Getebunjel

Dit artikel is gesjreve in 't Mofers. Ómdat 't plaatsgebónge is, maogs doe 't ómzètte nao 't Sintruins, es te dit dialek sjpriks.

---

De loup vanne Getebunjel in 't Limbörgs-Nederriens dialekcontinuüm. De greun stippellien die 't meiste nao links ligk is de Getebunjel; de diekke greun lien gans nao links is de Uerdinger Linie.

De Getebunjel of Getelinie is 'n vergaoring aan isoglosse in Belsj Limbörg. Dezen isoglossebunjel begintj in 't zuje bieje Germaans-Romaanse taalgrens, net get t'n zuudwèste van Montenaoke. Naordoeastelik van Leopolsbörch vèltj t'r oetèntjelik same mitte Uerdinger Linie. De samevallendje liene loupe vervölges get t'n oeaste van Lommel Nederlandj binne.

De Getebunjel löp es 'nen apaarten isoglos ummer get t'n oeaste vanne Uerdinger Linie en vörmp de wèsgrens van 't gebied wo in spraokkundig opzich Limbörgse dialekte waere gekaldj die nag einige invleuj vanne Kölsje expansie höbben óngergange, wie mieëvaadsvörming middels d'n umlaut (in 't Truierlandjs). Ouch 't gebroek van inkel tupische Limbörgse wäörd wie aek sjètj gans oet nao dezen isoglossebunjel. De dialekte die waere gekaldj tösse de Getebunjel enne Uerdinger Linie zeen euvergangsdialekte mit naeve nag inkel Limbörgse veural väöl Braobantjse kènmirke. Dees dialekte waeren 't Getelandjs geneump. t'n Naorden en te wèste vanne Uerdinger Linie zeen de dialekte gans Braobantjs.

De Getebunjel is verneump gewaore nao de reveer de Gete.