with Economic Anthropologist David Graeber". naked capitalism (dalam bahaso Inggris). Diakses tanggal 2020-10-22.
  6. ↑ Dalton, George (1982). "Barter". Journal of Economic Issues. 16 (1): 1.
  7. ↑ Chapman, Anne (1980). "Barter As A Universal Mode of Exchange". L'Homee. 20 (3): 37.
  8. ↑ Andrew Beattie. "The History of Money: From Barter to Banknotes". Investopedia (dalam bahaso Inggris). Diakses tanggal 2020-10-22.
  9. ↑ "How Salt Works". HowStuffWorks (dalam bahaso Inggris). 2007-11-27. Diakses tanggal 2020-10-22.
  10. ↑ "The History of Money". www.pbs.org (dalam bahaso Inggris). Diakses tanggal 2020-10-22.
  11. ↑ Rohrig, Brian (2007). The Captivating Chemistry of Coins (PDF). ChemMatters. hlm. 14
  12. ↑ Head, Barclay V. (1883). "Anciet Greek Coins". American Journal of Numismatics, and Bulletin of the American Numismatic and Archaeological Society. 18 (2): 25.
  13. ↑ a b Ph. D., History; J. D., University of Washington School of Law; B. A., History. "The Invention of Paper Money in China". ThoughtCo (dalam bahaso Inggris). Diakses tanggal 2020-10-22.
  14. ↑ "Top 10 Things You Didn't Know About Money - TIME". Time (dalam bahaso Inggris). 2009-08-05. ISSN 0040-781X. Diakses tanggal 2020-10-22.
  15. ↑ Liputan6.com (2019-08-21). "Fungsi Asli Uang Adalah Sebagai Alat Tukar dan Satuan Hitung". liputan6.com. Diakses tanggal 2020-10-01.
  16. ↑ Greco, Thomas (2001-11-01). Money: Understanding and Creating Alternatives to Legal Tender (dalam bahaso Inggris). Chelsea Green Publishing. hlm. 28. ISBN 978-1-60358-188-2.
  17. ↑ Tusyanah (Desember 2013). "Coins of Hope: Model pengajaran Tentang Uang, Konservasi Moral dan Keterampilan Berbicara Deskriptif Dalam Bahasa Inggris". Jurnal Pendidikan Ekonomi Dinamika Pendidikan. 8 (2): 95.
  18. ↑ "Functions of Money, Economic Lowdown Podcasts | Education Resources | St. Louis Fed". www.stlouisfed.org. Diakses tanggal 2020-10-23.
  19. ↑ Solikin, Suseno (2002). Uang: Pengertian, Penciptaan, dan Peranannya dalam Perekonomian (PDF). Pusat Pendidikan dan Studi Kebanksentralan Bank Indonesia. hlm. 9. ISBN 979-3363-00-2.

Pranala lua

[suntiang | suntiang sumber]
  • (Inggris) Philosophy of Money
  • (Inggris) The Standard of the Heraion (Internet Archive)
  • (Indonesia) Uang NKRI Redenominasi
  • (Indonesia) Koleksi Uang Republik Indonesia
  • (Inggris) Lingguistic and Commodity Exchanges by Elmer G. Wiens . Examines the structural differences between barter and monetary commodity exchanges and oral and written linguistic exchanges.
Diambiak dari "https://min.wikipedia.org/w/index.php?title=Pitih&oldid=3144520"