James Craig Watson
| James Craig Watson | |
|---|---|
 | |
| Gebuer | 28. Januar 1838 |
| Gestuerwen |
22. November 1880 Madison |
| Doudesursaach | Bauchfellentzündung |
| Nationalitéit | USA, Kanada |
| Educatioun |
Universitéit vu Michigan, Universitéit vu Leipzig |
| Aktivitéit | Astronom, Universitéitsprofesser |
| Member vun | National Academy of Sciences, American Academy of Arts and Sciences, American Philosophical Society |
 | |
Den James Craig Watson, gebuer 28. Januar 1838 zu Fingal, Ontario/Kanada, a gestuerwen den 23. November 1880 zu Madison, Wisconsin, war en US-amerikaneschen Astronom.
De Watson staamt aus den USA, gouf awer wärend engem Openthalt vu sengen Elteren a Kanada gebuer. 1857 huet hien op der University of Michigan graduéiert.
Als Student huet hie sech mat den himmelsmechanesche Wierker vum Pierre-Simon Laplace beschäftegt, huet optesch Lënse geschlaff an en Teleskop gebaut. No sengem Studium krut hien zu Michigan eng Assistenteplaz um Léierstull fir Astronomie. Duerch seng ëmfangräich Observatiounen a Berechnungen – ënner anerem huet hien 1856 ee Koméit entdeckt an huet 1858 d'Bunn vum Koméit Donati bestëmmt – a gouf schonn 1859 zum Professer fir Astronomie ernannt.
Am Joer 1863 gouf hien Direkter vum Observatoire. Am selwechte Joer huet hien den Asteroid Eurynome entdeckt. An de Joren 1867 an 1868 war him d'Entdeckung vun aacht weideren Asteroide gelongen, ënner hinnen d'Nummer. 100, den Paris.
1869/70 huet de Watson un Expeditioune fir d'Observatioun vu Sonnendäischterten um Mount Pleasent, Iowa, an zu Carlentini, Sizilien deelgeholl. 1874 huet hien zu Peking e Venusduerchgank virun der Sonn observéiert. 1878 war hie Member vun enger Expeditioun vun enger Sonnendäischtert am Staat Wyoming. Do huet hie versicht e Planéit bannent der Merkurbunn ze fannen. De Watson war iwwerzeegt, datt en "Intramerkur", de Planéit Vulkan, wéi och en Transneptun existéiere géif.
1879 krut de Watson e Léierstull fir Astronomie op der University of Wisconsin. Hien huet weider nom hypothetesche Vulkan gesicht, vun deem mer haut wëssen, datt en net existéiert.
Am Ganzen hat de Watson 24 Asteroiden entdeckt an en ettlech astronomesch Wierker publizéiert. Wéinst senge Leeschtunge krut hie vill Éierungen. 1867 gouf hien an d'National Academy of Sciences opgeholl. 1870 krut hien de Lalande-Präis vun der franséischer Akademie, wéi scho virun him verschidden Asteroiden-Entdecker. Am selwechte Joer krut hien den Éierendokter vun der Universitéit Leipzig. Zu sengen Éiere gouf en Asteroid (729) Watsonia genannt.
D'James-Craig-Watson Medail ass eng Auszeechnung vun der US-National Academy of Sciences fir Leeschtungen um Gebitt vun der Astronomie.
Kuckt och
[änneren | Quelltext änneren]
Um Spaweck
[änneren | Quelltext änneren]- Publikatioun vum J. C. Watson am Astrophysics Data System
- (en) G. C. Comstock: Biographical Memoir of James Craig Watson. Sidereal Messenger, vol. 7 (1888), S. 273-286 (Noruff)