Harry Potter
Dit artikel is gesjreve (of begós) in 't Mestreechs. Laes hie wie v'r mit de versjillende saorte Limburgs ómgaon.
Harry Potter is 'n fictief persoen, gesjaope door de Britse sjriefster J.K. Rowling. Heer is de hoofpersoen vaan zeve beuk die allemaol ziene naom drage en die oongekind populair gewore zien bij awwer kinder en volwassene.
Harry Potter
[bewirk | brón bewèrke]Harry Potter is 'ne touveneerslierling, dee oet twie touvenere gebore is. Z'ne pa en zien ma zien evels al vreug vermaord door Voldemort, 'ne mechtege en koeje touveneer, en sinstoen is 'r opgetrokke door ziene noonk en zien tant, die 'm slech behandele. Es 'r èlf jaor is weurt 'r opgespoord door de touveneerssjaol Hogwarts (Zweinstein), woe alle touveneerskinder heen mote es ze dee leeftied bereike. Harry kump dao aon en oontwikkelt ziech es 'ne goje lierling, meh raak veural eder jaor mier verwikkeld in e gevech mèt Voldemort of ein vaan zien versjijninge.
De cyclus
[bewirk | brón bewèrke]Vaan alle zes beuk die versjene zien besjrijf eder stök ein vaan zien studiejaore op Hogwarts/ Zweinstein. De deile vertoene 'n dudeleke oontwikkeling vaan gewoen avonturebook tot psychologische roman, dee parallel löp aon de geis vaan zien hoofpersoen, en aonnummelek ouch die vaan de lezers. De beuk (mèt tösse häökskes de Nederlandse vertaoling) zien:
1. Harry Potter and the Philosopher's Stone (en de Steen der Wijzen)
2. Harry Potter and the Chamber of Secrets (en de Geheime Kamer)
3. Harry Potter and the Prisoner of Azkaban (en de Gevangene van Azkaban)
4. Harry Potter and the Goblet of Fire (en de Vuurbeker)
5. Harry Potter and the Order of the Phoenix (en de Orde van de Feniks)
6. Harry Potter and the Half-Blood Prince (en de Halfbloed-Prins)
7. Harry Potter and the Deathly Hallows (en de Relieken des Doods)
De belangriekste figure in dees beuk zien wijer: Ron Weasley (Ron Wemel) en Hermione Granger (Hermelien Griffel), Harry zien beste vrun, Albus Dumbledore (Albus Perkamentus), 't sjaolhoof vaan Hogwarts/ Zweinstein, Severus Snape (Severus Sneep), lieraar touverdraanke mèt wee Harry op slechte voot steit, Rubeus Hagrid, 'nen haafreus dee 't Verboje Bos bewaak.
Verfilminge
[bewirk | brón bewèrke]De ierste vief beuk zien inmiddels verfilmp. Daniel Radcliffe speult dao-in de rol vaan Harry Potter.
Vertaolinge
[bewirk | brón bewèrke]De beuk zien oetgegeve in tientalle taole. De Nederlandse vertaoling weurt verzörg door Wiebe Buddingh'. 't Gief (nog) gein Limburgse versie.
Reacties
[bewirk | brón bewèrke]De beuk sloge mètein enorm aon en braoke alle verkouprecords. Verbazend väöl volwassene bleke de beuk ouch te kinne waordere. Literatuurcritici zien evels verdeild euver de beuk: väöl vaan hun koume mèt de reactie tot dit boete de literatuur vèlt, aandere wieze op de hoeg kwaliteit boemèt de beuk gesjreve zien en de originaliteit vaan 't gehiel.
Orthodoxe christene höbbe hei en dao tege de beuk geageerd, umtot ze hekserij zouwe verhierleke, wat de Biebel absoluut verbejt. In de Vereinegde State is 't zelfs tot bookverbrandinge (dao 'n normaal versjijnsel) gekoume. Katholieke geisteleke höbbe evels dudelek gemaak tot de beuk gei bezwoer höbbe, umtot ze christeleke wierde wie trouw, ierlekheid en naosteleefde propagere.
Trivia
[bewirk | brón bewèrke]Harry Potter dreug 'ne brèl en heet vaan väöre euverhangend haor. Um die reie weurt Jan Peter Balkenende dèks "Harry Potter" geneump.