Gera Mundal Un
La Gera Mundal Un ia es un gera cual ia orijina en Europa e ia dura de 28 julio 1914 a 11 novembre 1918. Contempora descriveda como "la gera per fini tota geras", lo ia inclui la militari de plu ca 70 milion soldatos, incluinte 60 milion europeanes, cual causa ce lo es un de la geras la plu grande. Lo es ance un de la geras con la plu de moris en istoria, sirca 20 milion. An plu persones ia mori como la resultas de jenosides (cual ia causa sirca 40 milion moris), e la pandemica de gripe de 1918 (cual causa sirca 50 milion moris mundal).
A 28 junio 1914, Gavrilo Princip, un serbsce de Bosnia e nasionaliste iugoslavian, ia asasina la arciduxe Franz Ferdinand, eritor de la Impero Osteraic-Magiar en Sarajevo, resultante en la Crise de Julio. Como un responde, a 23 julio, Osteraic-Magiar ia presenta Serbia con un esije ultima. La responde par Serbia no ia sasia la osteraices, e los ia comensa prepara per gera.
Un rede de alias interliada ia grandi la crise de un caso biladal en la Balcanes a un cual envolve la plu de Europa. Per julio 1914, la potias grande de Europa ia es divideda entre du alias: la Acorda Truple (o la alias), composada de Frans, Rusia, e Britan, e la Alia Truple (o la potias sentral) de Deutxland, Osteraic-Magiar, e Italia. (Nota ce Italia ia pote resta estra la gera asta april 1915, cuando la mali de relatas con Osteraic-Magiar ia condui la italianes a alia con la campo oposante.) Rusia ia senti la nesesa per suporta Serbia e, pos cuando Osteraic-Magiar ia bomba Beograd (la capital de Serbia) a 28 julio, lo comensa militari partal. Militari completa par Rusia ia es proclamada a la sera de 30 julio; a 31 julio, Osteraic-Magiar e Deutxland ance militari, e Deutxland ia esije ce Rusia desmilitari entre 12 oras. Cuando Rusia ia fali obedi, Deutxland ia declara gera sur Rusia a 1 agosto en suporta de Osteraic-Magiar, con Osteraic-Magiar seguente a 6 agosto, e Frans ia comensa militari plen per suporta Rusia a 2 agosto. En esta modo, un mal ata par un om solitar ia inisia un gera mundal entre la potias grande de Europa.
La stratejia deutx per gera a du frontes contra Frans e Rusia ia es per consentra rapida la plu parte de sua armada en la ueste per defeta Frans entre ses semanas, e alora direta sua foca a la este ante Rusia pote militari completa; esta ia es conoseda, plu tarda, como la Scema de Schlieffen. A 2 agosto, Deutxland ia esije ce lo ave pasa libre tra Beljia; cuando lo es refusada, a 3 agosto lo ia invade Beljia e ia declara gera a Frans. la governa de Beljia ia clama a la Trata de London de 1839 e, seguente sua obligas su esta trata, Britan ia declara gera contra Deutxland a 4 agosto. A 12 agosto, Britan e Frans declara ance la gera contra Osteraic-Magiar; a 23 agosto, Japan ia alia con Britan e prende la poseses deutx en Xina e la Mar Pasifica. En novembre 1914, la Impero Osmanan ia entre la gera a la lado de la potias sentral, e abri fontes en la Caucasos, Mesopotamia, e la Penisola Sinai. La gera ia es lutada en la imperos colonial de cada potia, sperdente la combate a Africa e Asia.
La avansa deutx en Frans ia es parada a la Batalia de la Marne, e par la fini de 1914, la fronte ueste ia deveni un batalia de erode, marcada par series longa de linias de fosos cual no ia cambia multe asta 1917. Per contrasta, la fronte este ia es marcada par multe intercambias de teritorios. En 1915, Italia ia junta la potias aliada e ia abri un fronte en la Alpes. Balgaria ia alia se con la potias sentral en 1915, e Elas ia alia se con la alias en 1917, e estende la gera en la Balcanes. La SUA ia resta neutra a la comensa, an si lo ia deveni un furnor importante de utiles per gera a la alias. Ultima, pos la afonda de barcones comersial american par sumarinas deutx, la declara par Deutxland ce sua marinas ta recomensa atacas nonrestrinjeda a transportas neutra, e la revela ce Deutxland ia atenta stimula Mexico per gera contra la SUA, la SUA ia declara gera contra Deutxland a 6 april 1917. Forsas american no ia comensa ariva a la fronte en cuantias grande asta la media de 1918, ma ultima, la armada de la SUA ia ateni sirca du milion soldatos.
An si Serbia ia es vinseda en 1915, e Romania ia junta la potias aliada en 1916, e es vinseda en 1917, no potia grande ia es forsada estra la gera asta 1918. La Revolui Febrero de 1917 en Rusia ia repone la autocratia tsariste con un governa tempora, ma noncontente con la custa de la gera ia resulta en la Revolui Otobre, la crea de la Republica Sosialiste Soviet, e la suscrive de la Trata de Brest-Litovsc par la governa nova en marto 1918, cual fini la envolve de Rusia en la gera. Esta ia permete la move de cuantias grande de soldatos deutx de la este a la fronte ueste, cual resulta en la atacas par la deutx de marto 1918. Esta atacas ia es inisial susedosa, ma los ia fali ave un vinse desidente, e ia fatiga la reservas deutx final. La alias ia reenerji se e forsa la deutxes a retro en la atacas de 100 dias, un serie de atacas continuante a cual la deutxes no ia pote responde. Balgaria ia es la potia sentral prima per suscrive a un sesa de combate - la Sesaspara de Salonica a 29 setembre 1918. A 30 otobre, la Impero Osmanan ia sede e suscrive a la Sesaspara de Mudros. A 4 novembre, la Impero de Osteraic-Magiar ia acorda con la Sesaspara de Villa Giusti. Con sua alias vinseda, un revolui interna, e la militar no ia desira plu combate, Kaiser Wilhelm ia renunsia a 9 novembre e Deutxland ia suscrive un sesaspara a 11 novembre 1918, cual ia fini la gera.
La Gera Mundal Un ia es un punto de cambias sinifiante en la clima political, cultural, economial, e sosial de la mundo. Lo es videda par multe eruditas como la fini de la Revolui Industrial du e la Pax Britannica. La gera e sua efetos direta ia stimula multe revoluis e rebelas. La "Cuatro Grandes" (Britan, Frans, la SUA, e Italia) ia forsa sua esijes sur la potias vinseda en un serie de tratas acordada a la Confere de Pas en Paris de 1919, de cual la plu bon conoseda es la Trata de Versaille. Ultima, como la resulta de la gera, la Impero de Osteraic-Magiar, la Impero Deutx, e la Impero Rusce ia sesa esiste, con multe statos nova creada de sua restas. Ma, an si la susede de la alias (e la crea de la Liga de Nasiones en la Confere de Pas, intendeda per preveni geras en la futur), un Gera Mundal Du ia segue sola 20 anios pos alora, partal causada par la mesma tratas cual fini la Gera Mundal Un.