Sapato

Sapatos es cosas desiniada per proteje la pedes de umanas. Los es ance usada como un cosa de decora e moda. La forma de sapatos ia varia multe tra tempo e de cultur a cultur, con la apare liada orijinal a la funsiona. Plu tarda en la istoria de umanas, moda ia ajunta multe elementos de desinia, como si la sapatos debe ave talones alta o basa, o de cual material los es construida, o la usa intendeda per la sapato.

Tradisional, sapatos ia es fabricada de cuoro, lenio, o lona. Resente, los es comun fabricada de cauxo, plastica, e otra materiales derivada de petrocimicas. An si la pede umana ia evolui per multe varias de tereno e clima, lo es ancora ferable a periles como rocas agu e temperatures estrema, contra cual sapatos pote proteje. Alga sapatos es portada per securia, como botas con frontes de aser per locas de construi.

La sapatos la plu vea es sandales fabricada de cortex datida de sirca 7000-8000 aec, trovada en la Fort Rock Cave en Oregon, SUA en 1938. La sapatos de cuoro la plu vea, fabricada de un peso solitar de cuoro de bove con un corda de cuoro longa la costur a la fronte e retro, trovada en un cava en Armenia en 2008 e datida a sirca 3500 aec. Ötzi la om jelada de la borda de Osteraic e Italia, datida a 3300 aec, ia porta sapatos con plantas de pel de urso, lados de pel de servo, e un rede de cordas de cortex, cual pote es streta traeda sirca la pedes.

Lo es probable ce sapatos ia es usada multe plu temprana, ma car la materiales ia es multe putrable, los es difisil per trova. La desinias temprana ia es multe simple, comun no plu ca un saceta per la pede. Los es plu comun trovada en climas fria.

Multe americanes orijinal en America Norde ia porta un tipo de sapato nomida la mocasin. Estas es streta a la pede con plantas mol, tipal fabricada de cuoro o la peles de bisones. Multe mocasines ia es decorada con perletas o la spinas de porcospinas. Mocasines no ia es nonpermeable, e en la menses calda e en clima moiada, la plu ia vade sin sapatos.

Cuando sivilias ia comensa developa, sandaletas ia es portada. Estas es vidable en imajes de los en murales en Egipte antica de 4000 aec. Un duple ia es trovada en Europa, fabricada de la folias de papiro e datida a sirca 500 aec. Los ia es ance portada en Ieruxalim en la sentenio prima ec. Sandaletas ia es portada par multe sivilias e es fabricada de multe materias, como folias de palma, cuoro ru, lenio, palia de ris, la folias de sisal e la iuca.

An si la sandaleta ia es comun, multe persones en edas antica, como la egiptianes, indus, e elinicas, no ia vide sapatos como nesesada, e ia prefereda vade sin los. La elinicas ia vide cualce sapatos como fea e dejenerada. Atletas en la Juas de Olimpia antica ia partisipa sin sapatos e nuda. La dios e divas ia es descriveda como sin sapatos, gerores ia batalia sin sapatos, e corores ia core sin sapatos. La soldatos de Alexandro la grande ia concista un impero sin sapatos.

La romanes, an si los ia adota multe aspetas de la cultur de la elinicas, no ia adota la opina de sapatos de los. Vestes ia es videda como un sinia de potia par la romanes, e sapatos ia es videda como un nesesa en un mundo sivilida. Sola sclavos e povres ia vade sin sapatos.

Un sapato comun en la Pirineos e Catalunia en la eda medieval ia es nomida la espadrille. Esta es un sandal con plantas de juta trensada e un parte superior de stofa, e comun incluinte cordas de stofa cual lia sirca la talon. La nom es de franses, e deriva de la erba esparto.

Multe sapatos en la eda medieval ia es construida con un metodo de inversa: la parte superior ia es inversada, con la lado ru a estra, ia es coseda a la borda de la planta. La sapato es es alora reversada donce la lado bon ia es esterna. Alga sapatos ia es developada con alas o cordas per streta la cuoro sirca la pede per un cabe plu streta. La sapatos survivente cabe la pedes streta e la sapato destra e sinistra ia es imajes mirorida. Sirca 1500, la metodo de inversa ia es reponeda par la metodo de borda, en cual la parte superior ia es coseda a un planta multe plu rijida e la sapato no es inversada.

Per la sentenio 15, un forma conoseda como patenes ia deveni comun per la omes e femes de Europa. Algas vide estas como la asendente de la sapato de alta talones de oji. Ancora, la povre e clases basa, e la sclavos en la mundo nova, no ia porta sapatos. Patenes sembla sandales, estra ce la plantas ia es lenio taliada per alti la person. Posible los ia es orijinal intende como un modo per pasea tra stradas fangosa sin susi vestes longa, ma lo es ance posible ce los ia es indicantes de prestijia: plu alta person, plu alta clase.

Un otra sapato de esta sentenio es la craco, nomida per la site en [Polsca]], Kraców. La punto de la sapato ia es estendeda, comun a un grado ce los nesesa es suportada par un peso de oso de balena liada a la jeno per preveni la punto causa un cade. Ance en esta sentenio ia es la xopin, orijinal de Turcia, cual ia es sirca 18-20 cm alta. Los ia es popular spesial en Venezia. En la sentenio 16, aristocratas, omes e femes, ia porta sapatos alta per pare plu alta.

Sapato de un geror roman (reconstrui)
Sandales de esparto de Espania, milenio 6-5
Sapatos espadrille de Espania
Sapatos craco de Baiern
Sapato xopin de Venezia de sentenio 16 (reconstrui)
Un sapato fabricada en la metodo de inversa, e un "paten"
Patenes en un depinta par Arnolfini, 1434

En la sentenio 17, la sapato moderna, con un planta coseda a la parte superior, tipal de cuoro. Asta 1800, esta sapatos ia es fabrica sin difere entre la pedes destra e sinistra. Sola gradal, los ia deveni difere.

La fabrica de sapatos ia deveni plu comersial en la sentenio 18 media, como un industria de casa. Benerias grande ia comensa reserva sapatos fabricada par multe sapatores de la area.

Asta la sentenio 19, la fabrica de sapatos ia es un artisania, ma per la fini de la sentenio, la prosede ia es cuasi tota macinida, con produi aveninte en fabricerias grande. An si esta produi en masa ia es economial, la sistem de fabriceria ia produi sapatos sin la difere individual cual la sapator tradisional ia es capas de produi.

En la Geras de Napoleon, macinas per produi botas en masa per la soldatos de Britan. La usa de clos, e plu tarda grapas, per lia la planta a la partes superior aida la prosede. La sistem de la cadena de construi ia es usada, con cada laboror con sua propre parte de la prosede. Soldatos ferida pote aprende sua taxes en no plu ca alga oras, nun debe es sapatores, e la custa de la botas cade. Cuando la gera sesa en 1815, la custa de labora ia descrese, e esta prosede ia sesa ance. Lo deveni comun ancora con la Gera de Crim e la desinia de un macina per rebiti en 1853, e la usa de macinas propulsada par vapor, redui la custa de produi e alti la rapidia de produi.

La cosador ia es introduida en 1846, cual ia furni un metodo nova per la macini de la fabrica de sapatos. Per la desenio 1850 tarda, la industria ia deveni plu un sistem moderna, spesial en la SUA e Britan. Per la desenio de 1890, la prosede de macini ia es completida. Plu, en 24 janero 1899, Humphrey O'Sullivan ia reseta la patenta per un talon de cauxo per botas e sapatos.

De la sentenio 20, on ave multe avansas en la produi de cauxo, plastica, stofa sinteseda, e aderentes industrial. An si cuoro resta como la norma per la plu de sapatos, alga ave comun poca o no cuoro real. Plantas cual, en la pasada, debe es coseda par mano, alora es coseda par macina o adere a la pares superior. Un negativa es ce esta materias nova ia crea sapatos cual no es biodegradante. Lo es estimada ce la plu de sapatos produida en masa nesesa 1000 anios per degrada en un entereria.

En 2007, la industria global de sapatos ia ave un mercato valuada a %107.4 bilion, e es espetada per crese a 122.9 bilion par la fini de 2012. La fabricerias de sapatos en Xina produi sirca 63% de sapatos, 40.5% de esportas, e 55% de la revenu. La fabricerias de Europa continua domina la mercato per sapatos plu cara.

Sapato de sporte Puma
Sapato de sporte Converse
Sapatos de baleta, spesial per dansa sur la puntos de la orteas
Sapatos mulo
Sandales
Sapatos popular de la desenios de 1940 e 1950
Sapatos per xicos de scolas brites
Sapatos "de corte" (pump)
Sapato "de corte" con talones alta
Sapatos de talones alta
Sapatos alta de acrilica